上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約翰福音
21
耶穌向七個門徒顯現
諸個代誌以後，耶穌佇提比哩亞的海邊閣顯明家己互學生看。伊的出現記佇下底：
2 有西門‧彼得，多馬稱低土馬，加利利的迦拿人拿但業，西庇太的子，猶有學生二個，攏相及佇啲。
3 西門‧彼得給𪜶講：「我欲去討魚。」𪜶給伊講：「阮亦欲及你去。」就出去，上船；彼暝無掠著甚麼。
4 天昲光，耶穌徛佇海坪，若是學生知伊是耶穌。
5 耶穌就給𪜶講：「細子啊，恁有物配無？」𪜶講：「無」。
6 伊就給𪜶講：「拋網佇船的正旁，就會得著。」𪜶拋落去，就網拖𣍐起來，是因為魚多的緣故。
7 對按呢，耶穌所疼彼個學生給彼得講：「是主啦！」西門‧彼得一下聽見是主，因為褪腹裼，就用外衫來縖，跳落海。
8 其餘的學生，因為離坪無遠，約略三十丈，用細隻船來拖彼網的魚。
9 到上坪，看見有啲𤏸的炭，頂面有魚，閣有餅。
10 耶穌給𪜶講：「抵仔拋著的魚，掠幾尾來。」
11 西門‧彼得就起去，拖網上坪。有大尾魚滿滿，共一百五十三尾；魚雖然許多，網亦無裂。
12 耶穌給𪜶講：「來食早頓。」學生無人敢問伊：「你是是誰？」因為知伊是主。
13 耶穌到，提餅互𪜶，魚亦是按呢。
14 耶穌對死人中復活了後，出現互伊的學生看見，這是第三擺。
耶穌及彼得
15 已經食早頓，耶穌給西門‧彼得講：「約翰的子西門，你疼我卡贏諸個嗎」，應講：「主啊，是，你知我疼你。」耶穌給伊講：「飼我的羊仔子。」
16 第二擺閣給伊講：「約翰的子西門，你疼我嗎？」講：「主啊，是，你知我疼你。」耶穌給伊講：「照顧我的羊。」
17 第三擺給伊講：「約翰的子西門，你疼我嗎？」彼得因為伊第三擺給伊講「你疼我嗎？」就憂悶，給伊講：「主，你無所知；你知我疼你。」耶穌給伊講：「飼我的羊仔。
18 我實實給你講，你少年的時，用帶家己縛，照所愛來行遊；獨獨到老，你欲伸手，別人就縛你，拖你到愛去的所在。」
19 （耶穌講這話是指彼得欲怎樣死，來榮光上帝。）已經講按呢，就給伊講：「隨我！」
耶穌及伊所疼的彼個門徒
20 彼得越轉身，看見耶穌所疼的學生隨𪜶，（就是前佇晚餐的時，向倚耶穌的胸坎講：「主啊，賣你的人是是誰？」）
21 彼得看見，就給耶穌講：「主啊，此人怎樣？」
22 耶穌給伊講：「我若愛伊佇啲到我來，及你甚麼干涉？你著隨我！」
23 對按呢此個話遍傳佇兄弟的中間，講此個學生𣍐死。若是耶穌是給伊講伊𣍐死，獨獨講：「我若愛伊長長佇啲到我來，及你甚麼干涉？」
24 為著諸個事做干證，來寫伊的人就是此個學生；閣咱知伊的干證是真。
25 耶穌所行猶有多多項，若隨一項來寫，我拍算，所記的冊世間貯𣍐了。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。