上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
15
猶大國的王亞撒利雅
( 代下 26:1-23 )
以色列王耶羅波安二十七年，猶大王亞瑪謝的子亞撒利雅坐位，
2 伊坐位的時十六歲，佇耶路撒冷做王共五十二年。伊的老母名叫耶可利雅，是耶路撒冷人。
3 伊行耶和華所看做好的事，照伊的老父亞瑪謝一切的所行；
4 總是山頭壇猶無廢去，百姓猶原獻祭燒香佇山頭壇。
5 耶和華就拍王，互伊癩𰣻，到伊死的日，伊就另外厝徛起。伊的子約坦管理家事，治理國民。
6 亞撒利雅其餘的事，見伊所行的豈無攏記佇猶大列王的記錄嗎？
7 亞撒利雅及伊的祖同睏，及伊的祖葬佇大衛的城。伊的子約坦續接伊做王。
以色列國的王撒迦利雅
8 猶大王亞撒利雅三十八年，耶羅波安的子撒迦利雅佇撒瑪利亞做以色列王六月日。
9 伊行耶和華看做歹的事，照伊的列祖所行的，無離開尼八的子耶羅波安的罪，就是互以色列犯罪的。
10 雅比的子沙龍背叛伊，佇百姓的面前拍伊刣伊，篡伊的位。
11 撒迦利雅其餘的事攏記佇以色列諸個王的記錄。
12 這是前耶和華給耶戶講的話講：「你的子孫欲坐以色列的國位到四代。」此個話按呢應驗。
以色列國的王沙龍
13 猶大王烏西雅三十九年，雅比的子沙龍坐位佇撒瑪利亞做王一月日。
14 迦底的子米拿現對得撒上去撒瑪利亞，拍雅比的子沙龍佇撒瑪利亞刣死伊，篡伊的位。
15 沙龍其餘的事及伊背叛的情形攏記佇以色列諸個王的記錄。
16 彼時米拿現拍提斐薩及見若佇𪜶中間的及伊的四境對得撒起，因為𪜶無給伊開城門，所以拍伊，也破開𪜶中間一切有娠孕的婦仁人。
以色列國的王米拿現
17 猶大王亞撒利雅三十九年，迦底的子米拿現坐位，佇撒瑪利亞做以色列王共十年。
18 伊行耶和華所看做歹的事，一世人無離開尼八的子耶羅波安的罪，就是互以色列犯罪的。
19 亞述王普勒來攻擊此個土地。米拿現用銀一千他連得互普勒，愛伊幫助來堅固伊的國權。
20 米拿現對以色列一切的大好額人強派諸個銀，教逐人出銀五十舍客勒，送互亞述王。對按呢亞述王倒去，無𫢶彼所在。
21 米拿現其餘的事，見伊所行的豈無攏記佇以色列諸個王的記錄嗎？
22 米拿現及伊的列祖同睏。伊的子比加轄續接伊做王。
以色列國的王比加轄
23 猶大王亞撒利雅五十年，米拿現的子比加轄佇撒瑪利亞做以色列王共二年。
24 伊行耶和華所看做歹的事，無離開尼八的子耶羅波安的罪，就是互以色列犯罪的。
25 伊的軍長、利瑪利的子比加背叛伊，佇撒瑪利亞王宮的衛所拍伊。亞珥歌伯及亞利耶及基列的人五十個及伊同謀；刣死伊，篡伊的位。
26 比加轄其餘的事，見伊所行的攏記佇以色列諸個王的記錄。
以色列國的王比加
27 猶大王亞撒利雅五十二年，利瑪利的子比加佇撒瑪利亞坐位做以色列王共二十年。
28 伊行耶和華所看做歹的事，無離開尼八的子耶羅波安的罪，就是互以色列犯罪的。
29 以色列王比加的時，亞述王提革拉‧毗列色來取以雲、亞伯‧伯‧瑪迦、亞羅、基低斯、夏瑣、基列、加利利，及拿弗他利全地，攏掠𪜶到亞述。
30 烏西雅的子約坦二十年，以拉的子何細亞背叛利瑪利的子比加，拍來刣死伊，篡伊的位。
31 比加其餘的事，見伊所行的攏記佇以色列諸個王的記錄。
猶大國的王約坦
32 ( 代下 27:1-9 )
以色列王利瑪利的子比加第二年，猶大王烏西雅的子約坦坐位。
33 伊坐位的時二十五歲，佇耶路撒冷做王十六年。伊的老母名叫耶路沙，是撒督的查某子。
34 伊行耶和華所看做好的事，照伊的老父烏西雅一切所行的去行。
35 總是山頭壇猶無廢無，百姓猶原獻祭燒香佇山頭壇。約坦起耶和華殿頂面的門。
36 約坦其餘的事，見伊所行的豈無攏記佇猶大列王的記錄嗎？
37 彼時耶和華起頭差亞蘭王利汛及利瑪利的子比加去攻擊猶大。
38 約坦及伊的列祖同睏，及伊的列祖葬佇伊的祖大衛的城。伊的子亞哈斯續接伊做王。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。