上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
5
所羅門準備起殿
( 代下 2:1-18 )
推羅王希蘭，差伊的奴僕去見所羅門；因為聽見人用油抹伊續接伊的老父做王，因為希蘭平素疼大衛。
2 所羅門也差人去見希蘭，講：
3 「你知我的父大衛因為四圍四方的交戰，𣍐會因為耶和華──伊的上帝的名起殿，到耶和華用對敵下佇伊的腳下。
4 今耶和華──我的上帝已經賞賜我四方平安，致到無對敵，無災禍。
5 我意思欲為耶和華──我的上帝的名起殿，是照耶和華應允我的父大衛的話講：『我欲互你的子續接你坐你的位，伊欲為我的名起殿。』
6 所以請你命令人佇黎巴嫩給我剉柏香柴，我的奴僕欲及你的奴僕相及做，我也欲照你見所定著的，將你的奴僕的工錢交你；因為你知，佇阮中間無人親像西頓人𠢕剉樹。」
7 希蘭聽見所羅門的話，就真歡喜，講：「今仔日應該謳咾耶和華；因為伊賞賜大衛一個有智慧的子，治理即多的百姓。」
8 希蘭差人去見所羅門，講：「你差人所對我講的事，我有聽見；論到柏香柴及松樹的柴，我欲照你的心願來行。
9 我的奴僕欲對黎巴嫩運伊落海，我欲絞歸排，浮佇海裡到你所給我定著的所在，我欲佇遐拆開，你通接收；你用食物互我的家，成我的心願。」
10 希蘭就用柏香柴及松樹的柴互所羅門，照伊一切所愛的。
11 所羅門互希蘭二萬歌珥的小麥，二十歌珥的清油，做伊家內的食物。所羅門逐年照按呢互希蘭。
12 耶和華照伊所應允的賞賜智慧互所羅門。希蘭及所羅門的中間有和平，𪜶二人相及立約。
13 所羅門王對以色列眾人的中間派人工，所派的人工共三萬，
14 逐月日輪流派一萬人到黎巴嫩；𪜶一月日佇黎巴嫩，二月日佇家內。亞多尼蘭做督工的。
15 所羅門有挑夫七萬，八萬人佇山裡拍石。
16 諸個以外，所羅門有用督工的大官三千三百人，𪜶監督許個做工的人。
17 王出令，𪜶就運大石寶貝的石，用拍好的石來下厝的地基。
18 所羅門的師傅及希蘭的師傅，及迦巴勒人，攏拍石，備辦柴料及石，來起殿厝。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。