上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
19
掃羅迫害大衛
掃羅對伊的子約拿單及眾人臣講，著刣死大衛；總是掃羅的子約拿單不止歡喜大衛。
2 約拿單給大衛講：「我的老父掃羅想欲刣你，所以明仔早起你著小心，到一個偏僻的所在，家己匿。
3 我欲去你所匿的田，徛佇我的老父身邊，我及我的老父議論你的事。我所看見的，我欲給你講。」
4 約拿單對伊的老父掃羅論大衛替伊講好話，講：「王通得罪你的奴僕大衛；因為伊未曾得罪你，伊對你所行的攏是好。
5 因為伊曾拚命刣死彼個非利士人，耶和華為以色列眾人大行拯救；彼時你看見，不止歡喜，今啥事無緣故欲刣死大衛，流無罪的人的血，來犯罪啊？」
6 掃羅聽約拿單的話，掃羅指耶和華的活來咒誓講：「我無欲互伊死。」
7 約拿單叫大衛來，約拿單將這一切的話給伊講，約拿單導大衛去見掃羅。伊猶原徛佇掃羅的面前。
8 以後閣有交戰。大衛出去及非利士人交戰，大大刣死𪜶，𪜶就佇伊的面前逃走。
9 （掃羅坐佇厝內手攑槍），彼時對耶和華遐來的歹神閣臨到伊，大衛用手彈琴。
10 掃羅欲用槍刺大衛，釘伊佇壁裡；伊就對掃羅的面前閃開，彼支槍鑿入壁。彼暝大衛就走，來閃避伊。
11 掃羅差人到大衛的厝守伊，聽候天光欲刣伊。大衛的某米甲對伊講：「你今暝若無逃命，明仔日你欲受刣。」
12 米甲就對窗仔墜大衛落去，伊就走去，來閃避。
13 米甲用家內的偶像下佇眠床，頭殼靠佇山羊毛的枕頭，用被蓋伊。
14 掃羅差人去掠大衛，米甲講：「伊破病。」
15 掃羅閣差人去看大衛，講：「連眠床扛來我遮，我通刣死伊。」
16 使者入去，看見床裡有偶像，頭殼靠佇山羊毛的枕頭。
17 掃羅對米甲講：「你啥事按呢騙我，放我的對敵逃走啊？」米甲應講：「伊給我講：『你放我去，我豈著刣死你嗎？』」
18 大衛走去，逃閃到拉瑪見撒母耳，將掃羅對伊所行的事攏總給伊講。伊及撒母耳就去拿約徛起。
19 有人給掃羅講，看啊，大衛佇拉瑪的拿約。
20 掃羅差使者去掠大衛。𪜶看見一陣先知啲講先知話，閣撒母耳徛佇𪜶中間監督𪜶；上帝的神臨到掃羅的使者，𪜶也講先知話。
21 有人將此個事給掃羅講，伊就差別個使者去，𪜶也講先知話。掃羅第三擺差使者去，𪜶也講先知話。
22 後來伊本身也去拉瑪，到西沽的大井遐，問人講：「撒母耳及大衛佇叨落？」有人給伊講：「看啊，佇拉瑪的拿約。」
23 伊就去拉瑪的拿約。上帝的神也臨到伊，伊愈行愈講先知話，直到拉瑪的拿約。
24 伊就褪衫，佇撒母耳的面前講先知話，通日通暝褪裼倒啲。對按呢人啲講：「掃羅也列佇先知中嗎？」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。