上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
32
約但河東的兩支派
( 申 3:12-22 )
流便的子孫及迦得的子孫𪜶的精牲極其多；𪜶看見雅謝的地及基列的地是通飼精牲的所在，
2 迦得的子孫及流便的子孫就來見摩西及祭司以利亞撒，以及會眾的首領，給𪜶講：
3 「亞大錄、底本、雅謝、寧拉、希實本、以利亞利、示班、尼波、比穩，
4 就是耶和華佇以色列會眾的面前所攻取的地，是通飼精牲的地，你的奴僕也有精牲」；
5 閣講：「阮若得著恩典佇你的面前，求你用此個地互你的奴僕做業，莫得導阮過約但河。」
6 摩西對迦得的子孫及流便的子孫講：「總無恁的兄弟去爭戰，也恁坐佇遮嗎？
7 恁啥事互以色列人餒志，無愛過去入耶和華所賞賜𪜶彼個地啊？
8 我前對加低斯‧巴尼亞差恁的老父去偷看彼個地，𪜶也是按呢行。
9 因為𪜶上去以實各的山谷，去看彼個地的時，有互以色列人餒志，愛入耶和華所賞賜𪜶的地。
10 當日，耶和華的受氣發出，就咒誓講：
11 『見若對埃及上來、二十歲以上的人決斷𣍐得著看見我對亞伯拉罕、以撒、雅各咒誓應允的地，因為𪜶無全心跟隨我。
12 獨獨基尼洗族耶孚尼的子迦勒及嫩的子約書亞通看見，因為𪜶專心隨耶和華。』
13 耶和華對以色列人發受氣，互𪜶佇曠野漂流四十年，聽候彼代行歹佇耶和華面前的人攏消滅。
14 看啊，恁起來續接恁的老父，加添罪人的數額，互耶和華益發受氣以色列。
15 恁若越倒轉無隨伊，伊欲閣放拺𪜶佇曠野，恁就是滅無諸個眾百姓。」
16 𪜶倚近摩西，講：「阮欲佇遮為阮的精牲創，為阮的囝仔起城。
17 總是阮本身欲帶軍器行佇以色列人的頭前，聽候阮導𪜶到𪜶的地方；獨獨阮的囝仔，因為此個地徛起的百姓的緣故，欲𫢶佇堅固的城內。
18 阮倒去阮厝，聽候以色列人逐個得著伊的業。
19 阮無欲及𪜶佇約但河彼旁閣去的地得著業，因為阮的業是在佇約但河東勢此旁。」
20 摩西對𪜶講：「恁若欲按呢行，佇耶和華的面前帶軍器出去交戰，
21 恁所有帶軍器的人若佇耶和華的面前過約但河，聽候伊對伊的面前趕出伊的對敵，
22 彼個地已經互耶和華卡贏，然後恁通倒來，佇耶和華及以色列的面前恁就無罪，此個地欲佇耶和華的面前互恁做業。
23 設使恁無按呢行，就是得罪耶和華，著知恁的罪欲追趇恁。
24 今著給恁的囝仔起城，給恁的羊群創，照恁的嘴所講的去行。」
25 迦得的子孫及流便的子孫對摩西講：「你的奴僕欲照我的主所吩咐的去行。
26 阮的囝仔、阮的某、阮的羊群、阮的精牲，攏欲留佇基列諸個城。
27 總是你的奴僕，見若帶軍器的，攏欲照我的主所講的話，佇耶和華的面前過去交戰。」
28 摩西就為著𪜶吩咐祭司以利亞撒及嫩的子約書亞，及以色列眾支派的族長，
29 摩西對𪜶講：「迦得的子孫及流便的子孫，若及恁過約但河，逐人攑家私佇耶和華的面前去交戰，彼個地互恁卡贏，恁就著用基列地互𪜶做業。
30 設使𪜶帶軍器及恁過去，𪜶就佇迦南地對恁中間得著業。」
31 迦得的子孫及流便的子孫應講：「耶和華對阮所講的，你的奴僕就按呢行。
32 阮欲帶軍器，佇耶和華的面前過去，入迦南地，獨獨約但河外、阮所得著做業的地猶原歸阮。」
33 摩西就用亞摩利王西宏的國及巴珊王噩的國，彼個地及伊境內諸個城就是四周圍諸個城，攏互迦得的子孫及流便的子孫，以及約瑟的子瑪拿西的半支派。
34 迦得的子孫起底本、亞他錄、亞羅珥、
35 亞他錄‧朔反、雅謝、約比哈、
36 伯‧寧拉、伯‧哈蘭，攏是堅固的城。𪜶閣起羊。
37 流便的子孫起希實本、以利亞利、基列亭、
38 尼波、巴力‧免（已經換𪜶的名），閣起西比瑪，𪜶所起諸個城用新的名號伊。
39 瑪拿西的子瑪吉，伊的子孫去基列，佔彼個地，趕出彼所在的亞摩利人。
40 摩西將基列互瑪拿西的子瑪吉，伊就徛佇遐。
41 瑪拿西的子睚珥去佔許個鄉社，就稱伊做哈倭特‧睚珥。
42 羅巴去佔基納及基納諸個鄉社，就照家己的名稱伊做羅巴。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。