上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
7
拿單傳信息互大衛
( 代上 17:1-15 )
當王𫢶佇厝內，耶和華也已經互伊脫離四圍的對敵，得著安靜的時。
2 王給先知拿單講：「看啊，我𫢶佇柏香柴的厝內，總是上帝的櫃𫢶佇帳簾內。」
3 拿單對王講：「見若你的心所想的通去做，因為耶和華及你佇啲。」
4 彼暝，耶和華的話臨到拿單講：
5 「你去給我的奴僕大衛講，耶和華按呢講：『你欲起厝互我徛起嗎？
6 對我導以色列人出埃及的日到今仔日，我未曾𫢶佇厝裡，常常行佇布棚及會幕。
7 見我及以色列人所行到的所在，豈曾對以色列一支派的士師，就是我命令照顧我的百姓以色列的講：恁啥事無給我起柏香柴的厝啊？』
8 「今，你著給我的奴僕大衛，講萬軍的耶和華按呢講：『我對羊中，你啲趁羊群，揀你，做我的百姓以色列的君王。
9 你無論去叨落，我常常及你佇啲，佇你的面前剪除你一切的對敵。我的確互你得著大名，親像世上許個偉人的大名一樣。
10 我欲為著我的百姓以色列定著一個所在，栽培𪜶，互𪜶𫢶佇家己的所在，無閣遷徙；兇惡的類無親像早前攪擾𪜶，
11 也無親像對我命令士師管理我的百姓以色列的日。我欲互你脫離一切的對敵，得著安靜，閣耶和華給你講，耶和華欲給你建立家。
12 到你的日子已經滿、你及你的列祖相及睏的時，我欲設立你所出的後裔來續接你；我也欲堅固伊的國。
13 伊欲為我的名起殿；我欲堅固伊的國位，直到永遠。
14 我欲做伊的父，伊欲做我的子；伊若犯罪，我欲用人的柺，世間人的鞭責督伊。
15 總是我的慈愛無欲離開伊，親像我互伊離開掃羅，就是我所棄拺佇你的面前的。
16 你的家及你的國欲永遠建立佇你的面前。你的國位也欲堅固，到永遠。』」
17 拿單就照這一切的話，照這一切的啟示，按呢給大衛講。
大衛的祈禱及感恩
18 ( 代上 17:16-27 )
大衛王就入去，坐佇耶和華的面前，講：「主耶和華啊，我是是誰？我的家算做甚麼？你竟然導我到此個地位啊？
19 主耶和華啊，這你猶看做小可，你閣論到你的奴僕的家到佇久長。主耶和華啊，這是人間的例？
20 大衛猶有甚麼話通對你講啊？主耶和華啊，你知你的奴僕。
21 為著你的話，閣照你的心，你行這一切的大事，互你的奴僕知。
22 耶和華上帝啊，你是至大，照阮的耳孔所聽見的，無一個會比得你；你以外無有上帝。
23 地上有甚麼國親像你的百姓以色列啊？就是上帝去救贖伊歸佇家己做百姓，互伊有名聲閣佇你的百姓的面前，就是你對埃及及列邦，以及𪜶許個上帝所救贖出來的，為著恁行大的代誌，為著你的地做通驚的事啊！
24 你曾為家己建立你的百姓以色列，永遠做你的百姓；耶和華啊，你也做𪜶的上帝。
25 「耶和華上帝啊，今你所論到你的奴僕及你的奴僕的家，願你永遠堅固伊，照你所講的來行。
26 願人永永尊你的名做大，講：『萬軍的耶和華是管理以色列的上帝。』閣你的奴僕大衛的家欲佇你的面前堅固。
27 萬軍的耶和華──以色列的上帝啊，因為你啟示你的奴僕講：『我欲給你建立家』，所以你的奴僕好膽用此個祈禱來對你祈禱。
28 「今主耶和華啊，你是上帝啊，你的話是真實；你也用此個福氣應允你的奴僕。
29 今求你賜福你的奴僕的家，互伊永遠佇你的面前。主耶和華啊，因為你有講伊，願你的奴僕的家對你的賜福來得著福氣到永遠！」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。