上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
19
赤色牛母的灰
耶和華吩咐摩西、亞倫講：
2 「耶和華所命令律法的條例是按呢講：你著吩咐以色列人，用一隻純全無瑕疵、未曾掛軛，赤色的牛母牽到你遮，
3 你著將伊交互祭司以利亞撒；通帶出營外，人就刣牛佇伊的面前。
4 祭司以利亞撒著用指頭仔提伊的血淡薄，向會幕前灑血七擺。
5 著有一人佇祭司的目睭前燒母的牛仔；就是燒伊的皮、伊的肉、伊的血、伊的糞。
6 祭司著將柏香柴、牛膝草、朱紅色綿攏㧒佇燒牛的火中。
7 祭司著洗伊的衫，用水洗身軀，然後入營，祭司欲無清氣到下昏。
8 燒牛仔的人著用水洗伊的衫，用水洗身軀，欲無清氣到下昏。
9 著有一個清氣的人收拾牛母的灰，下佇營外清氣的所在，留啲做以色列會眾除去垃墋的水。這也是除去罪。
10 收拾牛母的灰的人著洗伊的衫，欲無清氣到下昏。這欲互以色列人及寄腳佇𪜶中間的外人做永遠的例。」
摸著身屍無清氣的條例
11 「摸著人的身屍的，就欲七日久無清氣。
12 彼人到第三日著用彼個水清氣本身，到第七日才清氣。伊若佇第三日無清氣本身，到第七日就無清氣。
13 見若摸著人的身屍、無清氣家己的，就拍垃墋耶和華的會幕，此個人著對以色列中剪除；因為除去垃墋的水無灑佇伊的身軀，伊就無清氣，伊的無清氣猶久佇伊。
14 「人死佇布棚內彼個條例是按呢：見若入彼個布棚，及一切佇布棚內的，攏著無清氣七日久。
15 見若掀開的器具，就是蓋無蓋密的，也是無清氣。
16 無論甚麼人佇田野摸著互刀刣死的，抑是身屍，抑是人的骨頭，抑是墳墓，就七日久無清氣。
17 著為著此個無清氣的人提淡薄所燒除去罪的火灰下佇器具內，倒活水佇彼頂面。
18 著有一個清氣的人提牛膝草搵佇此個水，將水灑佇布棚，及攏總的器具以及彼內面的人，閣灑摸著骨頭的，抑是摸著受刣的，抑是摸著死屍的，抑是摸著墳墓的。
19 第三日及第七日，清氣的著給彼個無清氣的灑水，到第七日通互伊清氣。彼人著洗衫，用水洗身軀，到下昏才清氣。
20 「總是彼個無清氣的人也無清氣家己的，著對會中剪除伊，因為伊拍垃墋耶和華的聖所。除去垃墋的水無灑佇伊的身軀，伊是無清氣的人。
21 這欲給𪜶做永遠的例。閣彼個給人灑除去垃墋的水，彼人著洗伊的衫。見若摸彼個除去垃墋的水的，的確無清氣到下昏。
22 見若無清氣的人所摸著的就無清氣；摸著伊的，的確無清氣到下昏。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。