上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
5
大衛做猶大及以色列王
( 代上 11:1-9 14:1-7 )
當時以色列眾支派到希伯崙見大衛，講：「看啊，阮是你的骨肉。
2 前掃羅做阮的王的時，導以色列出入的是你；耶和華也曾給你講：『你欲照顧我的百姓以色列，也欲做以色列的君王。』」
3 對按呢以色列的長老攏來希伯崙見王，大衛王佇希伯崙耶和華的面前及𪜶立約，𪜶就用油抹大衛做以色列的王。
4 大衛坐位的時三十歲，伊坐位四十年；
5 佇希伯崙做猶大王七年閣六月日，佇耶路撒冷做通以色列及猶大的王三十三年。
6 王及隨伊的人來到耶路撒冷，欲攻擊徛起彼所在的耶布斯人。𪜶對大衛講：「你若無除諸個睛瞑的、跛腳的，就𣍐入此所在」；𪜶拍算大衛決斷𣍐入遮。
7 總是大衛攻擊錫安的衛所，這就是大衛的城。
8 當彼日，大衛講：「是誰拍耶布斯人，著對水溝上去拍大衛的心所怨恨跛腳的、睛瞑的。」對按呢有俗語講：「有睛瞑、跛腳的，人𣍐會入厝。」
9 大衛𫢶佇衛所，稱彼所在做大衛的城。大衛對米羅四圍起造，也向內面。
10 大衛愈久愈強盛，因為耶和華──萬軍的上帝及伊佇啲。
11 推羅王希蘭差使者帶柏香柴及木匠、石匠到大衛遐，𪜶給大衛起厝。
12 大衛知耶和華定著設立伊做以色列王，閣為著伊的百姓以色列來興起伊的國。
13 大衛對希伯崙來了後，對耶路撒冷閣立后妃，大衛閣生子、查某子。
14 佇耶路撒冷所生的子就是沙某亞、朔罷、拿單、所羅門、
15 益轄、以利書亞、尼斐、雅非亞、
16 以利沙瑪、以利雅大、以利法列。
拍贏非利士人
17 ( 代上 14:8-17 )
非利士人聽見人用油抹大衛做以色列王，非利士的眾人就上來數想大衛；大衛聽見，就落去到營寨。
18 非利士人已經來，佈置佇利乏音的山谷。
19 大衛問耶和華講：「我通上去攻非利士人嗎？你欲將𪜶交佇我的手嗎？」耶和華給大衛講：「你通上去，因為我的確欲將非利士人交佇你的手。」
20 大衛來到巴力‧毗拉心，大衛佇遐拍𪜶，講：「耶和華佇我的面前沖散我的對敵，親像水的沖散一樣。」所以名彼所在做巴力‧毗拉心。
21 𪜶棄拺𪜶的偶像佇遐，大衛及隨伊的人拾伊去。
22 非利士人閣上來，佈置佇利乏音的山谷。
23 大衛問耶和華；耶和華講：「通直直上去，著彎到𪜶的後面，對桑材樹對面拍𪜶。
24 你聽見佇桑材樹尾有腳步聲，就著趕緊進行，因為彼時耶和華已經對恁的頭前出去攻擊非利士人的軍隊。」
25 大衛就照耶和華所吩咐的去行，攻擊非利士人，對迦巴到基色。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。