上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
3
拍敗巴珊王噩
( 民 21:31-35 )
「咱就越轉身，上巴珊的路去。巴珊王及伊的眾百姓攏出來抵敵咱，就佇以得來交戰。
2 耶和華給我講：『莫得驚伊！因為我已經將伊及伊的眾百姓，及伊的地，攏交佇你的手；你著款待伊親像款待𫢶佇希實本的亞摩利王西宏一樣。』
3 對彼霎耶和華──咱的上帝也將巴珊王噩及伊的眾百姓攏交佇咱的手；咱就拍死𪜶，無留一個。
4 彼時，咱取伊所有的城，無一個城無互咱取伊，共六十個城。這是亞珥歌伯的全境，就是噩的國佇巴珊的。
5 諸個攏是堅固的城，有高的牆，有門有楗。諸個以外猶有多多無城牆的埠頭。
6 咱一盡滅𪜶，親像前款待希實本王西宏一樣，滅有人徛起的城，連婦仁人及囝仔；
7 獨獨一切的精牲及城中的贓物，咱攏取來做家己的路用。
8 彼時，咱對約但彼旁二個亞摩利王的手搶伊的地，對亞嫩的山谷到黑門山（
9 此個黑門，西頓人稱伊做西連，亞摩利人稱伊做示尼珥），
10 咱搶平洋逐個城、基列全地、巴珊全地，直到撒迦及以得來，攏是巴珊王噩國內的城。（
11 利乏音人所留的只有剩巴珊王噩。看啊！伊的眠床是鐵的眠床，長九肘，闊四肘，攏是用人的肘做扮。現今豈是佇亞捫人的拉巴嗎？）」
徛起約但河東邊的二支派半
12 ( 民 32:1-42 )
「彼時，咱得著此個地。對亞嫩山谷邊的亞羅珥起，以及基列山地的一半，及其中的城，我攏互流便人及迦得人。
13 基列其餘的地及巴珊全地，噩的國，我互瑪拿西的半支派。亞珥歌伯全地、巴珊全地；這叫做利乏音人的地。
14 瑪拿西的子睚珥佔亞珥歌伯全境，直到基述人及瑪迦人的交界，就照家己的名稱巴珊地做哈倭特‧睚珥，到今仔日。
15 我閣將基列互瑪吉。
16 對基列到亞嫩的山谷，用山谷做界，直到亞捫人交界的雅博河，我將這互流便人及迦得人，
17 閣將亞拉巴及倚近約但河的地，對基尼烈直到亞拉巴的海，就是鹽海，以及毗斯迦山腳東邊的地，攏互𪜶。
18 「彼時，我吩咐恁講：『耶和華──恁的上帝已經將此個地互恁做業；恁中間會交戰的攏著帶軍器，佇恁的兄弟以色列人的面前過去。
19 總是恁的某、恁的囝仔、恁的精牲（我知恁的精牲真多）通𫢶佇我所互恁逐個城。
20 到耶和華賞賜平安互恁的兄弟，親像已經賞賜恁一樣，閣𪜶也得著耶和華──恁的上帝，用約但彼旁的地賞賜𪜶，然後恁逐人通倒來我賞賜恁做業的地。』
21 彼時我吩咐約書亞講：『你親目看見耶和華──你的上帝對此二個王所行一切的事；耶和華也欲對恁所欲過去的逐國按呢行。
22 恁莫得驚𪜶，因為替恁交戰的是耶和華──恁的上帝。』」
摩西𣍐得進入迦南地
23 「彼時，我懇求耶和華講：
24 『主耶和華啊，你已經起頭顯出你的大威嚴及你的大氣力佇你的奴僕。因為佇天裡，佇地裡，猶有甚麼上帝會行親像你所行的、閣親像你的大權能啊？
25 求你容允我過去，看約但河彼旁媠的地，彼個媠的山地及黎巴嫩。』
26 總是耶和華因為恁的緣故受氣我，聽我，耶和華對我講：『按呢你夠額啦！你莫得閣對我提起此個事。
27 你著上毗斯迦的山頂，攑目向西、向北、向南、向東親目看，因為你決斷𣍐會過此個約但河。
28 總是你著吩咐約書亞，互伊壯膽堅固；因為伊欲佇此個百姓的面前過去，互𪜶承接你所欲看見的地。』
29 對按呢咱𫢶佇伯‧毗珥對面的山谷中。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。