上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
13
有關皮膚病的條例
耶和華吩咐摩西、亞倫講：
2 「人的皮膚若腫，豈採生癬，抑是生火斑，佇伊的皮膚變成癩𰣻的症頭，著導伊到祭司亞倫抑是到伊的子孫一個祭司的面前。
3 祭司著驗皮膚的症頭，若是著症頭的所在彼個毛已經變白，症頭的款式深入去佇皮膚內，這就是癩𰣻的症頭。祭司著驗伊，斷伊做無清氣。
4 若火斑佇伊的皮膚是白的，款式無深入佇皮膚內，伊的毛也無變白，祭司就著將有症頭的人關禁七日。
5 到第七日，祭司著驗伊，看啊，若看見症頭已經停止，伊的症頭無湠入皮膚，祭司著閣給伊關禁七日久。
6 到第七日，祭司著閣驗伊，看啊，若症頭卡熄，閣症頭無湠入皮膚，祭司著斷伊做清氣，是癬若定；彼人就著洗衫褲，得著做清氣。
7 總是伊為著清氣，將身軀互祭司驗了，癬若湠佇皮膚，伊著閣去互祭司驗。
8 祭司著驗伊，看啊，癬若湠佇皮膚，祭司著斷伊做無清氣，是癩𰣻。
9 「人已經有癩𰣻的症頭，就著導伊見祭司。
10 祭司著驗伊，看啊，皮膚若有所在腫白白，致到伊的毛變白，佇腫的所在見赤肉，
11 這是皮肉舊的癩𰣻，祭司著斷伊做無清氣，免閣關禁伊，因為伊是無清氣。
12 癩𰣻若生湠佇皮膚的四圍，佇患症頭的人的皮膚起到滿滿，照祭司驗伊，對頭到腳無一所在無，
13 祭司就著驗伊，看啊，癩𰣻若已經起佇全身，就著斷彼個患著症頭的做清氣；通身軀攏變白，伊是清氣。
14 總是伊的身軀甚麼時見赤肉彼時就無清氣。
15 祭司著驗彼個赤肉就斷伊是無清氣。赤肉本是無清氣，是癩𰣻。
16 赤肉若復原，閣變白，伊著來見祭司。
17 祭司著驗伊，看啊，症頭若變白，祭司就著斷彼個患症頭的做清氣，伊就清氣。
18 「人若佇皮膚生仔，也有醫好，
19 佇生仔的所在閣腫白白，抑是粉紅色的火斑，就著互祭司驗。
20 祭司著驗伊，看啊，若款式透入皮膚內，伊的毛也變白，祭司著斷伊做無清氣，是癩𰣻的症頭發佇仔內。
21 祭司若驗伊，看啊，彼頂面無有白的毛，也無透入佇皮膚內，閣有卡熄，祭司就著給伊關禁七日。
22 若生湠佇皮膚，祭司就著斷伊做無清氣，是患著症頭。
23 火斑若佇原所在停止，無生湠，就是仔的痕跡，祭司就著斷伊做清氣。
24 「人的皮肉若互火燒著，燒著的所在見赤肉成做火斑，抑是粉紅，抑是攏總白，
25 祭司就著驗伊，看啊，火斑中的毛若變白，款式閣深入佇皮膚內，是癩𰣻佇火燒的中間發起來，祭司就著斷伊做無清氣，是癩𰣻的症頭。
26 總是祭司驗了，看啊，佇火跡無有白毛，也無透入皮膚內，閣有卡熄，祭司就著給伊關禁七日。
27 到第七日，祭司著驗伊，若湠佇皮膚，祭司就著斷伊做無清氣，是癩𰣻的症頭。
28 火斑若佇原所在停止，無生湠佇皮膚，閣有卡熄，是對火燒著來腫，祭司著斷伊做清氣，不過是火燒著的痕跡。
29 「無論男女，若佇頭殼抑是嘴鬚有致症頭，
30 祭司著驗彼個症頭；看啊，款式若深入佇皮膚內，彼中間有幼幼黃的毛，祭司就著斷伊做無清氣，這是瘡，就是頭殼抑是嘴鬚裡的癩𰣻。
