上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
23
大衛救基伊拉
有人報大衛講：「看啊，非利士人拍基伊拉，搶五穀場。」
2 大衛就問耶和華講：「我通去拍許個非利士人抑通？」耶和華給大衛講：「你通去拍非利士人，救基伊拉。」
3 隨大衛的人給伊講：「咱佇猶大地遮尚且驚惶，何況去基伊拉拍非利士人的軍隊啊？」
4 大衛閣問耶和華。耶和華應講：「你起來落去基伊拉，因為我欲用非利士人交佇你的手。」
5 大衛及隨伊的人去基伊拉，及非利士人交戰，搶𪜶的精牲，刣死𪜶多多人。按呢，大衛救基伊拉徛起的百姓。
6 亞希米勒的子亞比亞他走去到基伊拉見大衛的時，手裡帶以弗得落去。
7 有人給掃羅講：「大衛到基伊拉。」掃羅講：「上帝將伊交佇我的手；因為伊入有門有閂的城，關住佇彼內面。」
8 掃羅就招集眾百姓，欲去交戰落去基伊拉，圍困大衛及隨伊的人。
9 大衛知掃羅設計謀欲害伊，就給亞比亞他講：「你帶以弗得來。」
10 大衛講：「耶和華──以色列的上帝啊，你的奴僕確實聽見掃羅愛欲來基伊拉，欲為著我的緣故滅此個城。
11 基伊拉人欲將我交佇伊的手抑無？掃羅欲照你的奴僕所聽見的落來抑無？耶和華──以色列的上帝啊，求你指示你的奴僕！」耶和華講：「掃羅欲落來。」
12 大衛閣講：「基伊拉人欲將我及隨我的人交佇掃羅的手嗎？耶和華講：「𪜶欲將你交互伊。」
13 大衛及隨伊的人約略六百，就起身出基伊拉，去𪜶所去的所在。有人給掃羅講，大衛已經對基伊拉逃走；掃羅就無出去。
大衛佇山裡
14 大衛𫢶佇曠野的衛所，常常佇西弗曠野的山地。掃羅逐日尋伊，總是上帝無將大衛交佇伊的手。
15 大衛知掃羅已經出來啲數想伊的生命。彼時，大衛佇西弗的曠野𫢶佇樹林內；
16 掃羅的子約拿單起身，去彼個樹林內見大衛，互伊靠上帝來堅固，
17 就給伊講：「免驚！我的父掃羅的手尋你𣍐著；你欲做以色列王，我欲做你的第二。此個事我的父掃羅已經知。」
18 對按呢二人佇耶和華的面前結約。大衛𫢶樹林，約拿單倒去伊的厝。
19 西弗人上去基比亞見掃羅，講：「大衛豈是𫢶佇阮遐匿佇樹林內的衛所，佇耶示們南旁的哈基拉山嗎？
20 王啊，請你照你的心所愛落去的落去，將伊交佇王的手是阮的代。」
21 掃羅講：「願耶和華賜福恁，因為恁可憐我。
22 請恁倒去，閣代先備辦詳細知，探看伊行踏的所在，甚麼人看見伊佇遐，因為有人給我講伊真狡怪。
23 所以恁著查看，知伊一切家己匿密的所在，倒轉來用實情給我講，我就欲及恁去。伊若佇此個境內，我欲佇猶大的眾鄉社給伊搜出來。」
24 𪜶就起身，代先掃羅去西弗。
大衛及隨伊的人𫢶佇瑪雲的曠野佇耶示們南勢的亞拉巴。
25 掃羅及隨伊的人去尋伊；有人給大衛講，伊就落去到石磐，𫢶佇瑪雲的曠野。掃羅聽見，就佇瑪雲的曠野追趇大衛。
26 掃羅行佇山的此旁，大衛及隨伊的人行佇山的彼旁。大衛緊急行閃避佇掃羅的面前；因為掃羅及隨伊的人，四面圍大衛及隨伊的人，欲掠𪜶。
27 有使者到來報掃羅講：「你著緊緊倒來，因為非利士人侵犯境界。」
28 對按呢掃羅無趇大衛，倒去抵敵非利士人。因為按呢彼個所在名叫西拉‧哈瑪希羅結。
29 大衛對遐上去，𫢶佇隱‧基底的衛所。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。