上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
11
巴別塔
彼時，天下的口音、言語攏一樣。
2 𪜶徙去東勢的時陣，佇示拿地抵著一片的平洋，就住佇遐。
3 𪜶大家參詳講：「來啊！咱著做磚，燒互伊熟。」𪜶有磚通替石，閣有石油通替灰土。
4 閣講：「來啊！咱著起城及塔，塔頂抵天，為咱立一個名，免得咱四散佇全地。」
5 耶和華降臨，欲看世間人所起的城及塔。
6 耶和華講：「看啊！諸個百姓攏合一，言語亦一樣，現今已經起手做此個事，以後𪜶所欲做的無一項會禁止。
7 來啊！咱落來去，佇遐拍亂𪜶的口音，互𪜶的言語大家𣍐相通。」
8 對按呢耶和華互𪜶對遐四散佇全地；𪜶就停工，無起彼個城。
9 所以彼個城名叫巴別，因為耶和華佇遐拍亂天下的言語，耶和華互人對遐四散佇全地上。
閃的世系
10 ( 代上 1:24-27 )
閃的世系記佇下底。閃一百歲，大水以後二年，生亞法撒。
11 閃生亞法撒了後猶活五百年，閣有生子查某子。
12 亞法撒三十五歲生沙拉。
13 亞法撒生沙拉了後猶活四百連三年，閣有生子查某子。
14 沙拉三十歲，生希伯。
15 沙拉生希伯了後猶活四百連三年，閣有生子查某子。
16 希伯三十四歲，生法勒。
17 希伯生法勒了後猶活四百三十年，閣有生子查某子。
18 法勒三十歲，生拉吳。
19 法勒生拉吳了後猶活二百連九年，閣有生子查某子。
20 拉吳三十二歲，生西鹿。
21 拉吳生西鹿了後猶活二百連七年，閣有生子查某子。
22 西鹿三十歲，生拿福。
23 西鹿生拿福了後猶活二百年，閣有生子查某子。
24 拿福二十九歲，生他拉。
25 拿福生他拉了後猶活一百十九年，閣有生子查某子。
26 他拉七十歲，生亞伯蘭、拿福、哈蘭。
他拉的世系
27 他拉的世系記佇下底。他拉生亞伯蘭、拿福、哈蘭；哈蘭生羅得。
28 哈蘭死佇伊的老父他拉的面前，佇伊的本地迦勒底的珥城。
29 亞伯蘭、拿福各有娶某：亞伯蘭的某名叫撒萊；拿福的某名叫密迦，是哈蘭的查某子；哈蘭是密迦的老父，亦是以斯迦的老父。
30 撒萊無懷孕，無子。
31 他拉導伊的子亞伯蘭及伊的孫羅得就是哈蘭的子，以及伊的媳婦撒萊就是伊的子亞伯蘭的某，𪜶相及出迦勒底的珥城，欲去迦南地；𪜶到哈蘭就住佇遐。
32 他拉享壽二百連五歲，他拉死佇哈蘭。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。