上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
希伯來書
11
論信
信就是所向望者的實在，及未看見的事的憑準。
2 因為佇此個，就古早人有得著干證。
3 對信，咱知諸個世界是對上帝的話來造成；按呢，所看見的，是對會看見的來成。
4 對信，亞伯獻祭互上帝，比該隱卡好，對按呢得著干證伊是義，就是上帝看伊的禮物來做干證。閣對此個信，伊死了猶啲講話。
5 對信，以諾受遷徙，致到無見著死，人尋伊𣍐著，因為上帝遷徙伊；是未遷徙的代先，有得著干證伊互上帝歡喜。
6 設使無信，就𣍐會互上帝歡喜；因為親近上帝者，的確著信伊有，也是報賞許個求伊的人。
7 對信，挪亞佇未看見的事，已經得著默示，就敬畏，來備辦大船，救伊的家眷。對按呢來定世間的罪，閣得著承接照信的義。
8 對信，亞伯拉罕受召的時就順命令出去，到將來欲得著做業的地；伊出去，知欲去叨落。
9 對信，就出外佇所應允的地，親像佇是家己的地，徛起佇布棚，及以撒、雅各就是相及承接同一樣的應允的。
10 因為伊向望有地基的城，是上帝所經營起造的。
11 對信，撒拉，雖罔過生產的年歲，猶得著會懷孕，因為伊掠應允伊的做信實。
12 所以對一人閣是親像已經死者生湠，親像天星的多，親像海沙的𣍐算得。
13 諸個攏是照信來死，未曾得著所應允的；獨獨遠遠看，歡喜來等接，閣家己認佇地上做人客，做出外的。
14 因為按呢講的是表明𪜶啲尋一個祖家。
15 𪜶若數念所對遐出來的地，就有通倒去的機會。
16 總是今𪜶欣慕閣卡好的，就是佇天裡的。所以上帝稱做𪜶的上帝，無掠做見誚，因為已經替𪜶備辦一個城。
17 對信，亞伯拉罕受試的時，獻以撒；就是彼個承受諸個應允的，獻伊獨生的子。
18 曾有給伊講：「對以撒生的欲稱做你的後裔。」
19 因為伊掠做上帝對死人中會互伊復活；所以通譬喻講得著伊對死倒轉來。
20 對信，以撒論將來的事祝福雅各、以掃。
21 對信，雅各臨終的時，給約瑟二個子祝福，倚枴仔來敬拜。
22 對信，約瑟臨終的時，念著以色列的後裔欲出埃及，閣為著伊的骨骸來吩咐。
23 對信，就摩西出世的時，伊的父母因為看見子清秀，囥密伊三月日，亦驚王的命令。
24 對信，摩西已經長成承認做法老查某子的子。
25 卡愛及上帝的百姓相及受苦難，愛暫時享受罪惡的快樂。
26 掠做有份基督的凌辱比埃及的財寶卡貴氣，是向望報賞的緣故。
27 對信，伊離開埃及，無驚王的受氣；堅心忍耐，親像看見所𣍐看見的主。
28 對信，來設𨃟過節，及抹血的禮，免得剿滅大子的磕著𪜶。
29 對信，𪜶過紅海親像行乾地；埃及人試行伊，就沈落去。
30 對信，踅耶利哥城歷過七日，城就倒壞。
31 對信，娼妓喇合用和平接納細作，所以無及順趁的人相及滅無。
32 我欲閣講甚麼啊？欲講基甸、巴拉、參孫、耶弗他、及大衛、撒母耳，以及諸個先知，就時無夠額。
33 許個人對信，刣贏諸個國，行公義，得著應允，勒獅的嘴，
34 拍熄火焰，閃避利刀；弱成做強，交戰勇猛，攻破外邦的戰陣。
35 有婦仁人得著𪜶的親人對死復活。亦有人受酷毒的刑罰，願受贖，是愛得著卡好的復活。
36 閣有人受戲弄、鞭拍、以及鎖鍊、關監、諸個試，
37 閣有人受石頭擲，鋸仔鋸，受誘惑的試，互刀刣死，穿綿羊山羊的皮奔波逐所在，抵著喪鄉、患難、暴虐，
38 有的佇曠野、佇山嶺、佇石洞、佇地穴，四界漂流，諸個人是世間𣍐堪得有的。
39 𪜶攏已經對信得著干證，若是未曾得著所應允的；
40 因為上帝給咱代先備辦閣卡好的事，是欲互𪜶若無咱，就𣍐得著完全。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。