上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
14
參孫及亭拿的查某囝仔
參孫落去亭拿，佇亭拿看見一個查某囝仔，就是非利士人的查某子。
2 參孫上去給伊老父老母講：「我佇亭拿看見一個查某囝仔，是非利士人的查某子，願恁給我娶伊來做某。」
3 伊的老父伊的老母給伊講：「佇你兄弟中的查某囝仔，抑是佇咱百姓中，豈無一個查某囝仔，致到你去佇無受割禮的非利士人中娶某啊？」參孫給伊的老父講：「願你給我娶伊，因為伊是我合意的。」
4 總是伊的老父伊的老母知此個事是出佇耶和華，因為伊尋機會攻擊非利士。彼時，非利士人管轄以色列。
5 參孫及伊的父母落去亭拿，到亭拿的葡萄園，抵當有一隻獅仔哮來倚伊。
6 耶和華的神大大臨到參孫，伊的手無家私，也拆裂伊，親像拆裂山羊仔一樣。伊也無給伊的父母講伊所行的事。
7 伊落去及查某囝仔講話，伊是參孫所合意的；
8 閣有許久，倒轉欲來娶伊，越對路邊欲看死的獅，看見有一巢蜂及蜜佇獅的身屍內，
9 手提蜜去行，愈行愈食；到伊的父母遐，就互𪜶，𪜶也食；總是無給伊講此個蜜是對獅的身屍提來的。
10 伊的老父落去到查某囝仔遐。參孫佇遐設筵席，因為平素少年人攏有此號的風俗。
11 𪜶看見參孫，就導三十個伴來陪伊。
12 參孫給𪜶講：「我今欲出一個猜互恁，恁佇筵席的七日內，若會猜出意思來給我講，我就欲互恁三十領的幼苧衫，三十套的外衫；
13 恁若𣍐會給我講，恁就著互我三十領的幼苧衫，三十套的外衫。」𪜶講：「請出你的猜互阮聽。」
14 伊就給𪜶講：
對食的出食物；
對強的出甜。
𪜶三日久猜𣍐出。
15 到第七日，𪜶給參孫的某講：「你著漏你的丈夫，互伊用猜的意思給阮講，免得阮用火燒你及你的老父的厝。恁請阮來，是欲搶阮抑是？」
16 參孫的某啼哭佇伊的面前講：「你是怨恨我，是疼我，因為你出猜互我本國的人，也無給我講明。」伊應伊講：「連我的老父老母都無給伊講，豈通給你講嗎？」
17 佇筵席的七日內，伊啼哭佇伊的丈夫的面前，到第七日就給伊講，因為伊迫伊真殄，伊的某就給伊本國的人講。
18 到第七日，日猶未落的代先，城內的百姓給參孫講：
有甚麼比蜜卡甜啊？
有甚麼比獅卡強啊？
參孫給𪜶講：
恁若是用我的牛種仔犂田，
我的猜就猜𣍐出。
19 耶和華的神大大臨到參孫，伊就落去到亞實基倫，刣死𪜶中間三十人，搶𪜶，將許個衫互猜著的人。參孫大受氣，就上去𪜶老父的家。
20 參孫的某就嫁互伊的陪伴，就是參孫用做伊的朋友的。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。