上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約書亞記
9
基遍人欺騙約書亞
約但彼旁，或是佇山地，或是佇平洋，或是佇大海黎巴嫩相對的邊仔，赫人、亞摩利人、迦南人、比利洗人、希未人、耶布斯人諸個王，一下聽見這，
2 就攏聚集，同心合意欲及約書亞及以色列人交戰。
3 總是基遍徛起的百姓聽見約書亞對耶利哥及艾城所行的事，
4 就設詭計，假做使者，用舊的袋及破裂閣補的舊酒袋互驢馱伊，
5 腳裡穿過補的舊鞋，身軀穿舊衫；𪜶所備辦的餅攏是乾，閣臭醭。
6 𪜶到吉甲營中見約書亞，對伊及以色列人講：「阮是對真遠的所在來的，今求你及阮立約。」
7 以色列人對諸個希未人講：「豈採恁是徛起佇阮中間的；欲怎樣及恁立約啊？」
8 𪜶對約書亞講：「阮是你的奴僕。」約書亞問𪜶講：「恁是甚麼人？是對叨落來的？」
9 𪜶對伊講：「你的奴僕對極遠的所在來，為著耶和華──你上帝的名，因為阮已經聽見伊的名聲及伊佇埃及一切所行的，
10 以及伊佇約但彼旁對亞摩利二個王，就是希實本王西宏及佇亞斯他錄的巴珊王噩一切所行的事。
11 阮的長老及阮遐徛起的百姓就給阮講：『恁手著帶路裡用的食物去迎接𪜶，對𪜶講：阮是你的奴僕；今求你及阮立約。』
12 阮出來欲來恁遮的日，對厝內帶出諸個餅做路中的路用，彼時猶燒燒；看啊，今已經攏乾，閣臭醭啦。
13 諸個酒囊，阮貯酒的時猶是新的；看啊，今已經破裂。阮諸個衫及鞋，也攏穿舊，因為路真遠。」
14 以色列人就對𪜶的食物提淡薄，也無請問耶和華。
15 約書亞就及𪜶講和，及𪜶立約，容允𪜶活；會眾的首領也對𪜶咒誓。
16 及𪜶立約了後，過三日才聽見𪜶是近近，𫢶佇𪜶中間。
17 以色列起身，第三日到𪜶的城，許個城就是基遍、基非拉、比錄、基列‧耶琳。
18 因為會眾的首領已經指耶和華──以色列的上帝對𪜶咒誓，所以以色列人無拍𪜶；全會眾就哀怨許個首領。
19 眾首領對全會講：「阮已經指耶和華──以色列的上帝對𪜶咒誓，今咱通磕著𪜶。
20 咱著按呢款待𪜶，容允𪜶活啲，驚了咱為著所對𪜶咒誓的受氣到佇咱。」
21 首領閣對𪜶講：「著容允𪜶活。」對按呢𪜶就給會眾做破柴汲水的人，照首領所給𪜶講的話。
22 約書亞叫𪜶來，給𪜶講：「啥事騙阮講『阮離開恁真遠』啊？其實恁是𫢶佇阮中間。
23 今恁是受咒詛的！恁中間做奴才的永無斷，給我上帝的殿做破柴汲水的。」
24 𪜶應約書亞講：「因為有人確實報你的奴僕講，耶和華──你的上帝曾命令伊的奴僕摩西，將此個全地賞賜恁，也佇恁的頭前剿滅此個所在一切徛起的百姓，所以阮因為恁的緣故驚了無命，才做此個代誌。
25 今阮佇你的手頭，你看做好做正直的，照按呢行來款待阮！」
26 約書亞就按呢款待𪜶，救𪜶脫離以色列人的手，所以𪜶就無刣𪜶。
27 當彼日約書亞互𪜶給會眾及耶和華的壇，做破柴及汲水的人佇伊所欲揀的所在，到今仔日。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。