上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
使徒行傳
27
保羅坐船去羅馬
已經定著意思，互阮過海去意大利，就將保羅及另外幾若個犯人交互西巴斯督營的百總，名猶流。
2 有亞大米田的船，欲行到亞西亞海墘幾若所在，阮就搭伊起身；有馬其頓的帖撒羅尼迦人亞里達古及阮去。
3 隔日，到西頓；猶流好款待保羅，准伊就近諸個朋友，受𪜶的照應。
4 對遐開船，因為對頭風的緣故，就對居比路下勢經過。
5 已經過基利家、旁非利亞的海，到呂家的每拉。
6 佇遐，百總抵著亞力山大的船，欲去意大利的，就教阮搭伊。
7 行真慢，多多日才僅仔到革尼土對面。因為風阻擋，就閃革哩底下，對撒摩尼過。
8 僅僅仔會通沿岸，行到一所在，名佳澳；近遮有拉西亞的城。
9 歷過多多日，禁食的期已經過，行船危險，保羅勸𪜶講：
10 「大家啊，我看此擺行船，若貨物及船，連咱的生命亦欲受害及大損失。」
11 若是百總信舵公及船主，卡過頭佇保羅所講的。
12 閣佇此個垵澳過冬天利便，大半的人，想愛開船離開遮，看會通到非尼基過冬天。彼位就是革哩底一個垵澳，一面向東南，一面向東北。
海上的狂風
13 此時，南風微微仔來，眾人掠做得意，就起碇，倚革哩底岸來行。
14 無偌久，狂風對海嶼頂拍落來；彼個風名「友拉居崙」。
15 船互風掃，接載𣍐住，就出在伊漂流。
16 駛到小海嶼下，名叫高大，僅僅會收舢舨起來。
17 舢舨已經收起來，就用方法捆缚船底，閣驚了靠著賽耳底的沙汕就落帆，互風押去。
18 阮互風湧大搖簸，隔日𪜶就用貨物㧒落海。
19 第三日，閣親手㧒擲船裡的器具。
20 日及星多多日無出現，閣互風湧拍不止殄，阮得救的向望就攏無啦。
21 眾人久久無食，保羅徛佇𪜶中間，講：「大家啊，恁前著聽我的話，莫得開船離開革哩底，來抵著此號傷害及損失。
22 今我勸恁安心，因為恁中間無一人會失落生命，獨獨失落船若定。
23 因為我所屬所服事的上帝，伊的天使昨暝徛佇我身邊，講：
24 『保羅，免驚；你的確著徛佇該撒的面前，看啊！上帝用船內的人攏總賞賜你。』
25 所以，大家啊，恁著安心，因為我信上帝，代誌啲欲照伊所給我講的。
26 若是咱諸個的確靠佇一個海嶼。」
27 到第十四暝，阮漂流佇亞底亞海。約略半暝，水手掠做近山，
28 拍水鉈，得著二十尋；略略仔進前，閣拍水鉈，得著十五尋。
29 驚了犂著石，就佇船尾拋四弓碇，切切向望天光。
30 水手愛欲離開船逃走，放舢舨落海，假做欲對船頭拋碇。
31 保羅對百總及兵丁講：「諸個人無𫢶佇船裡，恁𣍐會得救。」
32 兵丁就斬斷舢舨的索，出在伊家己墜落。
33 到天欲光，保羅勸眾人著食，講：「恁大家啲瞭望，愞枵成食，今仔日是第十四日啦。
34 所以勸恁著食，這是關係恁的得救；因為恁無一人會失落一支頭毛。」
35 講息，提餅，當眾人的面前感謝上帝，擘破來食。
36 對按呢眾人攏安心，亦逐個食。
37 阮佇船裡的計共二百七十六人。
38 已經食飽，㧒麥落海，互船卡輕。
船靠淺
39 到天光，識彼個所在，獨獨看見一個海灣，有沙坡，就相及計謀看會互船犂上頂面抑𣍐。
40 就棄拺諸個碇，放佇海裡；也解開吊船舵的索起頭帆，互伊食風向沙坡進前。
41 抵著雙夾流的位，船就靠淺；船頭咬住𣍐振動，船尾互大湧摔破。
42 兵丁的意思欲刣諸個犯人，驚了有的泅走。
43 獨獨百總愛救保羅，阻擋𪜶所計謀，命令會泅的人，代先落水上山；
44 其餘的人有的用板，有的用船內的物。對按呢，眾人攏得救上山。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。