上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
32
金牛仔
( 申 9:6-26 )
百姓看見摩西延迁無落山，百姓就聚集到亞倫遐，對伊講：「起來！給阮妝上帝，通行佇阮的頭前；因為彼個摩西，就是導阮對埃及地出來彼個人，阮知伊抵著甚麼。」
2 亞倫對𪜶講：「恁的某、恁的子、查某子、耳仔所掛的金環剝伊，提來互我。」
3 百姓就攏剝𪜶耳仔裡的金環，提來互亞倫。
4 亞倫對𪜶的手接來，鑄一隻牛仔，用扦刀仔雕刻伊。𪜶就講：「以色列啊，這是你的上帝導你出埃及地的。」
5 亞倫看了，就佇牛仔的面前起壇，亞倫閣宣佈講：「明仔日著守節服事耶和華。」
6 隔日清早，𪜶起來獻燒祭及平安祭，百姓就坐啲飲食，起來滾笑。
7 耶和華對摩西講：「去啊，你落去，因為你的百姓，就是對埃及地導出來的，已經敗壞家己。
8 𪜶緊緊離開我所吩咐𪜶的路，為家己鑄成一隻牛仔，跪拜伊獻祭伊，講：『以色列啊，這就是導你出埃及地的上帝。』」
9 耶和華對摩西講：「我看此個百姓，看啊，是頷頸硬的百姓。
10 你今出在我，我欲大受氣𪜶，滅無𪜶，用你成做大國。」
11 摩西就對伊的上帝──耶和華求情講：「耶和華啊，你啥事大受氣你的百姓啊？是你用大氣力大權能的手對埃及地導出來的。
12 啥事互埃及人有話講『伊導𪜶出去，是欲害𪜶，害死𪜶佇山中，對地上除滅𪜶』？求你回心轉意，息你的大受氣，無降災禍互你的百姓。
13 紀念你的奴僕亞伯拉罕、以撒、以色列。你曾指家己對𪜶咒誓講：『我欲互恁的後裔親像天頂的星許多，閣我所講此個全地，我欲賞賜恁的後裔，欲做𪜶永遠的業。』」
14 對按呢耶和華退悔，無降落伊前所講的災禍互伊的百姓。
15 摩西越轉身落山，手提二塊約碑。諸個碑二面攏有寫，此面彼面攏有寫字，
16 碑是上帝做的，字是上帝寫的，刻佇碑裡。
17 約書亞一下聽見百姓喊嘩的聲，就對摩西講：「佇營中有交戰的聲。」
18 伊講：「我所聽見是刣贏得勝的聲，也是刣輸喉叫的聲，就是唱歌的聲。」
19 行近營盤看見牛仔，閣看見人啲跳舞，摩西就大受氣，對伊的手㧒二塊石碑折佇山腳，
20 閣將𪜶所鑄的牛仔用火燒，研做粉，撒佇水面，互以色列人飲伊。
21 摩西對亞倫講：「此個百姓對你做甚麼？你才互𪜶陷落重罪！」
22 亞倫講：「我的主莫得大受氣。諸個百姓決意做歹，是你所知的。
23 𪜶對我講：『你給阮妝上帝，通行佇阮的頭前；因為彼個摩西就是導阮對埃及地出來彼個人，阮知伊抵著甚麼。』
24 我對𪜶講：『見若有金的剝起來』，𪜶將金互我。我㧒伊佇火裡，此隻牛仔就出來。」
25 摩西看見百姓放縱（因為亞倫放出在𪜶，互𪜶佇對敵的中間受譏刺），
26 摩西徛佇營盤的門，講：「是誰倚耶和華者，通來我遮！」利未人就攏聚集佇伊遐。
27 伊對𪜶講：「耶和華──以色列的上帝按呢講：『恁逐人著插刀佇大腿裡，往來佇營中，對此個門到彼個門，逐人刣死伊的兄弟及伊的同伴以及伊的厝邊。』」
28 利未人照摩西的話行。彼日百姓中死者約略三千人。
29 摩西講：「恁獻家己互耶和華，逐人攻擊伊的子，伊的兄弟，今仔日得著伊賜福恁。」
30 過日，摩西對百姓講：「恁有犯重罪。我今欲上去耶和華遐，豈採通給恁贖罪。」
31 摩西倒轉到耶和華遐，講：「唉啊！此個百姓犯重罪，為家己做金的上帝。
32 今你若欲赦免𪜶的罪……若，求你對你所寫的冊擦去我的名。」
33 耶和華對摩西講：「甚麼人得罪我，就對我的冊擦伊的名。
34 今你去導此個百姓，去我所給你講的所在；看啊，我的使者欲行佇你的頭前；獨獨到我辦罪的日，我欲辦𪜶的罪。」
35 耶和華降災禍互百姓因為𪜶造牛仔就是亞倫所造的。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。