上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
30
及亞瑪力人交戰
第三日，大衛及隨伊的人到洗革拉。亞瑪力人已經侵犯南方及洗革拉，也拍洗革拉，用火燒伊，
2 掠城內的婦女無論大細，無刣死一個，干單掠伊去。
3 大衛及隨伊的人到彼個城，看見城已經互火燒去，𪜶的某子查某子攏互伊掠去。
4 大衛及隨伊的人就開聲哮，哮到無力通哮。
5 大衛二個某──耶斯列人亞希暖及曾做迦密人拿八的某亞比該，也互伊掠去。
6 大衛真著急，因為百姓講：「著用石頭擲伊。」是百姓人人為著𪜶的子查某子真煩惱，總是大衛倚靠耶和華──伊的上帝，家己堅固。
7 大衛給亞希米勒的子祭司亞比亞他講：「請你給我帶以弗得來。」亞比亞他就帶以弗得到大衛遐。
8 大衛問耶和華講：「我趇此個軍隊，趇會著抑𣍐？」耶和華講：「你著趇伊，因為趇穩當著，也穩當救𪜶攏倒來。」
9 大衛就及隨伊的六百人來到比梭的溪；留啲的人歇佇遐。
10 總是大衛及四百人去追趇，有二百人厭倦，𣍐會過比梭的溪，就留佇遐。
11 𪜶佇田野抵著一個埃及人，就帶伊到大衛遐；用餅互伊，伊就食，用水互伊飲，
12 閣互伊一塊無花果餅，二葩葡萄干。伊食了，精神復倒；因為伊三日三暝無食餅，無飲水。
13 大衛問伊講：「你屬是誰？對叨落來？」伊應講：「我是埃及的少年人，是亞瑪力人的奴僕；因為我三日前破病，我的主人就放拺我。
14 阮侵犯基利提的南勢及屬猶大的地，及迦勒地的南勢，閣用火燒洗革拉。」
15 大衛問伊講：「你會導我到彼個軍隊遐抑𣍐？」伊應講：「你著給我指上帝來咒誓，無刣死我，也無將我交佇我的主人的手，我就欲導你落去到彼個軍隊遐。」
16 伊導伊落去的時，看見𪜶四散佇遍地，飲食跳舞，因為對非利士地及猶大地所搶的物真多。
17 大衛拍𪜶對黃昏暗到隔日下昏，只有四百個騎駱駝的少年人走去，以外無一人走離。
18 亞瑪力人所搶去的財物，大衛攏救倒轉，大衛也救伊二個某倒來。
19 見若亞瑪力人所搶去的，無論大細、子、查某子、財物，大衛攏帶倒轉，無失落一個。
20 大衛閣搶所有的羊群牛群，𪜶趕伊佇精牲的頭前，講：「這是大衛所取來的。」
21 大衛到許個厭倦𣍐會跟隨大衛去，留佇比梭溪的二百人遐。𪜶出來迎接大衛及隨伊的百姓。大衛進前到百姓遐請安𪜶。
22 及大衛去的人，其中有歹人匪類攏總講：「因為𪜶無及咱去，咱所救倒轉的物的確分互𪜶，干單用𪜶逐人的某、子兒互𪜶，互𪜶導去。」
23 大衛講：「兄弟啊，通將耶和華所賞賜咱的物，按呢做；因為伊保護咱，將攻擊咱的軍隊交佇咱的手。
24 此個代誌是誰欲聽趁恁啊？顧守雜物的人所得著的份額，著親像出陣的人的份額；大家著平分。」
25 對彼日以後大衛設立此個做以色列的律例法度，直到今仔日。
26 大衛到洗革拉的時，對所搶的物的中間提起來寄去送伊的朋友猶大的長老，講：「看啊，諸個是對耶和華的對敵搶來的，送互恁做禮物。」
27 就是送互𫢶佇伯特利的，𫢶佇南方的拉末的，𫢶佇雅提珥的；
28 𫢶佇亞羅珥的，𫢶佇息末的，𫢶佇以實提莫的；
29 𫢶佇拉哈勒的，𫢶佇耶拉蔑人諸個城的，𫢶佇基尼人許個城的；
30 𫢶佇何珥瑪的，𫢶佇歌拉珊的，𫢶佇亞撻的；
31 𫢶佇希伯崙的，以及大衛及隨伊的人平素所往來的所在攏互伊。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。