上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
7
基甸拍敗米甸人
耶路‧巴力就是基甸，伊及一切隨伊的人早早起來，佇哈律水泉邊紮營。米甸營佇𪜶北勢的山谷，倚近摩利山。
2 耶和華對基甸講：「我用米甸交佇百姓的手，拘隨你的人甚多，驚了以色列人對佇我來家己誇口，講：『是我家己的手救我。』
3 今你著宣佈互百姓聽：『見若驚惶愞懾的人，通離開基列山倒去。』」對按呢百姓中有二萬二千人倒去，猶有剩一萬。
4 耶和華對基甸講：「人猶久甚多；你著導𪜶落去到水邊，我欲佇遐給你試𪜶。見若我指甚麼人對你講：『此人通及你去』，彼人就通及你去；我指甚麼人給你講：『此人通及你去』，彼人就通去。」
5 基甸就導百姓落去到水邊。耶和華對基甸講：「見若用舌餂水，親像狗啲餂，彼人著互伊另外徛啲；見若跪落去飲水的，也著互伊另外徛啲。」
6 用手倚嘴來餂水的有三百人，其餘許個百姓攏跪落去飲水。
7 耶和華給基甸講：「我欲用諸個餂水的三百人救恁，將米甸人交佇你的手；眾百姓攏通倒去伊的所在。」
8 百姓手裡就帶乾糧及𪜶的哨角；基甸差以色列眾人逐人倒去𪜶的布棚，只有留此三百人。米甸的營紮佇伊下面的山谷。
9 像彼暝，耶和華給基甸講：「起來，落去到彼個營盤，因為我已經將伊交佇你的手。
10 你若敢落去，你及你的奴僕普拉著落去彼個營盤。
11 你欲聽見𪜶所講的，然後你就有膽力落去到營盤。」伊就及伊的奴僕普拉落去到營盤帶軍器者的邊仔。
12 米甸人、亞瑪力人，及東方的眾人，攏倒佇山谷，親像草蜢許多。𪜶的駱駝𣍐算得，多親像海墘的沙。
13 基甸已經到，有人用夢給伊的同伴講：「我夢見一個夢，看啊，有一個大麥餅翱入米甸的營，到一個布棚，衝互伊倒，互布棚反輪轉倒到平地。」
14 伊的同伴應講：「這是別項，就是以色列人約阿施的子基甸的刀；上帝已經將米甸及伊的全軍交佇伊的手。」
15 基甸聽見此個夢的話及伊的解說，就敬拜上帝，倒來到以色列的營中，講：「起來啊！因為耶和華已經將米甸的軍隊交佇恁的手啦。」
16 伊就分三百人做三隊，用哨角及空甕交佇逐人的手（甕內攏囥火把），
17 給𪜶講：「恁著看我的樣來做：我到彼個營盤邊我所做的，恁也著按呢做。
18 我及許個及我佇啲的人歕哨角的時，恁也著佇營的四圍歕哨角，講：『為著耶和華也為著基甸！』」
19 基甸及隨伊的一百人，佇三更頭，來到營邊，彼時守更的抵仔換班，𪜶就歕哨角，摃破手裡的甕。
20 三隊的人就攏歕哨角，摃破甕，倒手攑火把，正手攑哨角來歕，喝講：「耶和華及基甸的刀！」
21 𪜶佇營的四圍逐個徛家己的位；全營的人攏走，喝喊互𪜶逃走。
22 歕三百支哨角的時，耶和華互全營的人逐個用刀相刣，軍隊走到西利拉的伯‧哈示他，閣到亞伯‧米何拉的界近佇他巴。
23 以色列人就對拿弗他利、亞設，及瑪拿西聚集來追趕米甸。
24 基甸差人遍行以法蓮的山地，講：「恁落來攻擊米甸，趁𪜶未到把守許個渡頭，直到伯‧巴拉就是約但。」對按呢以法蓮的眾人聚集，把守許個渡頭，直到伯‧巴拉就是約但，
25 也掠著米甸二個首領：俄立及西伊伯；刣死俄立佇俄立的石磐，刣死西伊伯佇西伊伯的酒窟遐；閣追趕米甸人，帶俄立及西伊伯的頭殼到約但彼旁，基甸遐。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。