上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
路得記
2
路得佇波阿斯田裡拾麥屑
拿俄米有伊的丈夫的親人就是以利米勒的該親，有一人名叫波阿斯，是大好額的人。
2 摩押的查某子路得給拿俄米講：「互我去園裡，我若得著恩典，佇甚麼人的面前就通佇彼人的後面拾麥屑。」伊給伊講：「我的查某子啊，做你去。」
3 伊就去，已經到，就隨割麥的人佇園裡拾麥屑。伊湊巧到以利米勒的該親波阿斯的一區園。
4 波阿斯對伯利恆來，對割麥的人講：「願耶和華及恁佇啲！」𪜶應講：「願耶和華賜福你！」
5 波阿斯問伊所派割麥的頭人講：「彼個是甚麼人的查某子？」
6 割麥的頭人應講：「此個是摩押的查某子，及拿俄米對摩押地倒來的。
7 伊講：『請你准我拾麥屑，佇割麥者的後面佇歸捆中拾伊。』伊就來，對早起到今，定定住遮，只有歇佇厝內霎仔久。」
8 波阿斯給路得講：「我的查某子啊，你著聽，莫得去別區園拾麥屑，也莫得離開遮，著按呢及我諸個女婢做陣。
9 你著看𪜶佇叨落一區啲收割，就隨𪜶去。我豈無吩咐許個少年人通摸著你；你若嘴乾，就去許個器具遐飲少年人所汲的。」
10 伊就仆佇地裡拜伊，給伊講：「我是外國人，怎樣會得著恩典佇你的面前，按呢看顧我啊？」
11 波阿斯應講：「對你的丈夫死了後，見你款待乾家的事，閣你離開父母及你出世的所在，來到你平素識的百姓遮，人攏有給我講明啦。
12 願耶和華報答你的所做。你來歇佇耶和華──以色列上帝的翅下，願你得著伊的大賞賜。」
13 伊講：「我的主啊，願我得著恩典佇你的面前。我雖然𣍐比得你的女婢的一個，你猶久安慰我對你的女婢講好話。」
14 食的時，波阿斯給伊講：「你來遮食餅，用你彼塊搵醋。」伊就坐佇割麥的人的邊頭；𪜶提烘的麥穗互伊。伊食飽，猶有剩。
15 伊起來去拾麥屑，波阿斯吩咐少年人講：「伊就若佇歸捆的中間拾麥屑，也著容允伊，通互伊見誚；
16 也著對歸捆的抽淡薄，放佇地裡互伊拾，通喝伊。」
17 按呢，佇園裡拾麥屑，到下昏，就拍伊所拾的，約略一伊法的大麥。
18 伊帶伊所拾的入城互伊的乾家看，也將伊食飽所剩的提出來互伊。
19 乾家問伊講：「你今仔日佇叨落拾麥屑，佇叨落做工啊？願彼個看顧你的得著福氣。」伊就給乾家講伊佇叨落做工，講：「今仔日我做工佇遐彼人名叫波阿斯。」
20 拿俄米給伊的媳婦講：「願伊得著耶和華賜福，就是施恩互活人死人無息的。」拿俄米閣講：「彼人是咱的親人，是咱該親的一個通贖回咱的產業。」
21 摩押的查某子路得講：「伊也有給我講：『你著跟隨我許個少年人，直到𪜶給我收割明白。』」
22 拿俄米給伊的媳婦路得講：「我的查某子啊，你及伊的女婢出去，是好，無互人看見你佇別人的園。」
23 對按呢伊及波阿斯的女婢做陣拾麥屑，到大麥小麥收明白。伊猶原及乾家相及住。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。