上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
6
基甸
以色列人閣行耶和華所看做歹的事，耶和華就交𪜶佇米甸的手歷過七年。
2 米甸的手壓制以色列人；以色列人為著米甸人的緣故，就為家己佇山裡開穴及洞，及險要的所在。
3 以色列人撒種了後，米甸人、亞瑪力人，及東方的人攏上來攻擊𪜶，
4 紮營佇𪜶的對面，拍歹彼所在的土產，到迦薩，無留食物互以色列人，羊、及牛、及驢也無；
5 因為𪜶帶精牲及布棚上來，親像草蜢許多來，人及駱駝算𣍐了，𪜶入此個地方欲拍歹伊。
6 以色列人因為米甸人的緣故，困苦到極，以色列人就求叫耶和華。
7 以色列人因為米甸人的緣故，求叫耶和華的時，
8 耶和華就差先知到以色列人遐，對𪜶講：「耶和華──以色列的上帝按呢講：『我曾導恁對埃及上來，對做奴才的家出來，
9 我也救恁脫離埃及人的手，也脫離一切壓制恁的人的手，對恁的面前趕𪜶出，用𪜶的地互恁』；
10 我也對恁講：『我是耶和華──恁的上帝。恁徛起亞摩利人的地，通驚𪜶的上帝。總是恁聽我的話。』」
11 耶和華的使者到俄弗拉，坐佇亞比以謝族的人約阿施的橡樹腳。約阿施的子基甸佇酒窟遐啲拍麥，愛互米甸人看見。
12 耶和華的使者對基甸顯現，對伊講：「大氣力的勇士啊，耶和華及你佇啲！」
13 基甸對伊講：「我的主啊，若耶和華及阮佇啲，阮怎樣抵著這一切的事啊？阮的列祖所給阮講耶和華許個奇事佇叨落啊？𪜶講『伊豈無導阮對埃及上來』嗎？今耶和華放拺阮，將阮交佇米甸人的手。」
14 耶和華看基甸，給伊講：「著用你此個力去，來救以色列出米甸人的手，我豈無差你嗎？」
15 基甸給伊講：「主啊，我欲用甚麼救以色列？看啊，我的家是瑪拿西中第一喪鄉的。佇我老父的家我是第一細的。」
16 耶和華對伊講：「我欲及你佇啲，你欲拍米甸人，親像拍一人一樣。」
17 伊給伊講：「我若佇你的面前得著恩典，求你互我一個兆頭，通知及我講的就是你。
18 請你通離開遮，聽候我閣來你遮帶我的禮物下佇你的面前。」伊講：「我欲聽候你閣來。」
19 基甸去備辦一隻山羊仔，用一伊法的麵粉做無酵餅、肉下佇筐裡，湯貯佇壺裡，帶到橡樹腳，獻互伊。
20 上帝的使者吩咐伊講：「肉及無酵餅下佇此個石磐頂，湯倒出來。」伊照按呢行。
21 耶和華的使者伸出手裡所攑的枴仔尾，來抵著肉及無酵餅，就有火對石磐出來，一盡燒肉及無酵餅。耶和華的使者就去無閣看見。
22 基甸看出伊是耶和華的使者，基甸就講：「嗐啊！主耶和華啊，因為我當面看見耶和華的使者。」
23 耶和華對伊講：「安你的心，免驚，你𣍐致到死。」
24 基甸就佇遐給耶和華起一座壇，號名叫「耶和華沙龍」。（此個壇佇亞比以謝族的俄弗拉到今仔日猶佇啲。）
25 彼暝，耶和華吩咐基甸講：「你牽你老父的牛仔來，就是七年的第二隻牛，也著拆毀你老父所有巴力的壇，剉壇邊的亞舍拉，
26 佇此個山寨照合宜的法，為耶和華──你上帝起一座壇，用第二隻牛獻做燒祭，用你所欲剉的亞舍拉做柴。」
27 基甸就對伊的奴僕中導十人，照耶和華吩咐伊去行。伊因為驚老父的家及城內的人，日時敢做此個事，就佇暝時做伊。
28 城內的人清早起來，看見巴力的壇拆毀，壇邊的亞舍拉剉落，第二隻牛獻佇所起的壇，
29 𪜶相及講：「甚麼人做此個事啊？」𪜶查問了後，就講：「這是約阿施的子基甸做的。」
30 城內的人對約阿施講：「掠你的子出來，通互伊死；因為伊拆毀巴力的壇，剉壇邊的亞舍拉。」
31 約阿施給一切徛啲攻擊伊的人講：「恁欲為巴力爭辯嗎？恁欲救伊嗎？若有人為伊爭辯，趁早起著互伊死！巴力若是上帝，才互伊為家己爭辯，因為人拆毀伊的壇。」
32 對彼日叫伊的名耶路‧巴力，是講：「巴力著及伊爭辯，因為伊毀壞伊的壇。」
33 彼時，米甸人、亞瑪力人，及東方的百姓攏聚集過河，佇耶斯列的山谷紮營。
34 耶和華的神臨到基甸，伊就歕哨角；亞比以謝族攏聚集跟隨伊。
35 伊差人遍行瑪拿西，瑪拿西人也聚集來隨伊；閣差人去見亞設人、西布倫人、拿弗他利人，𪜶也攏上來及𪜶聯合。
36 基甸對上帝講：「你若照你所講的，欲用我的手來救以色列，
37 我就用歸領的羊毛下佇五穀場：若干單羊毛有露水，土腳攏乾乾，我就知你欲照你所講的，用我的手救以色列。」
38 就果然按呢，隔日基甸早早起來；捘羊毛，對羊毛絞出露水一碗滿滿。
39 基甸閣對上帝講：「求你通受氣我，我閣講一擺若定：求你准我閣一擺用羊毛試看。今獨獨互羊毛乾乾，土腳攏有露水。」
40 此暝上帝也按呢行：獨獨羊毛乾乾，土腳攏有露水。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。