上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
4
哥轄子孫的職責
耶和華吩咐摩西、亞倫講：
2 「你著對利未人的中間，算哥轄子孫的總額，照𪜶的家口、宗族，
3 對三十歲以上到五十歲，見若入來當職、佇會幕內做工的，攏著算伊。
4 哥轄的子孫佇會幕所做的工，就是料理至聖的物記佇下底：
5 營盤起身的時，亞倫及伊的子著入去褪遮截的帳簾，用伊來遮蓋法櫃，
6 閣用海狗皮蓋佇頂面，閣蓋專專藍色的布，然後才串伊的槓。
7 閣用藍色的布舒佇排列餅的桌，將諸個盤、匙、碗、灌奠的杯，排佇彼頂面。佇遐也著有常常排設的餅。
8 佇彼頂面閣著罩朱紅色的布，閣用海狗皮做蓋來蓋，才串伊的槓。
9 𪜶著提藍色布，來蓋照光的燈台及伊的盞、伊的剪、伊的盤，及一切做伊的路用貯油的器具。
10 閣著將燈台及伊一切的器具包佇海狗皮的蓋內，下佇柴架頂。
11 佇金壇頂𪜶著舒藍色的布，用海狗皮做蓋來蓋，才串伊的槓。
12 閣著提所用來服事的器具就是佇聖所用來服事的包佇藍色的布，用海狗皮做蓋來蓋，下佇柴架頂。
13 𪜶著收壇頂的火灰，用紫色的布舒佇彼頂面；
14 閣著用𪜶做工所用一切的器具排佇頂面，就是火鼎、肉叉、托仔、盤，一切屬佇壇的器具，閣用海狗皮做蓋來罩伊，才串伊的槓。
15 營盤欲起身的時，亞倫及伊的子將聖所，及聖所一切的器具蓋明白，然後哥轄的子孫著來扛，獨獨通摸聖的物，免得𪜶死。會幕內諸個物件是哥轄的子孫所著扛的。
16 「祭司亞倫的子以利亞撒所著顧守的是點燈的油及香料，及常常獻的素祭及抹的油，也著顧守全會幕及彼中間所有的，及聖所，及聖所所有的器具。」
17 耶和華吩咐摩西、亞倫講：
18 「恁通將哥轄人家族的支派對利未人的中間剪除去。
19 𪜶倚近至聖的物的時，恁著給𪜶按呢設法，互𪜶會活，免得死。亞倫及伊的子著入去派𪜶逐人所著做；所著扛的。
20 獨獨𪜶霎仔久也通入去看聖所，免得𪜶死無。」
革順子孫的職責
21 耶和華吩咐摩西講：
22 「你著算革順子孫的總額，照𪜶的宗族、家口，
23 對三十歲以上到五十歲，見若入來當職、佇會幕內做工的，攏著算伊。
24 革順人諸個家的工程，所著辦理、所著扛的就是諸個：
25 𪜶著扛會幕許個帳幅以及會幕，及伊的蓋及佇彼頂面海狗皮做的蓋，及會幕的門簾，
26 院的布帷及院門的門簾（院就是圍會幕及壇的）、索仔，及所用的器具，無論做甚麼路用的，𪜶攏著料理。
27 革順的子孫佇𪜶一切所扛的物所辦的事攏著照亞倫及伊的子孫所命令的來辦；𪜶所應該扛的，恁著派𪜶顧守。
28 這是革順子孫諸個家佇會幕內所做的工；𪜶所顧守的，著佇祭司亞倫的子以他瑪的手下。」
米拉利子孫的職責
29 「論到米拉利的子孫，你著照𪜶的家口、宗族給𪜶點算。
30 對三十歲以上到五十歲，見若入來當職、佇會幕內做工的，攏著算伊。
31 𪜶所擔當的責成照會幕諸個工程，就是會幕的板、及伊的楗、伊的柱、伊的座，
32 院四圍的柱及伊的座、伊所釘的釘、及索仔，及一切所用的器具。𪜶擔當所扛的器具，恁著照名指定著。
33 這是米拉利子孫諸個家的工，就是𪜶佇會幕內所做的工，攏佇祭司亞倫的子以他瑪的手下。」
利未支派查甫丁的統計
34 摩西、亞倫及會眾諸個首領將哥轄的子孫，照𪜶的宗族、家口，
35 對三十歲以上到五十歲，見若入來當職、佇會幕內做工的，攏過算伊。
36 照𪜶的家口過算的共有二千七百五十名。
37 這是哥轄族諸個家過算的，是見若佇會幕內做工的，就是摩西、亞倫照耶和華託摩西所命令點算的。
38 革順的子孫過算的，照𪜶的家口、宗族，
39 對三十歲以上到五十歲，見若入來當職、佇會幕內做工的，
40 其中過算的，照𪜶的家口、宗族，共有二千六百三十名。
41 這是革順子孫諸個家過算的，是見若佇會幕內做工的，就是摩西、亞倫照耶和華所命令來點算的。
42 米拉利子孫諸個家過算的，照𪜶的家口、𪜶的宗族，
43 對三十歲以上到五十歲，見若入來當職、佇會幕內做工的，
44 其中過算的照𪜶的家口，共有三千二百名。
45 這是米拉利子孫諸個家過算的，就是摩西、亞倫照耶和華託摩西所命令點算的。
46 見若過算的利未人，就是摩西、亞倫及以色列諸個首領，照𪜶的家口、𪜶的宗族所點算的，
47 對三十歲以上到五十歲，見若入來當職、佇會幕內做扛物的工的，
48 其中過算的共有八千五百八十名。
49 𪜶互摩西點算照耶和華所命令的，逐人照伊所辦的事、照伊所扛的物；𪜶按呢互伊點算，是照耶和華所命令摩西的。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。