上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
3
留落來的民族
耶和華所留諸個族，是欲用伊來試驗以色列人就是許個曾見過迦南交戰的事的，
2 刁持欲互以色列後代的人知來教示𪜶交戰，就是許個前所未曾經過的人。
3 所留啲許個族就是非利士五個首領及一切的迦南人、西頓人，及徛起黎巴嫩山的希未人，對巴力‧黑們山到哈馬口。
4 這就是欲用𪜶，來試驗以色列人，看𪜶肯聽趁耶和華託摩西所命令𪜶列祖的誡命抑無。
5 對按呢以色列人徛起佇迦南人、赫人、亞摩利人、比利洗人、希未人、耶布斯人的中間，
6 娶𪜶的查某子做某，也用查某子嫁𪜶的子，續服事𪜶許個上帝。
俄陀聶
7 以色列人行耶和華所看做歹的事，𣍐記得耶和華──𪜶的上帝，去服事諸個巴力及亞舍拉，
8 所以耶和華受氣以色列人，賣𪜶互米所波大米王古珊‧利薩田的手。以色列人服事古珊‧利薩田八年。
9 以色列人求叫耶和華的時，耶和華就給以色列人興起一個拯救者救𪜶，就是迦勒的小弟基納斯的子俄陀聶。
10 耶和華的神臨到伊，伊就做以色列的士師，出去交戰。耶和華將米所波大米王古珊‧利薩田交佇伊的手，伊就卡贏古珊‧利薩田。
11 對按呢彼個地方太平四十年。基納斯的子俄陀聶死。
以笏
12 以色列人閣行耶和華所看做歹的事，耶和華就互摩押王伊磯倫強盛，攻擊以色列人，因為𪜶行耶和華所看做歹的。
13 伊磯倫聚集亞捫人及亞瑪力人倚伊，去拍以色列人，佔棗樹的城。
14 對按呢以色列人服事摩押王伊磯倫十八年。
15 以色列人求叫耶和華的時，耶和華就給𪜶興起一個拯救者，就是便雅憫人基拉的子以笏；伊是慣練用倒手的。以色列人託仗伊送禮物互摩押王伊磯倫。
16 以笏為家己拍一支雙面利的劍，長一肘，縛佇正腿衣服的內面。
17 伊用禮物獻互摩押王伊磯倫（伊磯倫是真肥的人）；
18 獻禮物已經明白，就差帶禮物的人攏去，
19 伊本身對近吉甲拍石像的所在越倒轉來，講：「王啊，我有祕密的事欲給你講。」王講：「肅靜！」徛佇伊身邊的人就攏退出。
20 以笏就近伊；王家己一個坐佇涼冷的樓頂。以笏講：「我奉上帝的命令有代誌來報你。」王就對座位徛起來。
21 以笏就伸倒手，對正腿拔出劍，刺入王的腹肚，
22 劍的柄也續入去。劍互油咬住，因為伊無對伊的腹肚拔劍出來，就𥦁過尻脊出來。
23 以笏就出去到兩廊，將許個樓門關鎖。
24 伊出去了，王的奴僕到，看見樓門關鎖，就講：「伊的確是佇樓頂啲大便。」
25 𪜶聽候到卬愕，看見伊無開樓頂的門，就攑鎖匙來開，看啊，𪜶的主人已經死，倒佇地裡。
26 𪜶延迁的時，以笏就逃走，已經過拍石像的地，閃走到西伊拉；
27 已經到，就佇以法蓮山地歕哨角。以色列人就隨伊對山地落去，伊行佇頭前，
28 對𪜶講：「恁隨我來，因為耶和華已經將恁的對敵摩押人交佇恁的手。」𪜶就隨伊落去，把守摩押的對面約但河的渡頭，無容允一人過去。
29 彼時刣死摩押人約略一萬，攏是大漢的勇士，無一個走離。
30 對按呢，摩押就屈服佇以色列人。地方太平八十年。
珊迦
31 以笏了後，有亞拿的子珊迦，伊用趕牛的鐵刺拍死六百個非利士人。伊也救以色列人。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。