上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
31
雅各逃離拉班
雅各聽見拉班眾子有話講：「咱老父所有的雅各攏搶去，閣對咱的老父得著此個一切的榮光。」
2 雅各看見拉班見著伊無親像從前的面色。
3 耶和華對雅各講：「你著倒去你的父、公的地，到你的親族遐；我欲及你佇啲。」
4 雅各差人，叫拉結及利亞到山野到羊群遐，
5 對𪜶講：「我看見恁老父見著我無親像從前的面色；總是我的父的上帝時常及我佇啲。
6 恁亦知，我盡我的力做恁老父的工。
7 恁老父騙我，十擺改換我的工錢；總是上帝無容允伊害我。
8 伊若講：『有點的歸你做工錢』，就羊群所生的攏有點；伊若講：『有紋的歸你做工錢』，就羊群所生的攏有紋。
9 按呢，上帝將恁老父的精牲搶來互我。
10 羊交合的時，我夢中攑目一下看，看見拍羊母的羊公攏是有紋的、有點的、有花斑的。
11 上帝的使者佇彼夢中叫我講：『雅各。』我講：『我佇遮。』
12 伊講：『你攑目看，拍羊母的羊牨攏是有紋的、有點的、有花斑的；凡若拉班對你所做的，我攏看見。
13 我是伯特利的上帝；你佇遐曾用油抹柱，對我下願。今你著起來，離開此所在，倒去本地。』」
14 拉結及利亞應伊講：「佇阮老父的家豈猶有阮通得的家伙及產業嗎？
15 阮豈是互伊看做外人嗎？因為伊賣阮，吞食阮的價錢。
16 上帝對阮老父搶出一切的財物，許個就是阮及阮子的。今見若上帝所對你講的，做你去行！」
17 雅各就起來，互伊的子及某攏騎駱駝，
18 閣帶一切的精牲及所積聚的財物，所得著的精牲是佇巴旦‧亞蘭所得著的，欲去迦南地、去伊的老父以撒遐。
19 彼時拉班去剪羊毛，拉結偷提𪜶老父家內的偶像。
20 雅各背亞蘭人拉班偷走去，無給伊講，
21 就帶一切所有的逃走。伊起身過彼個河，向基列山去。
拉班追趇雅各
22 到第三日，有人給拉班講，雅各走去啦。
23 伊就導伊的兄弟相及去追趇，歷過七日的路站，到基列山才趇著。
24 暝時，眠夢中，上帝到亞蘭人拉班遐給伊講：「你著小心，通及雅各講好講歹。」
25 拉班追著雅各。雅各佇彼個山已經搭布棚；拉班及伊的眾兄弟亦佇基列山搭布棚。
26 拉班給雅各講：「你所做是甚麼事？你啥事背我，將我諸個查某子導去，親像用刀劍搶掠一樣。
27 你啥事暗靜走，偷走亦無給我講，互我通用歡喜、唱歌、拍鼓、彈琴送你倒去？
28 閣無容允我及外孫查某子唚嘴？你今所行是真戇！
29 我的手本有力通害恁，獨獨恁老父的上帝昨暝給我講：『你著小心，通及雅各講好講歹。』
30 今你雖然戀慕你的老父的家，不得不著去，啥事偷提我的神明？」
31 雅各應拉班講：「因為我驚心內想講，驚了你將你的查某子對我搶去。
32 論到你的神明，你對甚麼人搜著，伊就著死。當咱眾兄弟的面前，你認看，佇我遮有甚麼物是你的，通提去。」因為雅各知拉結有偷提𪜶。
33 拉班就入雅各的布棚，利亞的布棚，及二個女婢的布棚，攏搜無，就對利亞的布棚出來，入拉結的布棚。
34 拉結已經將偶像囥佇駱駝的鞍下，來坐佇彼頂面。拉班佇伊的布棚內四界摸，攏搜無。
35 拉結對伊的老父講：「經期抵仔到，𣍐會起來佇你的面前，求我的主莫得受氣。」拉班四界尋偶像，搜攏無。
36 雅各就受氣及拉班計較，對拉班講：「我有犯著甚麼過失，有甚麼罪惡，你竟然趇我即緊？
37 你遍摸我一切的家私，有搜著恁兜甚麼家私出來？通下佇你我的兄弟的面前，互𪜶佇咱二人的中間判斷。
38 我及你住此二十年，你的綿羊母、山羊母曾有落胎。你羊群中的羊牨，我未曾食伊；
39 互野獸傷害的，我無帶來互你，我本身坐額。無論日時受偷，暝時受偷，你攏對我討賠。
40 我日時互日曝，暝時互霜凍，攏𣍐顧得睏，我常常是按呢。
41 我此二十年佇你的家，為著你二個查某子給你做工十四年，為著你的羊群六年，你十擺改換我的工錢。
42 若是有我的父的上帝，就是亞伯拉罕的上帝，閣是以撒所驚畏的及我佇啲，你今穩當互我空手去。上帝看見我的苦情及我的勞碌，才佇昨暝責備你。」
雅各及拉班立約
43 拉班應雅各講：「諸個查某子是我的查某子，諸個囝仔是我的囝仔，諸個羊群亦是我的羊群；凡若你所看見的攏是我的。我的查某子及𪜶所生的囝仔，今仔日我會給𪜶做甚麼？
44 今來，咱二人通來立約，佇你我的中間做證據。」
45 雅各取石，竪做柱，
46 雅各對諸個兄弟講：「恁著拾石頭。」𪜶就將石頭拾來疊歸堆，大家就佇彼堆的邊仔食。
47 拉班名伊叫伊迦爾‧撒哈杜他，雅各名伊叫迦累得。
48 拉班講：「今仔日此個石堆做你我中間的證據。」因為按呢名伊叫迦累得，
49 也叫做米斯巴，就是講：「咱大家離別以後，願耶和華佇你我的中間鑑察。
50 你若苦楚我的查某子，閣佇我的查某子以外另外娶某，雖然無人及咱佇啲，有上帝佇你我的中間做干證。」
51 拉班閣對雅各講：「你看此堆石，你看此支柱，就是我所下佇你我的中間的。
52 此堆石做干證，此支柱做干證。我無欲過此堆石去害你；你也通過此堆石及柱來害我。
53 願亞伯拉罕的上帝，拿福的上帝，𪜶老父的上帝，佇你我的中間判斷。」雅各就指𪜶老父以撒所驚畏的上帝來咒誓，
54 雅各佇山裡獻祭，請伊許個兄弟來食。𪜶食了，就佇山裡歇暝。
55 拉班透早起來，及伊的外孫及伊的查某子唚嘴，給𪜶祝福，就起身倒去家己的所在。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。