上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約書亞記
2
約書亞派偵探入耶利哥
嫩的子約書亞對什亭暗靜差二人做偵探，吩咐𪜶講：「恁去看彼個地及耶利哥。」𪜶就去，到一個娼妓喇合的厝，就歇佇遐。
2 有人報耶利哥王講：「看啊，今暗有以色列人來遮偷看此個地。」
3 耶利哥王差人去喇合遐講：「許個來你遮、入你的厝的人，你著導𪜶出來，因為𪜶來，是欲偷看此個全地。」
4 婦仁人將彼二人囥密，就應講：「真正有人來我遮；總是𪜶對叨落來我知。
5 日暗、欲關城門的時，許個人出去，𪜶去叨落我知。恁緊緊去趇，就會趇著。」（
6 總是婦仁人已經導𪜶上厝頂，將所排佇厝頂的麻稿來蓋𪜶。）
7 許個人就按約但彼條路趇伊。到路頭趇𪜶的人一下出去，城門就關。
8 二人猶未去睏，婦仁人就上厝頂，到𪜶遐，
9 對𪜶講：「我知耶和華已經將此個地賞賜恁，閣因為恁的緣故阮攏驚。此所在一切徛起的百姓佇恁的面前攏失膽；
10 因為阮有聽見恁出埃及的時，耶和華怎樣佇恁的頭前互紅海的水乾去，閣恁怎樣款待約但彼旁二個亞摩利王西宏及噩，就是恁所毀滅的。
11 阮一下聽見諸個事，就失膽。因為恁的緣故，逐個神不附體。因為耶和華──恁的上帝佇天頂地下做上帝。
12 今我已經好款待恁，請恁指耶和華對我咒誓，欲好款待我老父的家，續互我一個實在的記號，
13 欲救活我的老父老母、我的兄弟、姊妹，及一切屬𪜶所有的，拯救阮的生命免死。」
14 二人應伊講：「你若無漏洩阮此個事，阮甘願用阮的生命替恁。到耶和華將此個地賞賜阮的時，阮欲用慈愛誠實款待你。」
15 對按呢伊用索對窗仔給𪜶墜落去；因為伊的厝起佇城牆，伊也徛起佇牆頂。
16 伊對𪜶講：「恁著上去山裡，驚了追趇的人抵著恁，著佇遐匿三日，聽候追趇的人倒來，然後才通行恁的路。」
17 二人對伊講：「你教阮所咒誓的，阮的確無為著彼個來犯罪。
18 阮若到此所在的時，你著將此條朱紅的索縛佇墜阮落去的窗仔裡，也著聚集你的老父老母、兄弟、及你的老父全家攏𫢶你的厝內。
19 見若出你的家的門去街路的，伊的死是自取的，無阮的罪。見若及你佇厝內的，若有人下手害伊，就伊的死是阮的罪。
20 總是你若漏泄阮此個事，就你所教阮咒誓的及阮無干涉。
21 伊講：「通照恁的話來行！」對按呢伊差𪜶去，𪜶就去，伊用朱紅的索縛佇窗仔。
22 二人去到山裡，𫢶遐三日，聽候追趇的人倒去。追趇的人沿路尋𪜶，也尋無著。
23 二人就落山倒來，過河，到嫩的子約書亞遐，對伊講起𪜶所抵著一切的事；
24 閣對約書亞講：「耶和華果然用彼個全地交佇咱的手；彼所在一切徛起的百姓佇咱的面前攏失膽。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。