上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
啟示錄
1
引言及致意
耶穌基督的啟示，就是上帝所互伊，來指示伊諸個奴僕的，就是欲緊緊成的事。伊就託伊的天使去指點伊的奴僕約翰。
2 約翰就是將上帝的道及耶穌基督的干證，見若伊所有看見的來做干證。
3 凡若讀及聽許個讖語來守其中所記載的，有福氣，因為日期近啦。
4 約翰寄批互亞西亞七個教會。願恁得著恩典、平安！對彼個現在佇啲、早佇啲、將來亦佇啲的，以及對伊座位前七個神，
5 閣對耶穌基督就是忠信的干證、死人中頭一個活的、地上諸個王的主宰。
伊疼咱，用伊的血解放咱脫離咱的罪，
6 互咱做國，做伊的父上帝的祭司。願榮光、權能歸佇伊，到代代。阿們！
7 伊坐雲來！
眾目睭欲看見伊，
連鑿伊的人亦欲看見伊；
地上的族攏欲為著伊來啼哭。
實在是按呢。阿們！
8 主上帝講：「我是阿利法，閣是奧美加，現在佇啲、早佇啲、將來佇啲的，是全能者。」
基督的異象
9 我──約翰就是恁的兄弟，相及有份佇耶穌的患難，及伊的國，及伊的吞愞的，為著上帝的道，及耶穌的干證，曾𫢶佇一個海嶼名叫拔摩。
10 佇主的日，我互神感動，聽見佇我的後面有大聲親像號頭，講：
11 「你所看見的著寫佇冊裡，寄互彼七個教會就是以弗所、士每拿、別迦摩、推雅推喇、撒狄、非拉鐵非、老底嘉。」
12 我就越轉身，愛看及我講話的聲；已經越轉，就看見七支的金燈台。
13 燈台中有親像人子的，身軀穿長衫，胸坎縖金帶。
14 伊的頭殼及頭毛攏白，親像白的綿，親像雪；伊的目睭親像火焰；
15 伊的腳親像光亮的銅，親像過火爐鍛煉的；聲親像多多條水的聲。
16 佇伊的正手有七粒星，對伊的嘴吐出雙面利的劍；伊的面貌親像炎日射出光。
17 我看見伊，就仆佇伊的腳前，親像死。伊用正手按我，講：「莫得驚！我是起頭的，及煞尾的，亦是活的；
18 我曾死，今你看，我是活到代代；閣有死無及陰府的鎖匙。
19 所以你著將所看見的，以及現今所有的，及後來欲成的事，寫伊。
20 你所看見、我正手頂七粒星的奧妙及七支的金燈台，七粒星就是七個教會的使者，七支燈台就是七個教會。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。