上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
羅馬書
1
祝福
耶穌基督的奴僕保羅，受召做使徒，分別伊來傳上帝的福音，
2 就是上帝從前託伊諸個先知佇聖經所應允的，
3 論伊的子，照肉體是對大衛的後裔生的；
4 照聖德的神就對死人的復活，用權能顯明伊是上帝的子，就是咱的主耶穌基督。
5 阮對伊受恩及使徒的職，欲為著伊的名互人佇萬邦中信來順趁；
6 從中也有恁諸個受召屬耶穌基督的。
7 批寄互見若住佇羅馬、上帝所疼、受召做聖徒的。願恁對咱的父上帝及主耶穌基督得著恩典平安。
保羅想欲訪問羅馬
8 頭一項，因為恁的信報揚佇通世間，所以我對耶穌基督為著恁眾人感謝我的上帝。
9 因為我佇伊的子的福音，用我的神所服事的上帝做我的干證，我怎樣數念恁無息；
10 祈禱的中間常常求，看此霎有通照上帝的旨意得著平坦的路就近恁。
11 因為我欣慕見著恁，通將神靈的恩賜分互恁，互恁堅固；
12 就是我佇恁中間，恁對我的信，我對恁的信，大家得著安慰。
13 兄弟啊，我愛恁知我多多擺立志欲就近恁，愛佇恁中間得著果子親像佇其餘的外邦；總是到今猶有阻擋。
14 無論希利尼人、抑是番人、聰明的、抑是愚戇的，我攏欠𪜶的債，
15 所以在佇我攏便便，欲用福音續傳互恁住佇羅馬的人。
福音是上帝的權能
16 因為我無掠福音做見誚，因為是上帝的權能欲救攏總信的人，代先猶太，後來希利尼。
17 因為佇福音的內面有顯明上帝的義；對信到佇信。照聖經所記載講：「義的人欲對信來活。」
人的罪惡
18 因為上帝的受氣對天顯明到佇人攏總的不虔不義，就是用不義壓制真理的人的。
19 因為論到上帝，人所通識伊的，有顯明佇𪜶的心內，因為上帝曾顯明指示𪜶。
20 因為對創造世間以來，上帝永遠的權能及聖質，凡所𣍐看見伊的，對受創造的物想了就明明看見，互𪜶無路通推託。
21 因為𪜶既然識上帝，若是無榮光伊做上帝，亦無感謝伊。就是𪜶的思想變做空空，𪜶的𣍐曉悟的心變做黑暗。
22 家己稱做智識，反轉做戇，
23 將𣍐敗壞的上帝的榮光，來換會敗壞的人及禽獸、蟲𧒴諸個像的款式。
24 所以照𪜶心內的私慾，上帝交付𪜶佇無清氣，互𪜶的身軀相凌辱。
25 𪜶用上帝的真換做假，敬拜服事受造的物，卡過頭佇造物的主──伊是堪得謳咾到代代的。阿們！
26 因為按呢，上帝交付𪜶佇見誚的情；𪜶的婦仁人用順性的路用變做逆性的路用；
27 查甫人也按呢，放拺婦仁人順性的路用，相意愛，慾火動心，查甫及查甫行無正經的事，佇𪜶本身受𪜶的差謬所應該抵著的報應。
28 𪜶既然肯存上帝佇𪜶的心思，上帝交付𪜶佇不中用的心，行合宜的事；
29 充滿攏總的不義、歹代、貪心、惡毒；滿滿怨妒行兇、相爭、奸詐、臭心行；
30 做講尻脊後話的、誹謗的、怨恨上帝的、侮慢的、驕傲的、品嗙的、造作歹代的、忤逆父母的、
31 無明理的、無守約的、無親人情的、無憐憫的。
32 𪜶既然知上帝的擬斷行諸個代誌的人應該死，就若家己行，閣別人行，𪜶也及𪜶歡喜。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。