上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
32 諸個天啊，著俯耳孔，我欲講話；
願地也著聽我的嘴所講的。
2 我的教示欲親像雨降落；
我的話親像露水啲滴，
親像濛濛的雨落佇幼幼的草；
親像大雨落佇菜蔬。
3 因為我欲宣傳耶和華的名；
恁著尊咱的上帝做大。
4 做石磐者，伊所做的是完全；
伊的路攏是公平，
是真實的上帝攏無不義，
伊是公義，閣正直。
5 此個乖僻彎曲的世代家己敗壞；
是伊的子，是𪜶的弊病。
6 愚戇無知的百姓啊，恁按呢報答耶和華嗎？
伊豈是你的老父、買你的嗎？
伊有創造你、建立你。
7 著記得古早的日，
數念歷代的年；
問你的老父，伊欲指示你；
問你的老大，𪜶欲給你講。
8 至高者分業互列邦，分開世間人的時，
就定著百姓的界限，照以色列人的數額。
9 耶和華的份額是伊的百姓；
伊所得著的產業是雅各。
10 伊抵著伊佇拋荒的地──
佇荒癈野獸哮的曠野，
伊圍踅伊，看顧伊，
保護伊，親像目睭仁。
11 閣親像鷹鳥撈伊的巢，
佇鷹仔的頂面搧伊的翅，展開翅股來承伊，
載伊佇伊的翅股。
12 只有耶和華導伊，
無別個上帝及伊佇啲。
13 就互伊騎佇地上高的所在，
得著食田裡的土產；
閣互伊對石磐吸蜜，
對火石吸油；
14 也食牛奶油，
及羊奶，肥的羊仔子，
巴珊所出的綿羊牨及山羊，
及上好的小麥；
也飲葡萄汁的酒。
15 耶書崙肥就鴨霸，
你已經肥，閣大粒，肉真博，
伊就離開創造伊的上帝，
看輕救伊的石磐；
16 𪜶用別個上帝，激伊妒忌，
用可惡的，惹伊的受氣。
17 𪜶祭獻邪鬼是真的上帝，
就是𪜶平素所識的上帝，
是新的近來才有的，
是你的列祖所無驚畏的。
18 生你的石磐你無數念伊，
生你的上帝你𣍐記得伊。
19 耶和華看見就怨恨，
因為伊的子查某子激伊的緣故，就講：
20 我欲對𪜶掩我的面，
看𪜶結局怎樣。
𪜶是乖僻的族類，
無信實的子兒。
21 𪜶用彼個「是上帝」的激我的妒忌，
用𪜶的虛假的物惹我的受氣。
我就用「是做百姓」的激𪜶的妒忌，
用愚戇的國民惹𪜶的受氣。
22 因為佇我的受氣中有火𤏸起來，
燒到陰間極深的所在，
也燒地及地的出產，
也起火燒諸個山的地基。
23 我欲積聚災禍佇𪜶的頂面，
用我攏總的箭來射𪜶。
24 𪜶欲因為枵餓來消瘦，
受炎熱及毒症吞滅。
我欲互𪜶抵著野獸的嘴齒，
及蛇的毒。
25 外面有刀劍，內面有驚惶，
互人死亡，互少年的查甫人、及在室女、
食奶的、及白頭毛的人，攏滅無。
26 我講，我欲互𪜶四散佇遠遠，
佇人的中間除𪜶的名字。
27 總是我驚對敵激我，
驚了𪜶的對敵誤會，驚了𪜶欲講：是阮的手攑高，
是耶和華行諸個事。
28 因為𪜶是𣍐曉得想的百姓，
佇心內無聰明。
29 願𪜶有智慧，
會明白此個，會想𪜶的結局。
30 若是𪜶的石磐賣𪜶，
若是耶和華將𪜶交互人，
怎樣對敵一個會趕𪜶一千？
二個會互𪜶一萬逃走啊？
31 𪜶的石磐無親像咱的石盤，
連咱的對敵也按呢評判。
32 𪜶的葡萄樹是對所多瑪的葡萄樹傳的，
也對蛾摩拉的園出的；
𪜶的葡萄是毒的葡萄，
歸葩攏是苦的。
33 𪜶的酒是龍的毒，
是惡蛇殘害的毒。
34 這豈是積聚佇我遮，
封密佇我寶貝的庫房嗎？
35 伸冤報應在佇我，佇𪜶的腳踏顛的時；
因為𪜶抵著災禍的日近啦；
所欲抵著的事會緊緊到。
36 耶和華看見伊的百姓氣力已經無去，
許個拘束的、自由的攏無留一個，
就欲替𪜶伸冤，
因為伊的奴僕來退悔。
37 伊欲講：𪜶的上帝，
𪜶所倚靠的石盤，
38 就是食𪜶祭祀的油，
飲𪜶灌奠的酒的，今佇叨落？
通互𪜶起來幫助恁，
保護恁。
39 恁今著看：
我，我就是伊；
我以外無有上帝。
我互人死，我互人活；
我損傷伊，我醫治伊，
無一個會對我的手救出。
40 我攑起手向天講：
我指我的永活來講：
41 我若磨我光爁爁的刀，
我若執行審判，
就欲刑罰我的對敵，
報應怨恨我的人。
42 我欲互我的箭飲血到醉，
我的刀欲食肉，
就是受刣受掠的人的血，
對敵首領的頭的肉。
43 列國啊攏著及伊的百姓相及歡喜；
因為伊欲為伊的奴僕的血伸冤，
報應伊的對敵，
欲贖伊的地，及伊的百姓的罪。
44 摩西來用此個歌一切的話唸互百姓聽，嫩的子約書亞也及伊佇啲。
摩西最後的訓言
45 摩西對以色列的眾人講諸個一切的話明白，
46 就給𪜶講：「我今仔日所對恁干證一切的話，恁著囥佇心裡；也著吩咐恁的子孫執守來行此個律法一切的話。
47 因為這對佇恁是空空的事，是恁的活命；也欲因為此個事恁的日子得著久長，佇恁過約但欲入去承接的地。」
48 當日，耶和華吩咐摩西講：
49 「你上去亞巴琳山尼波的山頭，及耶利哥對面的摩押地，看我賞賜以色列人做業的迦南地。
50 你欲死佇你所上去的山，來倒祖，親像你的兄亞倫死佇何珥山，來倒祖一樣。
51 因為恁佇尋的曠野，加低斯的米利巴的水，佇以色列人中得罪我，因為佇以色列人中無尊我做聖。
52 你通對面看彼個地，總是𣍐得通入去到我所賞賜以色列人的地。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。