上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
18
米迦及但支族
彼時，以色列中無王。彼時但的人的支派尋地做業通徛起；因為到彼日，佇以色列支派中𪜶猶未得著業。
2 但的人對瑣拉及以實陶差本族眾百姓中五個勇士，去偷看彼個地來查考，吩咐𪜶講：「恁去查考彼個地。」𪜶來到以法蓮山，入米迦的厝，就歇佇遐。
3 𪜶近米迦的厝，認著彼個少年利未人的聲音，就入去問伊：「是誰導你來遮？你佇遮做甚麼？你佇遮得著甚麼？」
4 伊講：「米迦款待我按呢按呢，伊有倩我，我做伊的祭司。」
5 𪜶給伊講：「請你問上帝，互阮知阮所啲行的路，亨通抑無？」
6 祭司給𪜶講：「恁通平安去，恁所行的路是佇耶和華的面前。」
7 五人就起身，來到拉億，看見遐的百姓安然徛起平安無掛慮，親像 西頓人一樣。佇遐無有掌權用甚麼事來攪擾𪜶；𪜶離開西頓人遠遠，無及別人往來。
8 五人倒來到瑣拉、以實陶，𪜶兄弟遐；兄弟問𪜶講：「恁有甚麼話？」
9 𪜶應講：「起來，咱上來去攻擊𪜶！因為阮已經看彼個地，看啊，彼個地真好。恁啥事恬恬？著來去入，得著彼個地做業，通延迁。
10 恁到遐，欲看安然徛起的百姓，所在也開闊。上帝已經將彼所在交佇恁的手；地上所有的物，彼所在無欠一項。」
11 對按呢但族的六百人，逐個帶軍器，對瑣拉及以實陶進前去，
12 𪜶上去紮營佇猶大的基列‧耶琳。所以叫此所在名瑪哈呢‧但，到今仔日。看啊，這是佇基列‧耶琳的後面。
13 𪜶對遐去以法蓮山地，到米迦的厝。
14 從前偷看拉億地的五人給𪜶的兄弟講：「諸個厝內有以弗得及家內偶像，及雕刻的像鑄的像，恁知嗎？今恁著想看欲怎樣做。」
15 𪜶就越去遐，到彼個少年的利未人的厝，就是米迦的厝問伊平安。
16 但族許個六百人帶軍器，攏徛佇門口。
17 偷看地的五人就入去，將雕刻的像、以弗得、家內的像、及鑄的像，攏提去。祭司及帶軍器的六百人，相及徛佇門口。
18 彼五人入米迦的厝，提雕刻的偶像、以弗得、家內的偶像，及鑄的像，祭司就問𪜶講：「恁做甚麼啊？」
19 𪜶應講：「莫得做聲，用手掩嘴，隨阮來去！做阮的父、做阮的祭司。你做一人的家的祭司卡好？抑是做以色列一支派一族的祭司卡好啊？」
20 祭司心歡喜，就提以弗得及家內的偶像，及雕刻的像，行佇百姓的中間。
21 𪜶就越轉身離開遐，互囝仔、精牲、貨財做頭前。
22 離開米迦的厝嶄然遠，米迦許個厝邊攏聚集，追趕但的人，喉叫但的人。
23 但的人越頭看問米迦講：「你聚集許個人來是甚麼代誌啊？」
24 伊講：「我所妝的上帝及祭司恁攏帶去，我猶有剩甚麼？怎樣猶問我講『你甚麼代誌』啊？」
25 但的人給伊講：「你通互阮聽見你的聲，驚了躁性的人來共恁，致到你及全家攏失落生命。」
26 但的人做𪜶行。米迦看見𪜶比伊卡強，就越轉身倒去伊的厝。
27 𪜶帶米迦所做的及伊所有的祭司到拉億，看見安然無掛慮的百姓，就用刀刣死𪜶，閣放火燒彼個城，
28 也無人拯救；因為離開西頓真遠，𪜶閣無及別人往來。彼個城佇彼個倚近伯‧利合的山谷。
29 但的人閣佇遐起城來徛起，照𪜶祖公以色列的子但的名，叫彼個城名但；彼個城起頭名叫拉億。
30 但的人就為家己祀彼個雕刻的像。摩西的孫、革舜的子約拿單，及伊的子孫做但的支派的祭司，直到彼地方的人抵著掠的日。
31 上帝的厝佇示羅許個日，但的人為家己祀米迦所做雕刻的像。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。