上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
14
亞伯蘭救羅得
當暗拉非做示拿王，亞略做以拉撒王，基大老瑪做以攔王，提達做戈印王的時，
2 𪜶來攻擊所多瑪王比拉、蛾摩拉王比沙、押瑪王示納、洗扁王施米別，以及比拉王；比拉就是瑣珥。
3 𪜶攏聚會佇西訂的山谷；西訂山谷就是鹽海。
4 𪜶服事基大老瑪十二年久，到十三年背叛。
5 十四年，基大老瑪及同會盟諸個王攏來佇亞特律‧加寧，刣贏利乏音人，佇涵蘇西人，佇沙微‧基列亭以米人，
6 佇何利人的西珥山何利人，到近佇曠野的伊勒‧巴蘭。
7 𪜶倒轉到安‧密巴，就是加低斯，攻擊亞瑪力全地，及徛起佇哈洗遜‧他瑪的亞摩利人。
8 對彼霎所多瑪王、蛾摩拉王、押瑪王、洗扁王、比拉王（比拉就是瑣珥）攏出來，佇西訂的山谷排陣，及𪜶交戰，
9 就是及以攔王基大老瑪、戈印王提達、示拿王暗拉非、以拉撒王亞略交戰；四個王對敵五個王。
10 西訂山谷攏是石油坑。所多瑪蛾摩拉諸個王逃走，跋佇遐，其餘的走上山。
11 𪜶就將所多瑪蛾摩拉的財物，以及𪜶的乾糧攏搶做𪜶去；
12 閣將亞伯蘭的姪羅得及伊的財物搶去。彼時羅得住佇所多瑪。
13 有一個逃走的人來給希伯來人亞伯蘭講；彼時亞伯蘭徛起佇亞摩利人幔利的橡樹彼所在。幔利及以實各及亞乃攏是兄弟，有及亞伯蘭聯盟。
14 亞伯蘭聽見伊的姪互人掠去，就導生養佇伊的家裡精練的壯丁三百十八人，追趇到但，
15 伊及伊的奴僕透暝分隊攻擊𪜶，追到大馬色倒旁的何巴，
16 將一切的財物搶倒轉，連伊的姪仔羅得及伊的財物，以及婦女、百姓亦攏搶倒轉。
麥基洗德祝福亞伯蘭
17 亞伯蘭刣贏基大老瑪以及及伊做陣諸個王倒來的時，所多瑪王出來，到沙微的山谷迎接伊；沙微的山谷就是王的山谷。
18 亦有撒冷王麥基洗德帶餅及酒出來；伊是至高上帝的祭司。
19 祝福伊，講：「願天地的主、至高的上帝賜福亞伯蘭！
20 至高的上帝將對敵交佇你的手，應該謳咾伊！」亞伯蘭將攏總所得著的十份提一份互伊。
21 所多瑪王給亞伯蘭講：「將人歸我，物攏互你！」
22 亞伯蘭給所多瑪王講：「我有指天地的主──至高的上帝耶和華來咒誓：
23 凡若你的物，就一條線、一條鞋帶，我攏提，免得你講：『我互亞伯蘭好額！』
24 只有少年人所食的，以及及我同行的人亞乃、以實各、幔利所應得的份額，通出在𪜶提。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。