上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
9
耶戶受抹油做以色列王
先知以利沙叫先知的學生一個，給伊講：「你縖腰，提一瓶油去基列的拉末。
2 到遐，著尋寧示的孫、約沙法的子耶戶，入去，互伊對伊的兄弟中起來，導伊入內房，
3 將瓶內的油斟佇伊的頭殼，講：『耶和華按呢講：我用油抹你做以色列的王。』你就著開門逃走，通延迁。」
4 此個少年人就是少年的先知去基列的拉末。
5 到遐，看見眾軍長啲坐，伊就講：「軍長啊，我有代誌欲給你講。」耶戶講：「欲給阮中間甚麼人講？」應講：「軍長啊，就是你。」
6 伊就起來，入去厝內，少年人用油斟佇伊的頭殼，給伊講：「耶和華──以色列的上帝按呢講：『我用油抹你做耶和華的百姓以色列的王。
7 你著拍滅你的主人亞哈的家，互我通報應我的奴僕諸個先知的血，以及耶和華眾奴僕的血，就是佇耶洗別的手所做的。
8 因為亞哈全家欲攏滅無，我欲剪除屬亞哈的查甫丁，無論受拘束的抑是自由的，佇以色列中，
9 我欲互亞哈的家親像尼八的子耶羅波安的家，也親像亞希雅的子巴沙的家。
10 佇耶斯列的園，狗欲食耶洗別，無人埋葬伊。』」少年人就開門逃走。
11 耶戶出去，到伊的主人的奴僕遐，有一人問伊講：「攏平安無？此個𤞚者來尋你甚麼代誌啊？」伊給𪜶講：「恁識彼個人，也知伊所講的。」
12 𪜶講：「無影，你著給阮講。」應講：「伊按呢按呢給我講。伊講：『耶和華按呢講：我用油抹你做以色列的王。』」
13 𪜶趕緊逐人用家己的衫舖佇崎仔的頂層，下佇耶戶的下面；𪜶歕哨角講：「耶戶做王啦！」
以色列王約蘭受刣
14 按呢，寧示的孫、約沙法的子耶戶背叛約蘭。約蘭及以色列眾人曾把守基列的拉末，因為亞蘭王哈設的緣故；
15 總是約蘭王倒去耶斯列，醫治伊的傷，就是伊佇及亞蘭王哈設交戰的時，亞蘭人拍著伊的。耶戶講：「恁的意思若是按呢，就通容允人走出城去耶斯列報消息。」
16 耶戶就坐車去耶斯列，因為約蘭倒佇遐。猶大王亞哈謝已經落去覓約蘭。
17 有一個守望者徛佇耶斯列的樓頂，看見耶戶的軍隊來，就講：「我看見一陣軍隊。」約蘭講：「差一個騎馬者去接伊，續問伊講：平安嗎？」
18 騎馬者去接伊，講：「王按呢講，是平安嗎？」耶戶講：「平安抑無及你甚麼干涉？你越來隨我的後面！」守望者閣講：「使者到𪜶遐，總是無倒轉來。」
19 王閣差一個騎馬者去。伊到𪜶遐，講：「王按呢講，是平安嗎？」耶戶講：「平安抑無及你甚麼干涉？你越來隨我的後面！」
20 守望者閣講：「伊到𪜶遐，也無倒轉來；趕車的款親像寧示的孫耶戶啲趕，因為伊趕真狂。」
21 約蘭講：「套車！」就套伊的車。以色列王約蘭及猶大王亞哈謝出去逐個坐家己的車出去接耶戶，佇耶斯列人拿伯的園抵著伊。
22 約蘭見著耶戶就講：「耶戶啊，是平安嗎？」伊應講：「你的老母耶洗別的淫行邪術許多猶佇啲，豈會平安？」
23 約蘭就越轉伊的車走，給亞哈謝講：「亞哈謝啊，有謀反啦！」
24 耶戶盡力開弓，射著約蘭的飯匙骨中，箭對伊的心𥦁出去。伊就慄落車內。
25 耶戶給伊的軍長畢甲講：「你將伊㧒佇耶斯列人拿伯的園裡。你著記得，你我相及坐車隨伊的老父亞哈的時，耶和華對伊所讖語的，
26 耶和華講：『我昨日有看見拿伯的血及伊的子的血』，耶和華閣講：『佇此區園我欲報應你。』今著將伊㧒佇彼區園，照耶和華所講的。」
猶大王亞哈謝受刣
27 猶大王亞哈謝看見按呢，就對園的厝的路逃走。耶戶趇伊，講：「也著拍死伊佇車內。」到倚近以伯蓮上姑珥的山坪拍傷伊。伊走到米吉多，就死佇遐。
28 伊的奴僕用車載伊到耶路撒冷，葬佇伊的墓及伊的列祖，佇大衛的城。
29 佇亞哈的子約蘭十一年，亞哈謝起頭做猶大王。
耶洗別王后受刣
30 耶戶到耶斯列；耶洗別聽見就畫目眉、梳頭，俯佇窗仔啲看。
31 耶戶入門的時，耶洗別講：「刣死主人的心利啊，平安嗎？」
32 耶戶攑頭向窗仔看，講：「是誰為我，是誰啊？」有二三個太監俯落看伊。
33 耶戶講：「給伊捙落來！」𪜶就捙伊落來。伊的血濺著牆壁及馬；就用腳踏伊。
34 耶戶入去，也食也飲，講：「恁去看彼個受咒詛的婦仁人續埋葬伊，因為伊是王的查某子。」
35 𪜶去欲葬伊，干單尋著伊的頭殼骨及腳，及手掌若定。
36 𪜶倒來回覆伊，耶戶就講：「這就是耶和華託伊的奴僕提斯比人以利亞所講的話，講：『佇耶斯列的園，狗欲食耶洗別的肉；
37 閣耶洗別的身屍欲佇耶斯列的園親像糞佇土面，致到人無欲講這是耶洗別。』」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。