上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
31
會幕的技工
( 出 35:30—36:1 )
耶和華對摩西講：
2 「看啊，猶大支派，戶珥的孫、烏利的子比撒列，我已經指名來召伊。
3 我用上帝的神充滿伊，互伊有智慧，有聰明，有知識，會做逐樣的工，
4 會想出奇巧的工，來做金、銀、銅許個物，
5 也會刻寶石來入伊，也會刻柴，會做逐樣奇巧的工。
6 我也派但的支派、亞希撒抹的子亞何利亞伯及伊相及做。見若心內有智慧的，我閣賞賜智慧佇𪜶的心，互𪜶會做我一切所吩咐你的，
7 就是會幕、法櫃，及彼頂面的施恩所，以及布棚一切的器具，
8 桌及桌頂的器具，好金的燈台及伊一切的器具以及香壇，
9 燒祭的壇及伊一切的器具，以及洗盪的盆及伊的座，
10 精工的衣服，祭司亞倫的聖衫及伊的子的衫互𪜶做祭司來服事，
11 通抹的油以及聖所所用芳料的香；照我一切所命令你的，𪜶著做。」
安息日
12 耶和華吩咐摩西講：
13 「你著吩咐以色列人講：『恁的確著守我許個安息日；因為這是我及恁的中間的證據，到佇恁逐世代，互恁知我──就是耶和華互恁成聖的。
14 所以恁著守安息日，因為是恁的聖日。見若犯著此日者，著互伊死；凡若佇此日做工者，著對伊的百姓中受剪除。
15 六日著做工，獨獨第七日是安息的大日，是耶和華的聖日。凡若佇安息日做工者，的確著互伊死。』
16 所以，以色列人著守安息日代代謹慎此個安息日做永遠的約。
17 這是我及以色列人中間永遠的證據；因為六日內耶和華創造天地，第七日就歇睏來清閒。」
18 耶和華佇西奈山及摩西講話明白，就將二塊約碑互伊，是上帝用指頭仔寫的石碑。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。