上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
18
上帝應允亞伯拉罕生子
耶和華佇幔利的橡樹遐對亞伯拉罕出現。彼時日當熱，亞伯拉罕坐佇布棚門口，
2 攑目起來看，看見三人佇對面啲徛。伊一下看見，就對布棚門口走去迎接𪜶，仆佇地裡，
3 講：「我的主，我若佇你的面前得著恩典，求你通離開奴僕做你去。
4 容允提淡薄水，互恁洗腳，請歇睏佇樹腳。
5 我閣提淡薄餅，互恁點心，然後進前去。因為恁是為著按呢，才到恁的奴僕遮。」𪜶講：「通照你的話去行。」
6 亞伯拉罕趕緊入布棚見撒拉，講：「你緊緊用三細亞的麵粉撋做餅。」
7 亞伯拉罕閣走到牛群的所在，牽一隻茈閣好的牛仔來，交互奴僕，伊就趕緊去備辦。
8 亞伯拉罕閣提奶油及奶，及所備辦的牛仔來，排佇𪜶的面前，家己佇樹腳徛佇𪜶的身邊，𪜶就食。
9 𪜶給伊講：「你的某撒拉佇叨落？」伊講：「佇布棚內。」
10 𪜶中間一個講：「到期，我的確欲閣來你遮；你的某撒拉欲生一個子。」撒拉佇後面布棚門口啲聽。
11 亞伯拉罕及撒拉年歲已經老，撒拉的月經已經絕。
12 撒拉心內笑，講：「我已經衰膦，我的主亦老啦，豈猶有此號的歡喜？」
13 耶和華對亞伯拉罕講：「撒拉為啥事笑，講：『我已經老，果真會生子嗎？』
14 豈耶和華有做𣍐來的事嗎？到期，明年此時，我欲閣來你遮，撒拉欲生一個子。」
15 撒拉驚，認，講：「我無笑。」彼人講：「無影，你實在有笑。」
亞伯拉罕為所多瑪祈求
16 許個人就對遐起來，向所多瑪去，亞伯拉罕也及𪜶相及行，欲送𪜶一站。
17 耶和華講：「我所欲做的事豈通對亞伯拉罕隱囥嗎？
18 因為亞伯拉罕的確欲成做強大的國；地上萬國欲因為伊來得著福氣。
19 我識伊，是欲互伊命令伊的子及伊的家眷，互𪜶長長守耶和華的道理，秉公行義，致到耶和華指亞伯拉罕所講的話攏歸互伊。」
20 耶和華講：「所多瑪、蛾摩拉喝喊的聲真大，𪜶的罪惡實在重。
21 我今欲落去，看𪜶所行的，果然一盡照我所聽的聲抑無？若無按呢，我亦會知。」
22 許個人對遐越轉身，向所多瑪去；亞伯拉罕猶徛佇耶和華的面前。
23 亞伯拉罕近前來，講：「好人及歹人，你攏欲剿滅嗎？
24 設使城內有五十個好人，你猶原欲剿滅彼所在嗎？無欲為著城內此五十個好人來赦免𪜶嗎？
25 願你決斷無按呢行，將好人及歹人做一下害死，致到好人及歹人相同，願你決斷無按呢行。審判全地的主豈無行公義嗎？」
26 耶和華講：「我若佇所多瑪城內抵著有五十個好人，我就為著𪜶的緣故寬容彼所在。」
27 亞伯拉罕應講：「我雖然是火灰土粉，猶久敢對主講話。
28 設使諸個五十個好人欠五個，你就因為欠五個剿滅全城嗎？」伊講：「我佇遐若抵著有四十五個，亦無欲剿滅。」
29 亞伯拉罕閣對伊講：「設使佇遐抵著四十個呢？」伊講：「為著諸個四十個的緣故，我亦無欲做此個事。」
30 伊閣講：「求主莫得受氣，我欲閣講，設使佇遐若抵著三十個呢？」伊講：「我佇遐若抵著有三十個，我亦無欲做此個事。」
31 伊講：「我猶久敢對主講，設使佇遐抵著有二十個呢？」伊講：「為著諸個二十個的緣故，我亦無欲剿滅。」
32 伊講：「求主莫得受氣，我閣講此一擺，設使佇遐抵著有十個呢？」伊講：「為著諸個十個的緣故，我亦無欲剿滅。」
33 耶和華及亞伯拉罕講明白就上去；亞伯拉罕亦倒去伊的所在。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。