上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
30 拉結看本身無給雅各生子，就怨妒伊的大姊，對雅各講：「你著子互我，若無我欲死。」
2 雅各受氣拉結，講：「互你無生的是上帝，我豈是替伊嗎？」
3 拉結講：「你看我的女婢辟拉佇遮，你去及伊同房，互伊生子抱佇我的腳頭窩，我也就通對伊得著子。」
4 拉結就將伊的女婢辟拉互伊做某，雅各就及伊同房，
5 辟拉懷孕，給雅各生一個子。
6 拉結講：「上帝給我判斷，亦聽我的聲，互我有子」，所以叫伊的名做但。
7 拉結的女婢辟拉閣懷孕，給雅各生第二個子。
8 拉結講：「我及我的大姊非常的相爭，亦得著卡贏」，就叫伊的名做拿弗他利。
9 利亞看本身停歇無生，就將伊的女婢悉帕互雅各做某。
10 利亞的女婢悉帕給雅各生子。
11 利亞講：「佳哉！」就叫伊的名做迦得。
12 利亞的女婢悉帕閣給雅各生第二個子。
13 利亞講：「我有福氣，諸個查某囝仔攏欲稱我有福氣」，就叫伊的名做亞設。
14 割麥的時，流便去田裡，得著風茄，提來互伊的老母利亞。拉結對利亞講：「請將你的子的風茄互我。」
15 利亞對伊講：「你搶奪我的丈夫，豈是小可事？你閣搶奪我的子的風茄嗎？」拉結講：「為著你的子的風茄，所以今暝伊通及你相及睏。」
16 到暗，雅各對田裡倒來，利亞出去迎接伊，講：「你著及我相及睏，因為我實在用我的子的風茄倩你。」彼暝，伊就及伊相及睏。
17 上帝允准利亞，伊就懷孕，給雅各生第五個子。
18 利亞講：「上帝互我工錢，因為我將女婢互我的丈夫」，對按呢給伊號名以薩迦。
19 利亞閣懷孕，給雅各生第六個子。
20 利亞講：「上帝賞賜我好的賞賜；我的丈夫欲及我住，因為我給伊生六個子」，對按呢給伊號名西布倫。
21 後來生一個查某子，給伊號名叫底拿。
22 上帝數念拉結，上帝允准伊，互伊會生子。
23 伊就懷孕生子，講：「上帝除去我的見誚」，
24 就給伊號名約瑟，講：「願耶和華閣加添我一個子。」
雅各及拉班定工價
25 拉結生約瑟了後，雅各對拉班講：「請差我去，互我倒去我的本所在本地。
26 請你將我服事你所得著的某子互我，容允我去；我怎樣服事你，你攏知。」
27 拉班給伊講：「我若佇你的面前得著恩典，請你及我住，因為我深知，耶和華賜我福氣是為著你的緣故」；
28 閣給伊講：「請你定著你的工錢，我就互你。」
29 雅各給伊講：「我服事你怎樣，你的精牲佇我的手頭怎樣，是你所知。
30 我未來的代先，你所有的真少，今就大發達，耶和華用福氣隨我的腳來互你。今我欲甚麼時為我的家建置產業？」
31 拉班講：「我著互你甚麼？」雅各講：「你亦免互我甚麼，有一項事，你若應承，就我猶原飼你的羊群來顧守。
32 今仔日我欲遍巡你的羊群，將綿羊中見有點的、有斑的、及黑色的，以及山羊中見有斑的、有點的，攏撥出；將來此款的做我的工錢。
33 以後你來看我的工錢，彼中間若山羊無點無斑的，綿羊無黑色的，就算是我偷的；用按呢來證明我的公道。」
34 拉班講：「好！我願照你的話行。」
35 當彼日，就將有紋、有斑的山羊牨，有點、有斑、間白的山羊母，以及黑色的綿羊，攏撥出來，交互伊許個子，
36 伊互家己及雅各相離有三日的路站。雅各就顧拉班其餘的羊。
37 雅各提青的楊樹、杏樹、楓樹軟的枝，將皮剝成白紋，互枝內白的露出，
38 將剝皮的枝，插佇羊飲水的水溝及水槽，互伊及羊相對，羊來飲的時，公母交合。
39 羊佇枝的對面交合，就生有紋的、有點的、有斑的。
40 雅各將羊仔撥出，互拉班的羊及諸個有紋及黑色的羊相對，將家己的羊另外放佇一所在，無互伊及拉班的羊參插。
41 抵著羊群中勇壯的交合的時，雅各就用樹枝插佇水溝內，互羊佇樹枝的對面交合。
42 抵著羊群的瘦的就無插樹枝。對按呢，瘦的歸拉班，勇壯的歸雅各。
43 對按呢伊大發達，得著多多羊群、女婢、奴僕、駱駝，及驢。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。