上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
13 彼時，有一個上帝的奴僕趁耶和華的話對猶大來到伯特利。耶羅波安抵仔徛佇壇邊欲燒香；
2 伊趁耶和華的話攻擊彼個壇，叫講：「壇啊，壇啊！耶和華按呢講：看啊，欲有一個子出世佇大衛的家，名叫約西亞，伊欲將山頭壇的祭司，就是佇你的頂面燒香的，獻佇你的頂面，𪜶也欲將人的骨頭燒佇你的頂面。」
3 像彼日，伊也出一個兆頭，講：「看啊，此個壇欲破裂，壇頂的火灰欲傾落去，此個就是耶和華所講的兆頭。」
4 王聽見上帝的奴僕攻擊伯特利的壇所叫的話，耶羅波安就對壇頂伸手，講：「著掠伊！」伊所伸欲掠伊的手就枯焦，𣍐會勼倒轉；
5 壇就破裂，壇頂的火灰也傾落來，照上帝的奴僕趁耶和華的話所出的兆頭。
6 王應上帝的奴僕講：「請你求耶和華──你上帝的恩，替我祈禱，互我的手復原。」對按呢上帝的奴僕祈禱耶和華，王的手就復原，照起頭的款。
7 王給上帝的奴僕講：「請你及我倒去阮兜食點心，我也欲用物送你。」
8 上帝的奴僕給王講：「你就若用你王宮的一半互我，我也及你去，也佇此所在食餅飲水；
9 因為耶和華的話按呢吩咐我講，你通食餅通飲水，也通對你的原路倒來。」
10 伊就對別條路去，無對來伯特利彼條倒去。
伯特利的老先知
11 有一個老先知𫢶佇伯特利，伊的子到，用上帝的奴僕當日佇伯特利所行的給伊講，及對王所講一切的話攏給老父講。
12 老父對𪜶講：「伊對叨落一條落去？」因為伊的子曾看見對猶大來上帝的奴僕所去的路。
13 伊就吩咐伊的子講：「恁給我備辦驢。」𪜶備辦驢好，伊就騎伊，
14 去趇上帝的奴僕，抵著伊坐佇橡樹腳，就問伊講：「你是對猶大來上帝的奴僕抑是？」伊講：「我就是。」
15 伊就給伊講：「請你及我倒去阮兜食餅。」
16 伊就講：「我𣍐會及你倒去，𣍐會入你的家，也𣍐會佇此所在及你食餅飲水；
17 因為耶和華的話按呢給我講：『你佇遐通食餅通飲水，也通對你去的路倒來。』」
18 伊就給伊講：「我也是先知，及你一樣。有天使用耶和華的話給我講：『你導伊及你倒去你的厝，互伊食餅飲水。』」這攏是騙伊。
19 伊就及伊倒去，佇伊的家食餅飲水。
20 二人坐桌的時，耶和華的話臨到彼個導伊倒來的先知，
21 伊就叫彼個對猶大來上帝的奴僕講：「耶和華按呢講：因為你違背耶和華的話，無守耶和華──你上帝所命令你的命令，
22 就倒來，食餅飲水佇伊所吩咐你講佇遐通食餅通飲水的所在，所以你的身屍𣍐通入你列祖的墓。」
23 食餅飲水了後，伊就給伊所帶倒來的先知備辦驢。
24 伊去了，佇路裡有一隻獅抵著，就咬死伊，身屍放佇路裡，驢徛佇伊的身邊，獅也徛佇伊的身屍的身邊。
25 有人對遐經過，看見身屍放佇路裡，獅也徛佇身屍的邊頭，就來老先知所𫢶的城講起此個事。
26 彼個導伊對路倒來的先知聽見，就講：「這是彼個上帝的奴僕，違逆耶和華的話者，所以耶和華將伊交互獅；獅擘拆伊，咬死伊，是照耶和華對伊講的話。」
27 伊就吩咐伊的子講：「恁給我備辦驢。」𪜶就備辦。
28 伊去，看見伊的身屍放佇路裡，驢及獅徛佇身屍的邊仔，獅無食身屍，也無擘拆驢。
29 先知就取上帝的奴僕的身屍下佇驢的頂面，載倒來，到老先知的城，欲啼哭來埋葬伊；
30 就將伊的身屍來葬佇家己的墓，人就啼哭伊，講：「唉啊！我的兄啊！」
31 埋葬了後，伊就給伊的子講：「我死了後，恁著埋葬我佇上帝的奴僕所埋葬的墓內，互我的骨頭倚伊的骨頭，
32 因為伊用耶和華的話叫來攻擊伯特利的壇攻擊撒瑪利亞諸個城所有的山頭廟，伊的話的確應驗。」
耶羅波安嚴重的罪
33 此個代誌了後，耶羅波安猶原無離開伊的歹路，閣對眾百姓中設立山頭的祭司；見愛的，就分別伊，互伊做山頭的祭司。
34 此個代誌成做耶羅波安的家的罪，致到欲對地上剪除伊滅伊。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。