上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
14
耶羅波安的子死
彼時，耶羅波安的子亞比雅破病。
2 耶羅波安對伊的某講：「你起來改裝，互人知你是耶羅波安的某，去示羅，佇遐有先知亞希雅。伊論到我講，欲做此個百姓的王。
3 今你的手著帶十塊麵包，及幾若塊冇冇的餅，及一矸蜜，去見伊，伊欲給你講，子會怎樣。」
4 耶羅波安的某就照按呢行，起來去示羅，來到亞希雅的家。亞希雅因為年老，目睭柴柴𣍐看見。
5 耶和華給亞希雅講：「看啊，耶羅波安的某來，欲為著伊的子來問你，因為伊有破病，你著按呢按呢給伊講。伊入來的時欲妝做別個婦仁人。」
6 伊抵仔入門，亞希雅聽見伊的腳步聲，就講：「耶羅波安的某啊，入來！你啥事妝做別個婦仁人啊？我奉差報你歹消息。
7 你倒去給耶羅波安講：『耶和華──以色列的上帝按呢講：我既然對百姓中舉起你，設立你做我的百姓以色列的君王，
8 對大衛家拆裂國賞賜你，總是你無親像我的奴僕大衛，遵守我的誡命，一心隨我，專務行我看做正直的事。
9 你竟然行歹，贏過一切佇你以前的，因為你為家己造別個上帝，及鑄的偶像，激我的受氣，棄拺我佇你的尻脊後。
10 因為按呢，我欲互災禍臨到耶羅波安的家，我欲剪除屬耶羅波安的查甫丁，無論受拘束的、抑是自由的佇以色列，也欲一盡除耶羅波安的家，親像人除糞埽到一盡了。
11 見屬耶羅波安的人，死佇城內的，狗欲食伊，死佇田野的，空中的鳥欲食伊。因為耶和華已經講啦。』
12 今你起來倒去你的家！你的腳一下入城，子就死。
13 以色列眾人欲啼哭伊，埋葬伊。因為屬耶羅波安的人，只有伊得著入墓；因為佇耶羅波安的家中，只有伊向耶和華──以色列的上帝顯出好事。
14 耶和華欲為家己興起一個王管理以色列。佇彼日，伊欲剪除耶羅波安的家；甚麼時啊？此霎就是。
15 因為耶和華欲拍以色列人，親像水中的蘆葦啲搖一樣；閣欲拔出以色列的根佇伊所賞賜𪜶列祖的好地，四散𪜶佇大河彼旁；因為𪜶造𪜶的亞舍拉，激耶和華的受氣。
16 因為耶羅波安的罪，就是伊本身所犯的罪，閣互以色列人犯罪，所以耶和華欲棄拺以色列。」
17 耶羅波安的某起身倒去，到得撒，抵仔到厝的戶椗，子就死。
18 以色列眾人埋葬伊，為伊啼哭，照耶和華託伊的奴僕先知亞希雅所講的話。
耶羅波安去世
19 耶羅波安其餘的事，伊怎樣交戰，怎樣做王，攏寫佇以色列列王的記錄。
20 耶羅波安做王共二十二年，就及伊的列祖相及睏。伊的子拿答續接伊做王。
猶大國的王羅波安
21 ( 代下 11:5—12:15 )
所羅門的子羅波安佇猶大做王。羅波安坐位的時四十一歲，佇耶路撒冷，就是耶和華對以色列眾支派中所揀安置伊的名的城，做王十七年。伊的老母名叫拿瑪，是亞捫人。
22 猶大國行耶和華所看做歹的事，對伊所行的罪激動伊痛恨，比𪜶列祖所做閣卡歹。
23 因為𪜶佇逐個高山，逐欉青翠的樹腳起壇，創柱像及亞舍拉。
24 國內也有孌童。耶和華佇以色列人的面前所趕出的列國，𪜶就學許個國一切可惡的事來行。
25 羅波安王五年，埃及王示撒上來攻擊耶路撒冷，
26 搶耶和華殿的寶物及王宮的寶物，攏帶去，閣搶所羅門所做許個金的屏牌。
27 羅波安王做銅的屏牌來替伊，交互顧守王宮門的侍衛長顧守。
28 王逐擺入耶和華的殿，侍衛就帶諸個屏牌，後來就帶倒轉，來下佇侍衛的厝。
29 羅波安其餘的事，見伊所行的，豈無記佇猶大列王的記錄嗎？
30 羅波安及耶羅波安常常交戰。
31 羅波安及伊的列祖同睏，及伊的列祖葬佇大衛的城。伊的老母名叫拿瑪，是亞捫人。羅波安的子亞比央續接伊做王。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。