上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
啟示錄
18
巴比倫倒壞
諸個代誌了後，我看見別個天使對天落來有大權柄，地上對伊的榮光來光。
2 伊大聲叫講：
大的巴比倫倒壞啦！倒壞啦！
今成做鬼徛起的所在
及攏總污穢的神的監牢，
以及攏總無清氣可惡的鳥的鳥籠。
3 因為萬邦對伊淫亂惹著受氣的酒來倒壞。
地上諸個王曾及伊行姦淫；
地上諸個生理人已經對伊的奢華到極，致到好額。
4 我閣聽見對天有別個聲講：
我的百姓啊，著對遐出來，
免得有份伊的罪，也免得受伊的災禍；
5 因為伊的罪抵天；
伊逐號的不義，上帝記得。
6 著照伊款待人的，來款待伊，
照伊的所行加倍報應伊；
佇伊所調和的杯，今也加倍調和來互伊。
7 伊曾怎樣榮光家己，來奢華，
今互伊艱苦悲哀也照按呢，
因為伊心內講：
我是坐啲做王，
並是寡婦，
決斷𣍐抵著悲哀。
8 所以一日的中間，
伊的災禍攏欲到，
就是死無、悲哀、飢荒。
伊也欲互火燒燎去，
因為審判伊的主上帝就是大氣力的。
9 地上諸個王，平素及伊行姦淫來奢華的，看見燒伊的煙，就為著伊悲傷啼哭。
10 因為驚伊的艱苦，就遠遠徛啲講：慘啊！慘啊！
大城巴比倫，堅固的城啊，
因為一時間你的審判到啦。
11 地上諸個生理人也為著伊悲傷哀慘，因為無人閣買𪜶的貨；
12 就是金、銀、寶石、真珠、幼葛、紫色、絲綢、朱紅諸個貨、及逐號的香柴、逐號象牙的器具、逐號貴氣的柴、銅、鐵、白石的器具，
13 也有肉桂、荳蔻、香料、香油、乳香、酒、油、幼麵、麥、牛、羊、馬、車、奴僕，以及人的靈魂。
14 你的心所意愛的果子已經離開你；
你的好食
及好看的物攏無去，
決斷無閣看見。
15 做諸個物的生理人，對伊得著好額的，因為驚伊的艱苦，欲遠遠徛，悲傷哀慘，講：
16 慘啊！慘啊！此個大城，
平素穿幼葛、
紫色、朱紅色的衫，
用金、寶石、真珠妝飾的。
17 因為一時間，到許大的好額變做荒廢。
逐個舵公及搭船去逐所在的，及水手，連佇海裡趁食的，攏遠遠啲徛，
18 看見燒伊的煙，就喉叫講：「叨落一個城親像此個大城啊？」
19 閣用塵埃摻頭殼，悲傷哀慘，喉叫講：
慘啊！慘啊！此個大城。
凡有船佇海裡的，攏對伊的豐盛來致到好額！
因為一時間成做荒廢！
20 天啊，諸個聖徒及先知啊！
恁通因為伊來歡喜，
因為上帝將恁所受的審判來審判伊。
21 有一個大氣力的天使夯石，親像大的石磨，㧒伊佇海裡，講：
巴比倫大城也欲親像按呢大沈受㧒落，
決斷𣍐閣看見。
22 彈琴、作樂、歕簫、歕號頭的聲音，
決斷無閣聽見佇你的中間；
逐樣工藝的師傅決斷無閣看見佇你的中間；
挨磨的聲決斷無閣聽見佇你的中間；
23 燈的光決斷無閣照佇你的中間；
新子婿及新娘的聲，決斷無閣聽見佇你的中間。
因為你的生理人平素做地上的尊貴者；
萬國也對你的邪術來受迷惑。
24 閣先知及聖徒，及地上一切受刣的人的血，攏佇此個城尋著。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。