上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約書亞記
24
約書亞佇示劍聚集眾百姓講話
約書亞聚集以色列眾支派到佇示劍，召以色列的長老，及𪜶的族長、審判官，以及官長來，𪜶就徛佇上帝的面前。
2 約書亞給眾百姓講：「耶和華──以色列的上帝按呢講：『在早恁的列祖，就是亞伯拉罕的老父，拿福的老父、他拉，𫢶佇大河彼旁，服事別個上帝，
3 我取恁的祖亞伯拉罕對大河彼旁導伊遍行迦南全地，閣互伊的子孫多多，用以撒賞賜伊；
4 閣用雅各及以掃賞賜以撒，將西珥山賞賜以掃做業；後來雅各及伊的子孫落去埃及。
5 我差摩西及亞倫，我也降災禍佇埃及，照我佇彼中間所行的，然後導恁出來。
6 我導恁的列祖出埃及，恁就到海墘；埃及人導𪜶的車及馬兵追趇恁的列祖到紅海。
7 𪜶求叫耶和華，伊就用黑暗下佇恁及埃及人的中間，閣互海來淹密𪜶。我佇埃及所行的事，恁親目看見。恁𫢶佇曠野多多日。
8 我導恁到徛起佇約但彼旁亞摩利人的地。𪜶及恁交戰，我將𪜶交佇恁的手，恁就得著𪜶的地；我剿滅𪜶佇恁的面前。
9 彼時，摩押王西撥的子巴勒起來及以色列交戰，差人去叫比珥的子巴蘭來咒詛恁。
10 我聽巴蘭的話，所以伊連連給恁祝福。按呢，我就救恁脫離伊的手。
11 恁過約但，到耶利哥；耶利哥人、亞摩利人、比利洗人、迦南人、赫人、革迦撒人、希未人、耶布斯人，攏及恁交戰；我將𪜶交佇恁的手。
12 我差大隻蜂飛佇恁的頭前，將亞摩利人二個王對恁的面前趕出去，是用你的刀，也是用你的弓。
13 我賞賜恁的土地，是恁所著磨的；也賞賜恁城，是恁所起造的。恁就𫢶佇彼中間，閣是恁所栽種的葡萄園橄欖園，恁得著食伊的果子。』
14 「今恁著敬畏耶和華，誠心實意服事伊，將恁列祖佇大河彼旁及佇埃及所服事的上帝除去，來服事耶和華。
15 若是恁掠服事耶和華做好，今仔日恁著揀恁所欲服事的：看是恁列祖佇大河彼旁所服事許個上帝？抑是恁所徛起𪜶的地亞摩利人許個上帝啊？論到我及我的家，阮決斷欲服事耶和華。」
16 百姓應講：「阮決斷無意思欲棄拺耶和華去服事別個上帝；
17 因為耶和華──阮的上帝曾導阮及阮的列祖對埃及地做奴才的家出來，佇阮的目睭前行許個大的神蹟，佇阮所行一切的路，所經過的逐國，攏有保護阮。
18 耶和華也佇阮的面前趕出攏總的百姓，趕出徛起此個所在的亞摩利人。所以，阮也欲服事耶和華，因為伊是阮的上帝。」
19 約書亞對百姓講：「恁𣍐會服事耶和華；因為伊是聖的上帝，決斷無容允用別個上帝匹配伊，無欲赦免恁的過失，恁的罪惡。
20 恁若離開耶和華去服事外邦的上帝，耶和華佇降福氣互恁了後，欲越轉來降災禍互恁，滅無恁。」
21 百姓應約書亞講：「無啦，阮定著欲服事耶和華。」
22 約書亞對百姓講：「恁揀耶和華，欲服事伊，恁家己做恁的干證！」𪜶應講：「好，阮做干證。」
23 約書亞講：「恁今著除去恁中間所有外邦的上帝，互恁專心歸向耶和華──以色列的上帝。」
24 百姓應約書亞講：「阮欲服事耶和華──阮的上帝，聽趁伊的話。」
25 彼日，約書亞就及百姓立約，佇示劍給𪜶設立律例法度。
26 約書亞將諸個話攏寫佇上帝律法的冊，閣將一塊大石頭徛佇遐佇橡樹腳，耶和華聖所的邊仔。
27 約書亞對眾百姓講：「看啊，此個石頭欲做咱的干證；因為伊有聽見耶和華所吩咐咱一切的話，所以欲對恁做干證，驚了恁悖逆恁的上帝。」
28 約書亞就差百姓去，逐人就倒去伊所得著的地。
約書亞及以利亞撒死
29 諸個事以後，耶和華的奴僕嫩的子約書亞，一百一十歲，就死。
30 𪜶就埋葬伊佇伊的業的界內，就是佇以法蓮山地的亭拿‧西拉，佇迦實山的北勢。
31 約書亞佇啲的日及約書亞死了後，許個知耶和華為以色列人所行諸個事的長老猶佇啲的時，以色列人服事耶和華。
32 以色列人對埃及所帶來約瑟的骨頭，𪜶埋葬伊佇示劍，就是雅各早前用一百銀對示劍的老父、哈抹許個子所買的地；就做約瑟子孫的業。
33 亞倫的子以利亞撒也死，𪜶就埋葬伊佇伊的子非尼哈所得著的山崙仔，就是佇以法蓮的山地。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。