上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
22
先知米該雅警戒亞哈
( 代下 18:2-27 )
以色列及亞蘭三年久無交戰。
2 到第三年，猶大王約沙法落去以色列王遐。
3 以色列王對伊的奴僕講：「恁豈知基列的拉末是咱的？咱竟然恬恬，無對亞蘭王的手搶來嗎？」
4 亞哈給約沙法講：「你欲及我去基列的拉末交戰嗎？」約沙法給以色列王講：「我親像你，我的百姓親像你的百姓，我的馬親像你的馬。」
5 約沙法給以色列王講：「請你今仔日問耶和華的意思。」
6 以色列王就聚集先知，約略四百人，問𪜶講：「我著上去基列的拉末來交戰抑是著息啊？」𪜶講：「通上去，因為主欲將伊交佇王的手。」
7 約沙法講：「佇遮豈無猶有耶和華的先知，互咱通對伊來問嗎？」
8 以色列王給約沙法講：「猶有一人，是音拉的子米該雅，咱通對伊來問耶和華。總是我怨恨伊；因為伊所讖語我的，攏無好話，只有災禍若定。」約沙法講：「請王莫得按呢講。」
9 以色列王就召一個官員來，講：「你去叫音拉的子米該雅緊緊來。」
10 以色列王及猶大王約沙法，逐個坐伊的座位，穿禮服，佇撒瑪利亞城門口闊的所在，眾先知逐個佇𪜶的面前讖語。
11 基拿拿的子西底家做鐵角，講：「耶和華按呢講：『你欲用諸個觸亞蘭人，到𪜶滅無。』」
12 眾先知攏按呢讖語講：「通上去基列的拉末，欲得勝，因為耶和華欲將伊交佇王的手。」
13 彼個去叫米該雅的使者給伊講：「看啊，眾先知攏講一樣話，對王講好事，求你所講的及𪜶相同，平平講好話。」
14 米該雅講：「我指永活的耶和華來講，耶和華對我講甚麼，我欲講伊。」
15 米該雅到王的面前，王問伊講：「米該雅啊，阮通上去基列的拉末來交戰抑是著息啊？」伊應講：「通上去，欲得勝，耶和華欲將伊交佇王的手。」
16 王對伊講：「我著幾擺教你咒誓，你託耶和華的名只有著用真實給我講？」
17 米該雅講：「我看見以色列眾百姓四散佇山裡，親像無牧者的羊一般。耶和華按呢講：『諸個無主人，𪜶逐個通平安倒去𪜶的家。』」
18 以色列王給約沙法講：「我豈無給你講，此人所欲讖語我的，無講好話只有災禍若定。」
19 米該雅講：「所以你著聽耶和華的話！我看見耶和華坐佇寶座，天頂的萬軍徛佇伊的左右。
20 耶和華講：『是誰欲引誘亞哈互伊上去基列的拉末死佇遐啊？』此個講按呢，彼個講按呢。
21 後來有一個神出來，徛佇耶和華的面前，講：『我欲引誘伊。』
22 耶和華問伊講：『你欲用甚麼法度？』伊講：『我欲出去，做白賊的神佇伊眾先知的嘴。』耶和華講：『你欲引誘伊，也欲成伊，出去來做按呢！』
23 今耶和華用白賊的神入佇你諸個先知的嘴，耶和華論到你有講災禍。」
24 基拿拿的子西底家進前，搧米該雅的嘴䩃，講：「耶和華的神對叨落一條路離開我來及你講啊？」
25 米該雅講：「看啊，你入內房家己匿，彼日就欲看見。」
26 以色列王講：「著帶米該雅去，交城守亞捫及王的子約阿施，講，
27 王按呢講，用此人關佇監裡，用艱苦的餅，艱苦的水互伊食，聽候我平安倒來。」
28 米該雅講：「你若真正平安倒來，就是耶和華無託我講」；閣講：「諸個百姓啊，恁攏著聽！」
亞哈陣亡
29 ( 代下 18:28-34 )
以色列王及猶大王約沙法上去基列的拉末。
30 以色列王給約沙法講：「我欲改裝上陣，你通穿王服。」以色列王就改裝上陣。
31 亞蘭王有吩咐伊的戰車的官長三十二個講：「無論大細，通及𪜶交戰，只有及以色列王交戰。」
32 戰車的官長看見約沙法，就講：「這必定是以色列王！」就越轉欲及伊交戰，約沙法就哮救。
33 戰車的官長看見是以色列王，就越轉去無追伊。
34 有一人偶然開弓，射入以色列王戰甲的合叕。王給趕車者講：「你越轉手，帶我出陣，因為我著重傷。」
35 彼日，交戰的勢面愈猛烈，有人扶王佇車裡，抵當亞蘭人。到日暗，王就死，血對著傷的所在流到車底。
36 日欲落的時，有號令遍傳佇軍營中，講：「逐人倒去本城，逐人倒去本地。」
37 王死，帶伊到撒瑪利亞，𪜶埋葬王佇撒瑪利亞；
38 有人洗伊的車佇撒瑪利亞的池邊，狗來舐伊的血，抵照耶和華所講的話（娼妓也佇遐洗身軀）。
39 亞哈其餘的事，見伊所行的及伊所起象牙的厝，以及所起攏總的城，豈無記佇以色列諸個王的記錄嗎？
40 亞哈及伊的列祖同睏。伊的子亞哈謝續接伊做王。
猶大國的王約沙法
41 ( 代下 20:31—21:1 )
以色列王亞哈第四年，亞撒的子約沙法坐位做猶大王。
42 約沙法坐位的時三十五歲，佇耶路撒冷做王二十五年。伊的老母名叫阿蘇巴，就是示利希的查某子。
43 約沙法行伊的老父亞撒許個路，無越轉離開伊，行耶和華看做好的事；總是山頭壇猶未廢無，百姓猶原獻祭燒香佇山頭壇。
44 約沙法及以色列王立約和好。
45 約沙法其餘的事及伊所顯出的能力，及伊怎樣交戰，豈無攏記佇猶大列王的記錄嗎？
46 伊的老父亞撒的時所留落來的孌童，約沙法對國內除去。
47 彼時以東無王，有委員管理伊。
48 約沙法造他施的船隻，欲去俄斐運金來；總是無去，因為船拍破佇以旬‧迦別。
49 亞哈的子亞哈謝給約沙法講：「容允我的奴僕及你的奴僕坐船相及去！」總是約沙法肯。
50 約沙法及列祖同睏。及伊的列祖葬佇伊的祖大衛的城。伊的子耶和南續接伊做王。
以色列國的王亞哈謝
51 猶大王約沙法十七年，亞哈的子亞哈謝佇撒瑪利亞坐位做以色列王，做王佇以色列歷過二年。
52 伊行耶和華看做歹的事，行伊的父的路，及伊的老母的路，及互以色列犯罪的尼八的子耶羅波安的路。
53 伊照𪜶老父一切所行的，服事巴力來敬拜伊，激耶和華──以色列上帝的受氣。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。