上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
1
大衛聽著掃羅的消息
掃羅死了，也大衛刣死亞瑪力人倒來的時，大衛住佇洗革拉二日。
2 到第三日，看啊，有一人對營盤對掃羅遐來，衣裳拆裂，頭殼摻土粉，到大衛遐就仆佇地裡拜伊。
3 大衛問伊講：「你對叨落來？」伊應講：「我對以色列的軍營走來。」
4 大衛閣問伊講：「代誌怎樣？請你給我講。」伊應講：「百姓對戰陣逃走，百姓多多倒啲死去；掃羅及伊的子約拿單也死。」
5 大衛給對伊講的少年人講：「你怎樣知掃羅及伊的子約拿單死啊？」
6 給伊講的少年人講：「我偶然到基利波山，看見掃羅倚佇伊的槍，有戰車、馬兵趇倚伊。
7 伊越頭看我，就叫我。我應講：『我佇遮。』
8 伊問我講：『你是甚麼人？』我應講：『我是亞瑪力人。』
9 伊閣給我講：『請你近倚我，來刣死我；因為我真痛苦，我的生命猶好好。』
10 我就近倚伊，來刣死伊，因為我知伊倒落去了的確𣍐活，我就提伊頭殼裡的冕旒、及伊的手環帶到我的主遮。」
11 大衛就拆裂衫，跟隨伊的人也是按呢，
12 為著掃羅及伊的子約拿單，及耶和華的百姓及以色列家，悲哀啼哭，禁食到日暗，因為𪜶倒佇刀下。
13 大衛給對伊講的少年人講：「你對叨落來？」應講：「我是出外人的子亞瑪力人。」
14 大衛對伊講：「你伸手刣死耶和華所抹油者，怎樣無驚啊？」
15 大衛叫一個少年人，講：「你近倚去刣死伊。」伊就去拍互伊死。
16 大衛給伊講：「你的血歸佇你的頭殼，因為你的嘴家己干證你講：『我刣死耶和華所抹油者。』」
大衛為掃羅及約拿單做哀歌
17 大衛做哀歌，追悼掃羅及伊的子約拿單，
18 閣講將此個哀歌教示猶大人。此個哀歌名叫「弓歌」，寫佇雅煞珥的冊。
19 歌講：以色列啊，
你的榮顯者受刣佇山頭！
嗐啊，英雄的死到按呢啊！
20 莫得佇迦特報告；
莫得佇亞實基倫的街路報揚；
驚了非利士的查某囝仔歡喜；
驚了無受割禮的人的查某囝仔大悅。
21 基利波山啊，願無露水無雨！
佇你遐也無出禮物的田！
因為佇遐勇士的盾牌受㧒擲；
掃羅的盾牌親像無受抹油的。
22 對受刣者的血，對勇士的油，約拿單的弓無倒退；
掃羅的刀無空空倒轉。
23 掃羅及約拿單──
活的時通疼，通歡喜的，死的時也無分離
──𪜶比鷹鳥卡緊，比獅卡強。
24 以色列的查某子啊，著為著掃羅啼哭！
伊曾互恁穿朱紅色來歡喜，
互恁的衣服有黃金的妝飾。
25 勇士怎樣倒佇戰陣！
約拿單受刣佇你的山頭。
26 我的兄約拿單啊，我為你傷心！
我盡在歡喜你！
你的疼我，真奇妙，
贏過婦仁人的疼。
27 勇士死到按呢！
戰器毀滅到按呢！
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。