上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
4
摩西勸百姓遵趁耶和華的律例法度
「以色列啊，今我所教示恁的律例法度，恁著聽來遵趁，通互恁活啲，入去來得著耶和華──恁的列祖的上帝所賞賜恁的地。
2 我所命令恁的話，恁通加添，也通減少伊，通互恁執守耶和華──恁上帝的命令，就是我所命令恁的。
3 耶和華因為巴力‧毗珥的事所行的，恁親目看見。因為見若趁巴力‧毗珥的人，耶和華──你的上帝攏對恁中間除滅𪜶。
4 獨獨恁及耶和華──恁的上帝結聯的，今仔日攏活啲。
5 看啊！我也曾用律例及法度教示恁，照耶和華──我的上帝所命令我的，互恁遵趁佇恁所欲入去承接的地。
6 所以恁著執守來行伊；這就是恁的智慧、聰明佇列國的面前。𪜶一下聽見這一切的律例，欲講：『此個大國真正是有智慧、聰明的百姓！』
7 叨落一個大國有上帝及伊親近，親像耶和華──咱的上帝、佇咱見若求叫伊的時及咱親近啊？
8 閣有甚麼大國有律例及法度、親像我今仔日佇恁的面前所傳一切的律法許呢公義啊？
9 「所以著家己謹慎，也著謹慎守你的心，免得你𣍐記得親目所看見的事，閣免得諸個事佇你活啲的時、離開你的心；也著用此個教示恁許個子許個孫。
10 你佇何烈山徛佇耶和華──你的上帝的面前，彼日耶和華對我講：『你給我招集百姓，我欲互𪜶聽見我的話，互𪜶活佇世間的日，通學習敬畏我，閣通教示𪜶的子兒。』
11 彼時恁近倚，徛佇山腳；山裡有火焰淐到天頂，也有密雲、黑黑暗暗。
12 耶和華對火焰中給恁講話，恁聽見講話的聲，無看見甚麼像，只有聲若定。
13 伊將所命令恁著守的約指示恁，就是十條誡，也寫伊佇二塊石碑。
14 彼時耶和華閣命令我將律例法度教示恁，互恁佇所欲過去來得著做業的地遵趁行伊。」
警告百姓通拜偶像
15 「所以恁著特別家己謹慎；因為耶和華佇何烈山、對火中給恁講話彼日，恁無看見甚麼形像。
16 驚了恁敗壞家己，為家己雕刻偶像，彷甚麼形狀，無論是男抑是女的形像，
17 抑是地上走獸的像，抑是空中飛鳥的像，
18 抑是地上啲趖的物的像，抑是地下水中魚類的像。
19 閣驚了你攑目向天，看耶和華──你的上帝所分派互天下萬國的日月星，就是天頂的萬象，你就受引誘敬拜服事𪜶。
20 總是耶和華帶恁出埃及，脫離鑄鐵的爐，欲做伊家己產業的百姓，親像今仔日的款。
21 耶和華閣因為恁的緣故受氣我，咒誓互我過約但河，也互我入耶和華──你上帝所賞賜你做業的媠地。
22 我著死佇此個地，我𣍐會過約但河；總是恁欲過去來得著彼個好的地。
23 恁著家己謹慎，驚了恁𣍐記得耶和華──恁的上帝及恁所立的約，為家己雕刻偶像，彷彿甚麼物，就是耶和華──你的上帝所禁你的；
24 因為耶和華──你的上帝就是烈烈的火，決斷容允有別個上帝。
25 「後來恁久久徛起佇彼個地，生子傳孫，就雕刻偶像，彷甚麼物的像，拍歹你的心術，行耶和華──你的上帝目睭中看做歹的事，惹伊受氣。
26 我就今仔日叫天叫地來干證，恁欲佇過約但河得著做業的地緊緊滅到盡！恁的日子𣍐會佇彼所在得著久長，欲一盡除滅。
27 耶和華欲互恁四散佇列邦；佇耶和華所導恁到許個國，恁剩的人額少少。
28 佇遐，恁欲服事人的手所造的上帝，就是柴的、石的、𣍐會看見、𣍐會聽、𣍐會食、𣍐會鼻的。
29 總是恁佇遐若欲尋耶和華──你的上帝。若用盡心盡性尋伊，就欲抵著。
30 日後恁抵著苦難，所講諸個事臨到你，你欲歸向耶和華──你的上帝，來聽伊的聲。
31 因為耶和華──你的上帝是憐憫的上帝；伊無欲放拺你，無欲剿滅你，也無𣍐記得伊及你的列祖所咒誓的約。
32 「試問過身的時，就是你以前的時，對上帝創造人佇世間彼日以來，對天的此邊到天的彼邊，有親像彼號的大事嗎？曾聽見有按呢嗎？
33 曾有甚麼百姓聽見上帝對火中講話的聲，親像你聽見也猶會活啲嗎？
34 抑是曾有甚麼上帝試按呢做，用試煉、神蹟、奇事、交戰、大權能的手，伸出的手骨，及大通驚的事，為家己對別國中取一國，親像耶和華──恁的上帝佇埃及佇恁的目睭前，為恁所行一切的事啊？
35 用這顯現佇你，互你知耶和華──伊是上帝，伊以外，無有別個。
36 伊對天互你聽見伊的聲，為著欲教示你，閣佇地面上互你看見伊的大火，閣你聽見伊的話對火中出。
37 因為伊疼你的列祖，所以揀選𪜶的後裔，用大權能親身帶你出埃及，
38 欲對你的面前趕出比你卡大卡猛的國民，欲導你入去，用𪜶的地賞賜恁做業，親像今仔日一樣。
39 所以，今仔日你著知，心也著想，天頂地下只有耶和華──伊是上帝，以外無別個。
40 所以你著守伊的律例誡命，就是我今仔日所命令你，互你及你的後裔通得著福氣，閣加添你的日子久長佇耶和華──你的上帝所賞賜你的地到永遠。」
設立逃閃城
41 「彼時，摩西佇約但外，向日出的所在分別三個城，
42 互刣死人的人，就是平素無結怨、錯誤刣死伊的厝邊的，通逃走佇遐，已經走入諸個城的一個，就得著活：
43 就是曠野平洋的比悉，為著流便人設的；基列的拉末，為著迦得人設的；巴珊的哥蘭，為著瑪拿西人設的。」
排列的律法
44 此個是摩西佇以色列人的面前所排列的律法──
45 諸個是摩西佇以色列人出埃及了後所傳互𪜶的證據、律例、法度；
46 佇約但河外伯‧毗珥對面的山谷中，佇希實本徛起亞摩利王西宏的地；就是摩西及以色列人出埃及了後所拍的。
47 𪜶得著伊的地，及巴珊王噩的地，就是二個亞摩利王，佇約但外向日出的所在。
48 對亞嫩山谷邊的亞羅珥，直到西雲山，就是黑門山。
49 以及約但外東勢亞拉巴的全地，直到亞拉巴的海，倚近毗斯迦的山腳。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。