上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
23 巴蘭對巴勒講：「你佇遮給我起七座壇，給我備辦七隻牛牨，七隻羊牨。」
2 巴勒照巴蘭的話來行。巴勒及巴蘭佇逐座的壇，獻一隻牛牨，一隻羊牨。
3 巴蘭對巴勒講：「你徛佇你燒祭的邊頭，我且進前去，豈採耶和華來抵著我。伊指示我甚麼，我欲給你講。」巴蘭就上去無草木的山。
4 上帝抵著巴蘭；巴蘭對伊講：「我已經備辦七座壇，佇逐座壇獻一隻牛牨，一隻羊牨。」
5 耶和華用話交代巴蘭，閣給伊講：「你倒去巴勒遐，著按呢給伊講。」
6 伊就倒去巴勒遐，看見伊及摩押的首領攏徛佇伊燒祭的邊仔。
7 巴蘭就提起伊的歌講：
巴勒導我對亞蘭來，
摩押王導我出東旁的山，講：
來啊，給我咒詛雅各
來啊，咒罵以色列。
8 上帝無咒詛的，我豈會咒詛？
耶和華無咒罵的，我豈會咒罵？
9 因為我對諸個山巖看伊，閣對山尾溜觀看；
看啊，此個百姓欲家己徛起，無列佇諸個國的中間。
10 是誰會數雅各的土沙？
是誰會算以色列的四份一？
我願親像義人的死來死；
也親像伊的結局來結局。
11 巴勒對巴蘭講：「你對我做的是甚麼啊？我叫你來咒詛我的對敵，看啊，你攏是給𪜶祝福。」
12 伊應講：「耶和華所交代我的話，我豈著謹慎來講嗎？」
巴蘭第二擺預言
13 巴勒對伊講：「求你及我去別位，佇遐通看見𪜶；你只有會看見𪜶的一角頭，𣍐會攏總看見。佇遐著給我咒詛𪜶。」
14 對彼霎導伊到瑣腓的山野，上毗斯迦的山頭，起七座壇；逐座壇獻一隻牛牨，一隻羊牨。
15 巴蘭對巴勒講：「你住遮，徛佇你燒祭的邊仔，聽候我去遐見耶和華。」
16 耶和華抵著巴蘭，用話交代伊；閣講：「你倒去巴勒遐，著按呢講。」
17 伊就倒去巴勒遐，看見伊徛佇燒祭的邊仔；摩押的首領也及伊佇遐。巴勒問伊講：「耶和華講甚麼話啊？」
18 巴蘭就提起伊的歌，講：
巴勒啊，起來聽；
西撥的子，你俯耳孔來聽我。
19 上帝是親像人，會講白賊，
也是人的子，會退悔。
伊已經講豈無行嗎？
伊講出豈無應驗嗎？
20 看啊，我奉命祝福；
伊所應允的福氣，我𣍐給伊反倒轉。
21 伊無看見雅各有過失，
佇以色列無看見有奸惡。
耶和華──伊的上帝及伊佇啲；
佇𪜶中間有謳咾王的聲。
22 上帝導𪜶出埃及；
𪜶親像有野牛的力。
23 雅各中決斷無法術，
以色列中也無占卜。
到時論起雅各，及以色列欲講：
上帝行許呢大的事！
24 看啊，此個百姓起來，親像母的獅，
挺身，親像公的獅，
猶未食所搙著的物，
猶未飲受咬死者的血，決斷無倒啲。
25 巴勒對巴蘭講：「你攏通咒詛𪜶，也通給𪜶祝福。」
26 巴蘭應巴勒講：「我豈無給你講『見若耶和華所講的，我欲遵趁』嗎？」
巴蘭第三擺預言
27 巴勒對巴蘭講：「來啊，我導你去別所在，豈採上帝歡喜你佇遐給我咒詛𪜶。」
28 巴勒就導巴蘭到彼個看落低，會看見曠野的毗珥的山尖。
29 巴蘭對巴勒講：「你佇遮給我起七座壇，閣佇遮給我備辦七隻牛牨，七隻羊牨。」
30 巴勒就照巴蘭的話行，佇逐座壇獻一隻牛牨，一隻羊牨。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。