上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
使徒行傳
28
保羅佇米利大
阮已經得著救，就知彼個海嶼名叫米利大。
2 番人用罕得有的仁愛款待阮；因為落雨，閣寒，𪜶就起火，接納阮眾人。
3 保羅拾柴一把，下佇火裡，有毒蛇，因為火熱𧽵出來，咬住佇伊的手。
4 番人看見毒物住佇伊的手，就相及講：「此個人的確是兇手，雖罔海裡得著救，天理𣍐容允伊活。」
5 保羅拂毒物佇火裡，攏無受傷。
6 番人聽候伊腫，抑是忽然死跋倒；聽候久久，看見伊無代誌，就反轉，拍算講：「伊是神明。」
7 海嶼的頭人，名部百流，有田園近佇遐；伊接納阮，三日久好禮相款待。
8 抵著部百流的老父有熱病及做痢倒啲。保羅入去就近伊，祈禱，給伊按手，醫好伊。
9 對按呢，海嶼中其餘的破病人亦來，得著醫好。
10 𪜶也用多多禮數尊敬阮；開船的時，將所欠用的送到船裡。
保羅到羅馬
11 過三月日，阮搭亞力山大的船起身；彼隻船號做「宙斯的雙生子」，是佇一個海嶼過冬天的。
12 到敘拉古拋啲，阮𫢶遐三日；
13 對遐踅到利基翁。過一日，南風起，第二日到部丟利。
14 佇遐抵著兄弟，請阮相及𫢶七日。就到羅馬。
15 羅馬的兄弟聽見阮的消息，就對遐來到亞比烏市及三館的所在，至接阮。保羅看見𪜶，感謝上帝，就壯膽。
16 已經入羅馬，准保羅及一個看守伊的兵另外住。
保羅佇羅馬傳道
17 過三日，保羅請猶太人的序大來相會。已經聚集，就對𪜶講：「兄弟啊，我雖然未曾犯著咱的百姓抑是列祖的規例，若是對耶路撒冷受缚，送交羅馬人的手。
18 𪜶已經審判我，看我無死罪，就愛放我。
19 獨獨猶太人反對，我不得已，對該撒告御狀，攏是有因端欲告我的百姓。
20 因為按呢，才請恁來相見，相及議論，是我為著以色列所向望的，才受此個鎖鍊捆缚。」
21 𪜶對伊講：「阮未曾對猶太接著批講到你的事，也未有甚麼兄弟到遮通報抑是講你有甚麼歹。
22 獨獨阮愛聽你的意見怎樣；因為此個黨，阮知逐所在互人嫌。」
23 𪜶已經及伊定著日期，多多人就近伊佇伊歇的厝。保羅對早起到下昏，排列來證明上帝的國，引摩西的律法及諸個先知，用耶穌的事苦勸𪜶。
24 伊所講的，有的信，有的信。
25 二旁𣍐相合，就四散；保羅代先講一句話，講：「聖神用先知以賽亞的嘴給恁的列祖所講的話是真著。
26 去給此個百姓講：
恁聽是欲聽，也攏𣍐曉悟；
恁看是欲看，也看攏𣍐見；
27 因為此個百姓心鈍，
耳孔重，
目睭放瞌；
驚了𪜶用目睭看見，
用耳孔聽見，
用心曉悟，來越輪轉，
我就醫好𪜶。
28 所以恁著知，上帝此個拯救，已經施行外邦，𪜶亦欲聽受。」
30 保羅徛家己稅的厝二年久。凡若入來見伊的，伊攏接納𪜶，
31 傳上帝的國，將主耶穌基督的代誌真好膽教示人，無人禁伊。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。