上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
35
安息日的條例
摩西招集以色列人全會，對𪜶講：「耶和華所吩咐的話，教恁著行的就是諸個：
2 六日著做工，第七日是恁的聖日，是大的安息日來服事耶和華。凡若佇此日做工者，著互伊死。
3 當安息日，佇恁逐間厝內通起火。」
為會幕奉獻
4 ( 出 25:1-9 )
摩西對以色列人全會講：「耶和華所吩咐的話是按呢講：
5 恁中間著提禮物獻互耶和華，見若心願者，通提伊來做獻互耶和華的禮物，就是金、銀、銅，
6 藍色、紫色、朱紅色的料，幼苧，山羊毛，
7 染紅的羊牨皮，海狗皮，皂莢柴，
8 點燈的油，芳的料通做抹的油及芳香，
9 紅瑪瑙及別樣的寶石，通鑲佇以弗得及補𧞔。」
會幕的器物
10 ( 出 39:32-43 )
「恁中間見若心有智慧者，攏著來做耶和華一切所吩咐的：
11 就是會幕，伊的布棚及伊的蓋，伊的鈎，伊的板，伊的橫楗，伊的柱，伊的臼，
12 櫃及伊的槓，施恩所及遮截的帳簾，
13 桌及伊的槓及伊的器具，及排列的餅，
14 點光的燈台及伊的器具，燈盞及點光的油，
15 香壇及伊的槓，抹的油及芳香，以及會幕門的門簾，
16 燒祭的壇及伊銅的網，及伊的槓以及伊一切的器具，洗盪的盆及伊的座，
17 場的帳帷及伊的柱，𪜶的臼及場門的門簾，
18 會幕所釘的釘及場所釘的釘，及𪜶的索，
19 精工的衣服佇聖所穿來服事的，就是祭司亞倫的聖衫及伊的子的衫，穿來擔當祭司的職。」
百姓奉獻禮物
20 以色列人全會對摩西的面前出去。
21 見若受感動對心歡喜者，攏總來提禮物獻互耶和華，用來做會幕的工及一切的路用，也用來做聖衫。
22 見若出佇心歡喜者，查甫婦人攏來，逐個將金器，就是胸前的稟針、耳鈎、拍印的手指，及手環這是逐人將伊的禮物獻互耶和華。
23 見若人有藍色、紫色、朱紅色的料，幼苧，山羊毛，染紅的羊牨皮，海狗皮，攏提來；
24 見若獻銀及銅做禮物的，攏提來獻互耶和華；見若有皂莢柴通做甚麼路用的也提來。
25 見若心內有智慧的婦女親手紡線，將所紡的藍色、紫色、朱紅色的料，及幼苧攏提來。
26 見有智慧的、心受感動的婦女就紡山羊毛。
27 諸個頭人將紅瑪瑙及別樣的寶石，通鑲佇以弗得及補𧞔的，攏提來；
28 閣提香料及油，通用伊來點燈，做抹的油，做芳的香。
29 以色列人，無論男女，見若心歡喜獻禮物互耶和華者，攏歡喜提禮物來，做耶和華託仗摩西所吩咐𪜶做一切的工。
造會幕的技工
30 ( 出 31:1-11 )
摩西對以色列人講：「恁看，猶大的支派，戶珥的孫、烏利的子比撒列，耶和華已經指名召伊，
31 閣用上帝的神充滿伊，互伊有智慧、有聰明、有知識，會做逐樣的工，
32 會想出奇巧的工來做金、銀、銅許個物，
33 也會刻寶石來入伊，也會刻柴，會做逐樣奇巧的工。
34 閣互伊及但的支派亞希撒抹的子亞何利亞伯，心有靈竅，會教示人。
35 諸個人伊用智慧充滿𪜶的心，互𪜶會做逐樣的工，無論雕刻的工，奇巧的工，用藍色、紫色、朱紅色的料，及幼苧，綉花的、織布的，逐樣的工，攏會做，也會想出奇巧的工。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。