上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
使徒行傳
12
雅各受刣，彼得關監
將近彼時，希律王下手陷害教會中幾若人，
2 用刀刣約翰的兄弟雅各。
3 看見猶太人歡喜，就閣掠彼得。彼時就是除酵的日。
4 已經掠，就關伊佇監裡，交互四班的兵顧守，每班四人，意思欲佇𨃟過節後帶伊出，辦伊互百姓看。
5 對按呢彼得留佇監裡；獨獨教會替伊切切求上帝。
彼得獲救出監
6 希律啲欲提伊出彼暝，彼得縛佇二條鐵鍊，睏佇二個兵的中間；閣顧守的人佇門外啲顧守。
7 忽然，有主的天使徛佇邊頭，房內有光啲照，搭彼得的脇下，叫伊醒，講：「緊緊起來！」鐵鍊就對伊的手落去。
8 天使給伊講：「著縖帶，穿鞋。」伊照按呢行。閣給伊講：「𧜞你的衫，隨我。」
9 就出來隨伊，知天使所做是真，掠做是看見異象。
10 已經經過第一及第二顧守的所在，到透城的鐵門，彼個門為著𪜶家己開。就出去，行過一條街，天使連鞭離開伊。
11 彼得醒悟，講：「今我真正知主差伊的天使，救我脫離希律的手及猶太的百姓一盡所向望的。」
12 已經想明此個事，就到約翰稱做馬可的老母馬利亞的厝，佇遐有多多人聚集啲祈禱。
13 伊拍外門的時，有查某囝仔，名羅大，出來聽，
14 認得彼得的聲，因為歡喜的緣故無開門，走入去給人講：「彼得徛佇門外。」
15 若是𪜶對伊講：「你啲狂啦！」查某囝仔出力講：「真正是！」𪜶就講：「是伊的天使！」
16 彼得閣拍門無息。𪜶開門，看見伊，真卬愕。
17 伊搖手，教𪜶莫做聲，就對𪜶講起主怎樣導伊出監；閣講：「著將諸個事給雅各及兄弟講。」就出去，去別所在。
18 到天光，兵丁知彼得叨落去，就大擾動。
19 希律尋伊𣍐著，就審問顧守的兵，命令拖𪜶去刣。就離開猶太，落去該撒利亞徛起。
希律的死
20 希律不止受氣推羅、西頓的人。總是許個人同心就近伊，拜託跟隨王的人臣伯拉斯都求和，因為𪜶的地方對王的地方得著米糧。
21 希律佇所定著的日期，穿王服，坐佇座位，當面對𪜶講。
22 百姓叫講：「這是上帝的聲，是人的聲。」
23 希律無歸榮光上帝，主的天使隨時拍伊，就互蟲咬，氣斷。
24 若是上帝的道理愈開闊，興旺。
25 巴拿巴、掃羅賑濟人的事辦明白，就對耶路撒冷倒轉，導約翰稱做馬可的相及去。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。