上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
使徒行傳
25
保羅欲向該撒上訴
非斯都到任，三日，就對該撒利亞上耶路撒冷。
2 諸個祭司頭及猶太的頭人對伊告保羅，
3 續求情欲害保羅，說伊帶保羅到耶路撒冷，𪜶佇路裡啲設埋伏欲刣伊。
4 若是非斯都應講：「保羅是顧守佇該撒利亞，我本身亦欲緊緊倒去」；
5 閣講：「恁中間卡會的人通相及落去，彼人若有甚麼不是，就通告伊。」
6 非士都𫢶遐不過十日八日，就落去該撒利亞；隔日坐堂，命令帶保羅來。
7 已經到，對耶路撒冷落來的猶太人圍纍啲徛，用多多重的案件來告伊，若是無憑據通證明。
8 保羅分訴講：「猶太人的律法，抑是殿堂，抑是該撒，我未曾犯著。」
9 非士都愛互猶太人歡喜，應保羅講：「論諸個事，你甘願上耶路撒冷，佇遐當我的面前受審判嗎？」
10 總是保羅講：「我徛佇該撒的公堂，是我應該受審判的位。我未曾用不義款待猶太人，這亦是你所明明知的。
11 我若有行不義，抑是犯著死罪，就死，亦無推辭。若是𪜶所告我的無一項實，就無人通順人情將我交互𪜶。我對該撒告御狀。」
12 非士都及議會相及議論了，就應講：「你已經對該撒告御狀，就去見該撒。」
受帶到亞基帕夫婦面前
13 過幾若日，亞基帕王及百尼基到該撒利亞，請安非士都。
14 𫢶遐多多日，非士都將保羅的事對王排列，講：「有一人，就是腓力斯所留佇監裡的。
15 我佇耶路撒冷的時，諸個祭司頭及猶太的長老告伊，求定伊的罪。
16 我應講，被告及原告猶未對訊，未得著機會分訴伊的案情，就順人情將伊交互人，是羅馬人的例。
17 所以𪜶聚集佇遮，我無延迁，隔日坐堂，命令帶彼人到。
18 告伊的人攏徛啲；所告的，是我所代先拍算的歹事。
19 不過有幾項的辯論，就是論𪜶敬神明的事，閣論一個耶穌，已經死，保羅講伊活。為著按呢來告伊。
20 諸個事著怎樣查問，我既然𣍐明，所以問伊：『甘願去耶路撒冷，佇遐受審問諸個事抑？』
21 獨獨保羅已經告御狀，愛我留伊，交互皇帝判斷，我就命令留伊，聽候解送互該撒。」
22 亞基帕對非斯都講：「我本也愛聽此個人。講，明仔日通聽伊。」
23 隔日，亞基帕及百尼基大設威儀來，及諸個千總以及城內尊貴的人入公堂。非斯都出命令，就帶保羅到。
24 非斯都講：「亞基帕王以及及阮佇啲的眾人啊，恁看此個人，就是眾猶太人，佇耶路撒冷及佇遮，求我叫講：『伊應該猶活的。』
25 若是我查明伊未曾行應該死的事，閣伊已經告御狀佇皇帝，所以我擬定解送伊。
26 獨獨未得著伊的實情通奏我的主。所以，帶伊出來佇恁的面前，閣卡要緊佇亞基帕王你的面前，才佇審問了有所通奏。
27 因為照我拍算，解送犯人，若無指明告伊的事，是無合理。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。