上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
32
雅各準備見以掃
雅各閣行伊的路，上帝的使者抵著伊。
2 雅各看見𪜶就講：「這是上帝的軍隊」，所以名彼所在叫瑪哈念。
3 雅各差人代先去西珥的地，以東的田，見伊的兄以掃，
4 吩咐𪜶講：「恁給我的主以掃講：『你的奴僕雅各按呢講：我佇拉班遐寄居，住到今仔日。
5 我有牛、驢、羊群、奴僕、女婢，今差人來報我的主，愛得佇你的面前得著恩典。』」
6 所差的人倒來雅各遐，講：「阮到你的兄以掃遐，伊抵抵啲來欲迎接你，閣有四百人及伊來。」
7 雅各大驚閣迫腹，將許個及伊相及佇啲的人，及羊群、牛群、駱駝分做二隊，
8 講：「以掃若來攻擊此隊，剩的彼隊猶通逃走。」
9 雅各閣講：「我的祖亞伯拉罕的上帝，我的父以撒的上帝──耶和華啊，你曾對我講：『倒去你的本地本族，我欲好款待你。』
10 你對你的奴僕所施一切的慈愛及一切的誠實，就至微細的我也𣍐堪得得著；我前攑我的拐仔過此個約但河，今我已經成做二隊。
11 求你救我脫離我的兄以掃的手；因為我驚伊，驚了伊來刣死我及𪜶母子。
12 你也曾講：『我的確欲好款待你，互你的後裔親像海邊的沙，多到𣍐算得。』」
13 彼暝，雅各歇佇遐，就佇伊所有的物的內面揀出禮物欲送伊的兄以掃：
14 山羊母二百隻，山羊牨二十隻，綿羊母二百隻，綿羊牨二十隻，
15 駱駝母及食奶的子三十隻，牛母四十隻，牛牨十隻，驢母二十隻，驢子十隻；
16 各樣另外一群，交代奴僕，給奴僕講：「恁代先我去，互逐群有相離」；
17 閣吩咐做頭的講：「我的兄以掃抵著你的時，若問你講：『你是甚麼人的？欲去叨落？你頭前許個是誰的？』
18 你著講：『是你的奴僕雅各的，是欲送我的主以掃的禮物；現在伊本身亦佇阮的後面。』」
19 閣吩咐第二、第三，及一切趕歸群精牲的人講：「恁抵著以掃的時亦著照按呢給伊講；
20 閣恁亦著講：『你的奴僕雅各佇阮的後面。』」因為雅各家己拍算講：「我用佇我頭前去的禮物來解伊的恨，然後我見著伊的面，豈採伊接納我。」
21 對按呢禮物先行；彼暝，雅各歇佇隊中。
雅各佇便以利相偃
22 伊暝時起來，導伊二個某，二個女婢，及十一個子，攏過雅博的渡頭，
23 代先互𪜶過溪，凡所有的亦互𪜶過，
24 只有剩雅各家己佇啲。有一人來及伊相偃，到佇天昲光。
25 彼人看𣍐贏伊，就搧雅各的大腿臼，相偃的時雅各的大腿臼差著。
26 彼人講：「天欲光啦，著放我去！」雅各講：「你若無給我祝福，放你去。」
27 彼人講：「你名做甚麼？」伊講：「我名做雅各。」
28 彼人講：「你的名無欲閣叫雅各，欲叫做以色列；因為你及上帝及人鬥輸贏，攏得著卡贏。」
29 雅各問伊講：「請將你的名給我講。」彼人應講：「乜使問我的名？」就佇遐給伊祝福。
30 雅各名彼所在叫便以利，因為講：「我當頭對面見著上帝，我的生命猶得著保全。」
31 日抵仔出，雅各經過便以利，伊的大腿已經跛。
32 所以，諸個以色列人無食大腿頭的筋，到佇今仔日，因為彼人搧雅各腿臼的大筋。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。