31 祭司驗彼個瘡的症頭，看啊，款式若無深入皮膚內，彼中間也無黑的毛，祭司就著將患著瘡的症頭者，關禁七日久。
32 到第七日，祭司著驗彼個症頭，看啊，瘡若無湠，彼中間也無黃的毛，瘡的款式也無深入皮膚內，
33 彼人著剃伊的毛，總是瘡通剃。祭司著閣關禁彼個生瘡的七日久。
34 到第七日，祭司著驗彼個瘡，看啊，瘡若無湠佇皮膚，款式也無深入佇皮膚內，祭司就著斷伊做清氣，伊著洗衫褲，就成做清氣。
35 總是伊清氣以後，瘡若湠佇皮膚，
36 祭司著驗伊。看啊，伊的瘡若湠佇皮膚，祭司免閣尋黃的毛，伊是無清氣。
37 若照伊看瘡已經停止，彼中間若發黑的毛，瘡既然好，彼人是清氣，祭司就著斷伊做清氣。
38 「無論男女，皮肉若起火斑，就是白色的火斑，
39 祭司著驗伊，看啊，𪜶的皮肉的火斑若是火灰色，這是皮膚所發的白疤，彼人是清氣。
40 「人若𢬳頭毛，伊的頭殼是光裸裸，猶是清氣。
41 伊的頭殼前的頭毛若𢬳，伊是翏額的，猶久是清氣。
42 頭殼光裸裸的所在，抑是翏額的所在若有粉紅色的症頭，這是癩𰣻發佇頭光裸裸的所在，抑是翏額的所在，
43 祭司著驗伊，看啊，伊的症頭若佇頭殼光裸裸的所在抑是翏額的所在有粉紅色腫起來，親像皮肉癩𰣻的款式，
44 彼人就是起癩𰣻，無清氣的，祭司的確著斷伊做無清氣，伊的症頭是佇頭殼。
45 「有癩𰣻的症頭者，伊的衫褲著拆裂，伊的頭毛著拍散，掩伊的嘴的頂唇，叫講：『無清氣！無清氣！』
46 症頭佇伊的身軀的日，伊就無清氣；伊既然是無清氣，伊著家己𫢶伊的所在佇營外。」
衣服發霉的條例
47 「染著癩𰣻症的衫褲，無論是羊毛的，抑是苧布
48 無論是經、是緯，是苧布的、是羊毛的、是皮的、抑是皮做的物，
49 彼個症頭若是青，抑是紅的色，佇衫褲，佇皮、佇經、佇緯，抑是佇皮做的物，是癩𰣻的症頭，著互祭司驗。
50 祭司著驗彼個症頭，將染著症頭的物關禁七日。
51 到第七日，伊著驗彼個症頭，症頭若湠佇衫褲，佇經、佇緯、佇皮，此個皮無論做甚麼路用，彼個症頭是惡的癩𰣻，攏是無清氣。
52 彼個染著症頭的衫褲，或是經、是緯、是羊毛、是苧布，抑是皮做的物，伊攏著燒去；因為這是惡的癩𰣻，的確佇火中燒去。
53 「祭司驗伊，看啊，症頭若無湠佇衫裡，佇經、佇緯，抑是皮做的物，
54 祭司著吩咐𪜶，洗彼個染著症頭的物，閣關禁七日。
55 症頭洗了後，祭司著驗伊，看啊，症頭若無變色，症頭若無閣湠，彼個就無清氣，是惡毒的症頭，無論面歹裏歹，攏著用火燒。
56 洗了後，祭司驗伊，看啊，若彼個症頭卡熄，伊就著對衫，抑是皮，抑是經、抑是緯，給伊拆起來。
57 若是猶久發現佇衫裡，抑是經、抑是緯、抑是皮做的物，這是症頭啲發，著用火燒彼個染著症頭的物。
58 你所洗的衫，或是經、或是緯、或是皮做的物，若症頭已經離開，著閣再洗，就清氣。」
59 這就是癩𰣻症頭的規例，無論是佇羊毛衫，苧布衫，佇經、佇緯，及皮做的物，通斷做清氣抑是斷做無清氣。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。