上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
10 撒母耳提一瓶油倒佇掃羅的頭殼，給伊唚，講：「這豈是耶和華抹你做伊的業的頭人嗎？
2 今仔日你離開我了後，佇便雅憫交界的泄撒，近拉結的墓，欲抵著二人。𪜶欲給你講：『你去尋許個驢母已經尋著。今你的老父無啲掛慮驢，是啲煩惱你，講：我為著我的子欲怎樣啊？』
3 你欲對遐去，到他泊的橡樹遐，欲有三人抵著你，𪜶是欲去伯特利到上帝遐：一個帶三隻山羊仔，一個帶三個餅，一個帶一皮袋的酒。
4 𪜶欲問你平安，用二個餅互你，你就對𪜶的手接來。
5 此霎了後你欲到上帝的山，佇遐有非利士人防守的兵。你到城的時，欲抵著一陣先知對高的所在落來，佇𪜶的頭前有瑟，有鈴瓏鼓、有笛仔、有琴，𪜶攏講先知話。
6 耶和華的神欲大大臨到你，你也欲及𪜶講先知話；你欲變做新的人。
7 諸個兆頭臨到你，你著趁機會來做，因為上帝及你佇啲。
8 你著代先我落去吉甲，我也欲落去你遐獻燒祭及謝恩祭。你著聽候七日，聽候我到你遐，指示你著行的事。」
9 伊越轉身欲離開撒母耳，上帝換新伊的心。當彼日諸個兆頭攏應驗。
10 𪜶已經到彼個山，有一陣先知人抵著伊，上帝的神大大臨到掃羅，伊就佇𪜶中間講先知話。
11 平素識伊的人，看伊佇先知中啲講先知話，就相及講：「基士的子抵著按呢是怎樣？掃羅也列佇先知中嗎？」
12 彼所在有一人應講：「許個人的老父是是誰啊？」對按呢有一句俗語講：「掃羅也列佇先知中嗎？」
13 掃羅講先知話明白，就上去高的所在。
14 掃羅的叔問掃羅及伊的奴僕講：「恁去叨落？」應講：「去尋驢母。尋伊無，就去撒母耳遐。」
15 掃羅的叔講：「請你給我講，撒母耳給恁講甚麼。」
16 掃羅給伊的叔講：「伊明明給阮講驢母已經尋著啦。」論到撒母耳所講國的事，伊無給伊講。
掃羅受揀做王
17 撒母耳招集百姓到米斯巴耶和華遐，
18 給以色列人講：「耶和華──以色列的上帝按呢講：『我導以色列出埃及，救恁脫離埃及人的手，也脫離攏總許個制壓恁國的手。』
19 總是恁今仔日有棄拺恁的上帝，就是本身救恁脫離一切患難艱苦的，恁也對伊講：『著設立王管理阮。』今恁著照恁的支派，恁的宗族來徛佇耶和華的面前。」
20 對按呢，撒母耳互以色列眾支派近前來，就取著便雅憫的支派；
21 閣互便雅憫支派照𪜶的宗族近前來，就取著瑪特利族，對彼中間閣取著基士的子掃羅。人尋伊也尋𣍐著，
22 所以就閣問耶和華講：「彼人有來遮抑未？」耶和華講：「伊匿佇雜物的中間。」
23 𪜶就走去對遐導伊出來。伊徛佇百姓的中間，比眾百姓卡高一個頭殼。
24 撒母耳給眾百姓講：「耶和華所揀的人，佇百姓中無一個會比得伊，恁看見嗎？」眾百姓就大聲叫講：「願王萬歲！」
25 撒母耳將國法對百姓講明，閣記佇冊裡，下佇耶和華的面前，然後撒母耳四散眾人，逐個倒去𪜶的家。
26 掃羅也倒去基比亞到伊的家，有一陣人互上帝感動伊的心的隨伊去。
27 許個匪類講：「此人豈會救咱啊？」就藐視掃羅，無送伊禮物；總是掃羅靜靜。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。