上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
4
約櫃受搶
以色列人出去欲及非利士人交戰，紮營近佇以便以謝；非利士人紮營佇亞弗。
2 非利士人排陣攻擊以色列人。交戰的時，以色列人刣輸佇非利士人的面前；非利士人佇平洋刣死𪜶的軍兵約略四千人。
3 百姓倒來到營內，以色列的長老講：「耶和華今仔日啥事互咱刣輸佇非利士人的面前啊？咱值著扛耶和華的約櫃對示羅來咱遮，互伊佇咱中間通救咱脫離咱的對敵的手。」
4 百姓就差人到示羅，對遐扛坐佇𠼻𡀔兵的中間萬軍的耶和華的約櫃來。以利二個子何弗尼、非尼哈及上帝的約櫃佇遐。
5 耶和華的約櫃到營中，以色列眾人就大聲喝，地續會應聲。
6 非利士人聽見大聲啲喝的聲音，就講：「佇希伯來的營按呢大聲喝，是甚麼緣故？」後來就知耶和華的約櫃到營中。
7 非利士人就驚惶，講：「有上帝到𪜶的營中」；閣講：「咱有災禍啦！平素曾有此個事。
8 咱有災禍啦！是誰會救咱脫離諸個大權能的上帝的手啊？前佇曠野用逐樣的災禍拍埃及人的，就是諸個上帝。
9 非利士人啊，恁著勇敢，著做大丈夫，免得恁服事希伯來人，親像𪜶服事恁一樣。恁著做大丈夫，及𪜶交戰。」
10 非利士人就交戰，以色列人刣輸，逐個走倒去𪜶的布棚，刣死真多，以色列的步兵死三萬人。
11 上帝的約櫃互𪜶搶去，以利二個子何弗尼、非尼哈也死。
以利的死
12 有一個便雅憫人對戰陣走來，衫拆裂，頭殼摻土粉，像彼日到示羅。
13 伊到的時，抵當以利佇路邊坐佇伊的位啲瞭望，因為伊的心為著上帝的約櫃來掛慮。彼人入城報消息，通城的人就攏喉叫。
14 以利聽見喉叫的聲就問講：此個嘩嘩哮的聲是甚麼緣故啊？」彼人趕緊來報以利。
15 彼時以利九十八歲，目睭柴柴，𣍐會看見。
16 彼人給以利講：「我是對戰陣來的，今仔日我對戰陣走來。」以利講：「我的子啊，代誌怎樣？」
17 報消息的應講：「以色列人佇非利士人的面前逃走，百姓中受刣的不止多！你二個子何弗尼、非尼哈也死，上帝的約櫃續互𪜶搶去。」
18 伊一下講起上帝的櫃，以利就對伊的坐位向對後面，跋倒佇門邊頷頸折就死；因為伊年老，身體重。以利做以色列的士師四十年。
非尼哈的某死
19 以利的媳婦、非尼哈的某懷孕欲到期，伊聽見上帝的櫃互人搶去，乾官及丈夫攏死的消息，就曲痀來生子，因為大痛疼忽然到；
20 啲欲死的時，邊頭啲徛許個婦仁人給伊講：「免驚！你生查甫囝仔啦。」總是伊無應，也無關心。
21 伊給囝仔號名以迦博，講：「榮光離開以色列！」這是因為上帝的櫃互人搶，閣因為乾官及丈夫也死。
22 伊閣講：「榮光離開以色列，因為上帝的櫃受搶。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。