上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
15
下痟症的人清氣的條例
耶和華吩咐摩西、亞倫講：
2 「恁著吩咐以色列人，給𪜶講：人若患著下痟的症，伊因為此個下痟的症就無清氣。
3 伊因為下痟的無清氣是此款，無論是㾽精，抑是色淋，攏是無清氣。
4 見若患著下痟的，伊所倒的床攏是無清氣，伊所坐的物也是無清氣。
5 見若摸著伊的床的，著洗伊的衫，家己洗佇水裡，無清氣到下昏。
6 彼個坐著下痟的人所曾坐的物的，著洗伊的衫，家己洗佇水裡，無清氣到下昏。
7 彼個摸著下痟的人的身軀的，著洗伊的衫，家己洗佇水裡，無清氣到下昏。
8 若下痟的人呸涎佇清氣的人的身軀，彼人著洗伊的衫，家己洗佇水裡，無清氣到下昏。
9 下痟的人所騎的馬鞍也是無清氣。
10 伊身下所倚著的物，見若摸著伊的確無清氣到下昏；提著彼個物的，著洗伊的衫，家己洗佇水裡，無清氣到下昏。
11 下痟的人猶未用水洗手，伊所摸著的人著洗伊的衫，家己洗佇水裡，無清氣到下昏。
12 下痟的人所摸著磁的器具著摃破；柴的器具著用水洗。
13 「下痟的人伊的下痟已經好，為著欲清氣家己著算七日，也著洗伊的衫，用活水洗身軀，就得著清氣。
14 到第八日，伊著為著家己取二隻鳩鵻，抑是二隻鴿仔子，到會幕門口、耶和華的面前，交代祭司。
15 祭司著獻伊一隻做贖罪祭，一隻做燒祭；祭司著因為伊的下痟的症，佇耶和華的面前給伊贖罪。
16 「人若夢遺，著用水洗身軀，的確無清氣到下昏。
17 無論衫仔褲，抑是皮染著精，著用水洗，的確無清氣到下昏。
18 若男女交合，二人著用水洗，的確無清氣到下昏。
19 「婦仁人行經流血，的確污穢到七日久；見若摸著伊的，的確無清氣到下昏。
20 佇伊污穢的時間，見若伊所倒的物攏是無清氣，見若伊所坐的物也是無清氣。
21 見若摸著伊的眠床的，著洗伊的衫，家己洗佇水裡，無清氣到下昏。
22 見若摸著伊所坐的物的，著洗伊的衫，家己洗佇水裡，無清氣到下昏。
23 彼個物若是佇床裡，抑是佇婦仁人所坐的物，摸著伊的，的確無清氣到下昏。
24 查甫人若及彼個婦仁人同房，互伊的垃墋染著，著七日久無清氣；見若伊所倒的床也無清氣。
25 「婦仁人若佇經期以外患著多多日的血漏，抑是經期以後有血漏，伊就因為此個血漏無清氣的日，及伊經期的日一樣，伊是無清氣。
26 佇伊血漏一切的日，見若伊所倒的床，伊著看親像經期的床一樣，也見若伊所坐的物的確無清氣，及伊經期的時無清氣一樣。
27 見若摸著許個物的，就無清氣，著洗伊的衫，家己洗佇水裡，無清氣到下昏。
28 婦仁人血漏若已經好，著為家己算七日，然後才清氣。
29 到第八日，伊著為家己取二隻鳩鵻抑是二隻鴿仔子，帶到會幕門口，交代祭司。
30 祭司著獻一隻做贖罪祭，一隻做燒祭；祭司因為彼人血漏無清氣，著佇耶和華的面前為著伊贖罪。
31 「恁著按呢互以色列人及𪜶的無清氣隔斷，免得𪜶拍垃墋佇𪜶中間我的會幕，致到死佇𪜶的無清氣。」
32 這是患著下痟症及夢遺致到伊無清氣的，
33 及彼個有經期的病的婦仁人及患著下痟的，無論男女，以及人及無清氣的婦仁人同房的的規例。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。